 |
ທ່ານ ຄໍາກອງ ລາວລີ ໄດ້ໃຫ້ຮູ້ວ່າ: ໃນໄລຍະຜ່ານມາວຽກງານລັດຖະກອນໄດ້ຮັບການປັບປຸງ ແລະ ມີບາດກ້າວຂະຫຍາຍຕົວ, ໂດຍຫັນການຄຸ້ມຄອງເຂົ້າສູ່ລະບຽບ, ເປັນເອກະພາບກັນໃນຂອບເຂດທົ່ວປະເທດ ຊຶ່ງໄດ້ອຳນວຍຄວາມສະດວກໃຫ້ແກ່ການຈັດຕັ້ງແຕ່ລະຂັ້ນ ທັງສູນກາງ ແລະ ຂັ້ນທ້ອງຖິ່ນ ໃນການວາງແຜນ, ສອບເສັງບັນຈຸ, ຊັບຊ້ອນ, ຍົກຍ້າຍ, ເລື່ອນຊັ້ນ-ຂັ້ນ, ບໍາລຸງກໍ່ສ້າງ ແລະ ປະຕິບັດນະໂຍບາຍຕ່າງໆຕໍ່ພະນັກງານລັດຖະກອນ. ພັກ ແລະ ລັດຖະບານໄດ້ເອົາໃຈໃສ່ວາງແນວທາງນະໂຍບາຍ, ຄົ້ນຄວ້າ ແລະ ປະກາດໃຊ້ບັນດານິຕິກຳ, ລະບຽບການ ເພື່ອພັດທະນາວຽກງານດັ່ງກ່າວ ໃຫ້ມີປະສິດທິພາບ ແລະ ສອດຄ່ອງກັບການປ່ຽນແປງຂອງສະພາບເສດຖະກິດ-ສັງຄົມໃນແຕ່ລະໄລຍະ. ພ້ອມນີ້ທ່ານ ໄດ້ຮຽກຮ້ອງມາຍັງຜູ້ເຂົ້າຮ່ວມ ຈົ່ງພ້ອມກັນເອົາໃຈໃສ່ຮັບຟັງການເຜີຍແຜ່ເອກະສານທີ່ສໍາຄັນຕ່າງໆ ດ້ວຍຄວາມຮັບຜິດຊອບສູງ ແລະ ພ້ອມກັນຄົ້ນຄວ້າປະກອບຄໍາຄິດ-ຄຳເຫັນ ໃສ່ເນື້ອໃນດຳລັດວ່າດ້ວຍຕໍາແໜ່ງບໍລິຫານພະນັກງານລັດຖະກອນ ເພື່ອເຮັດໃຫ້ການຈັດຕັ້ງປະຕິບັດວຽກງານຄຸ້ມຄອງລັດຖະກອນ ໃຫ້ມີປະສິດທິພາບ ແລະ ປະສິດທິຜົນດີຂຶ້ນກວ່າເກົ່າ.
ກອງປະຊຸມຄັ້ງນີ້, ໄດ້ຮັບຟັງການເຜີຍແຜ່ຍຸດທະສາດວຽກງານຄຸ້ມຄອງລັດຖະກອນ ຂອງ ສປປ ລາວ ຮອດປີ 2030, ເຜີຍແຜ່ວຽກງານຈັນຍາບັນ, ວຽກງານປະເມີນຜົນຂອງພະນັກງານ-ລັດຖະກອນ ພ້ອມທັງ ທາບທາມດຳລັດວ່າດ້ວຍການດຳລົງຕຳແໜ່ງບໍລິຫານຂອງພະນັກງານ-ລັດຖະກອນ ສະບັບເລກທີ 203/ລບ, ລົງວັນທີ 04 ກໍລະກົດ 2017, ດໍາລັດວ່າດ້ວຍມາດຖານຕໍາແໜ່ງບໍລິຫານຂອງລັດຖະກອນ ແຫ່ງ ສປປ ລາວ ສະບບເລກທີ 461/ລບ, ລົງວັນທີ 9 ຕຸລາ 2012 ແລະ ທາບທາມ ການຈັດຕັ້ງປະຕິບັດກົດໝາຍ ພະນັກງານ-ລັດຖະກອນ. ຈາກນັ້ນ, ຜູ້ເຂົ້າຮ່ວມກໍໄດ້ຜັດປ່ຽນ ກັນປະກອບຄຳຄິດ-ຄຳເຫັນ ໃສ່ບັນດານິຕິກຳຕ່າງໆ ເພື່ອພ້ອມກັນຈັດຕັ້ງປະຕິບັດໜ້າທີວຽກງານ ໃນຕໍ່ໜ້າໃຫ້ມີຜົນສໍາເລັດ.
(ຂ່າວ: ນາງ ຟອງ ນໍ່ນິນທາ)
ຄໍາເຫັນ