ເພື່ອເປັນການຊຸກຍູ້ສົ່ງເສີມ, ປົກປັກຮັກສາຄະນົບທໍານຽມ, ສິລະປະວັດທະນະທໍາ, ຮີດຄອງປະເພນີອັນດີງາມຂອງຊາດກໍຄືຂອງທ້ອງຖິ່ນໃຫ້ມີຄວາມຍືນຍົງຄົງຢູ່ກັບຄົນລາວຕະຫຼອດໄປ. ສະນັ້ນຄະນະພັກເມືອງໄຊພູທອງແຂວງສະຫວັນນະເຂດ, ຈຶ່ງໄດ້ຈັດງານບຸນນະມັດສະການຜາສາດເຮືອນຫີນປະຈໍາປີ 2024 ຕິດພັນກັບການສົ່ງ ເສີມປີທ່ອງທ່ຽວລາວ ຂຶ້ນເມື່ອບໍ່ດົນມານີ້ ຢູ່ທີ່ເດີ່ນວັດຜາສາດເຮືອນຫີນ, ໂດຍມີຍາທ່ານ ທ່ອງດໍາ ຈັນທະວົງ ເຈົ້າຄະນະ ອົງການພຸດທະສາສະໜາສໍາພັນລາວ (ອພສ) ແຂວງ ເຈົ້າຄະນະ ອພສ ເມືອງໄຊພູທອງ ແລະ ທ່ານ ນາງ ດາວວອນ ໄຊສຸລຽນ ເຈົ້າເມືອງໄຊພູທອງ, ມີແຂກຖືກເຊີນທັງພາຍໃນ ແລະ ຕ່າງປະເທດໄກ້ຄຽງ ຕະຫຼອດຮອດນັກທ່ອງທ່ຽວເຂົ້າຮ່ວມຢ່າງຄຶກຄື້ນ.
ໃນພິທີ, ທ່ານ ພົມມາ ສົງວິໄລ ຮອງເຈົ້າເມືອງ ປະທານຈັດງານບຸນດັ່ງກ່າວ ໄດ້ກ່າວເປີດງານວ່າ: ຜາສາດເຮືອນຫີນເປັນສະຖາປັດຕະຍະກໍາທີ່ໂດດເດັ່ນລໍ້າຄ່າ ຊຶ່ງບົງບອກເຖິງປະຫວັດຂອງຜາສາດເຮືອນຫີນ ຄວາມເກັ່ງກ້າສາມາດສະຫຼາດຫຼັກແຫຼມ ແລະ ມີຫົວຄິດປະດິດສ້າງຂອງປະຊາຊົນບັນດາເຜົ່າໃນຍຸກສະໄໝບູຮານ(ອານາຈັກຂອມເຮືອງອໍານາດໃນສະໄໝສີໂຄດຕະບູນໃນຍຸກເງິນຍາງ) ແລະ ຍັງເປັນສັນຍາລັກໃຫ້ແກ່ລຸ້ນຄົນພວກເຮົາໃນປັດຈຸບັນໄດ້ເຫັນຄຸນຄ່າຄວາມເປັນມາຂອງຊາດລາວເຮົາທີ່ເປັນຊາດໜຶ່ງທີ່ມີຄວາມຈະເລີນຮຸ່ງເຮືອງສີວິໄລທາງດ້ານອະລິຍະທໍາ, ຊຶ່ງບັນພະບູລຸດລາວແຕ່ລະຍຸກແຕ່ລະສະໄໝໄດ້ປົກປັກຮັກສາ ແລະ ສ້າງສາພັດທະນາມາ,ຜາສາດເຮືອນຫີນແຫ່ງນີ້ຖືວ່າເປັນແຫ່ງທີ 2 ຂອງປະເທດລາວ ຖັດຈາກວັດພູຈໍາປາສັກ. ຕາມການສັນນິຖານວ່າ ຖືກສ້າງຕັ້ງຂຶ້ນໃນຊ່ວງທ້າຍສັດຕະວັດທີ 11 ຫາຕົ້ນສັດຕະວັດທີ 12 ຜາສາດເຮືອນຫີນມີລວງຍາວ 24 ແມັດ, ກວ້າງ 21 ແມັດ, ສູງເກືອບ 20 ແມັດ, ຂອບເຂດຮ່ອງຮອຍກໍາແພງເກົ່າເຮືອນຫີນຍາວ 150 ແມັດ, ກວ້າງ 100 ແມັດ. ສະນັ້ນ ພໍມາຮອດເດືອນ 4 ເພັງ (ອອກໃໝ່ 15 ຄໍ່າຂອງທຸກໆປີແມ່ນໄດ້ຈັດງານບຸນນະມັດສະການຜາສາດເຮືອນຫີນ).
ໃນພິທີ ທ່ານ ເຈົ້າເມືອງໄຊພູທອງ ໄດ້ໃຫ້ກຽດຂຶ້ນລັ່ນຄ້ອງ 9 ບາດ ເພື່ອເປັນສັນຍາລັກແຫ່ງການກ່າວເປີດງານຂື້ນຢ່າງເປັນທາງການ. ຈາກນັ້ນ ກໍໄດ້ມີຂະບວນແຮ່ຮູບຈໍາລອງຄື: ແຫ່ຜາສາດເຜິ້ງ, ຮູບຈໍາລອງຜາສາດເຮືອນຫີນ, ງູຊ່ວງ, ງົວໂທນ, ເຕົ່າຄໍາ ແລະ ໝາຊ່ວງຜາສາດເຜິ້ງ ແລະ ຂັນໝາກເບັງໃຫຍ່ ເພື່ອເປັນການສາກາລະບູຊາໃຫ້ແກ່ຜາສາດເຮືອນຫີນ ພ້ອມນັ້ນ ຍັງໄດ້ຊົມການສະແດງສິລະປະວັນນະຄະດີມີ 8 ຂະບວນຟ້ອນຂອງນ້ອງນັກຮຽນ. (ຂ່າວ: ສະຫວັນ)
ຄໍາເຫັນ