 |
ທ່ານ ອຸດອນ ສິງດາລາ ຄະນະປະຈຳພັກແຂວງ ປະທານກວດກາພັກ ແລະ ອົງການກວດກາລັດແຂວງ ກຳມະການຄະນະກຳມະການເລືອກຕັ້ງຂັ້ນແຂວງລາຍງານໃຫ້ຮູ້ວ່າ: ພາຍຫຼັງໄດ້ຮັບມະຕິ, ແຈ້ງການ ແລະ ຄໍາແນະນໍາຂອງຄະນະກໍາມະການເລືອກຕັ້ງລະດັບຊາດ, ຄະນະປະຈຳສະພາປະຊາຊົນແຂວງໄດ້ອອກມະຕິວ່າດ້ວຍການແຕ່ງຕັ້ງຄະນະກຳມະການເລືອກຕັ້ງຂັ້ນແຂວງ, ຂັ້ນເມືອງ, 5 ເມືອງໃນທົ່ວແຂວງເພື່ອຮັບໃຊ້ການເລືອກຕັ້ງ ສສຊ ຊຸດທີ X ແລະ ສສຂ ຊຸດທີV ພ້ອມທັງໄດ້ຮີບຮ້ອນເປີດກອງປະຊຸມຄັ້ງປະຖົມມະລືກຂອງຕົນເພື່ອຮ່ວມກັນຄົ້ນຄວ້າຜັນຂະຫຍາຍແຜນການດໍາເນີນງານຂອງຄະນະກຳມະການລະດັບຊາດມາເປັນແຜນດໍາເນີນງານຂອງຄະນະກຳມະການເລືອກຕັ້ງຂັ້ນແຂວງ ຊຶ່ງໄດ້ກຳນົດບັນດາໜ້າວຽກຕ່າງໆອອກເປັນ 4 ບາດກ້າວຄື: ບາດກ້າວທີ 1 ກະກຽມບັນດາເອກະສານພື້ນຖານຕ່າງໆເພື່ອຮັບໃຊ້ການເລືອກຕັ້ງ; ບາດກ້າວທີ 2 ຜັນຂະຫຍາຍບາດກ້າວທີ 1 ແລະ ບັນດານິຕິກຳຂອງຄະນະກຳມະການເລືອກຕັ້ງລະດັບຊາດລົງໄປຫາຄະນະກຳມະການເລືອກຕັ້ງຂັ້ນເມືອງ; ບາດກ້າວທີ 3 ເປັນບາດກ້າວຜັນຂະຫຍາຍວຽກງານຕ່າງໆໃນບາດກ້າວທີ 2 ຕິດຕາມ, ຊຸກຍູ້ການຈັດຕັ້ງປະຕິບັດຢູ່ຂັ້ນເມືອງ ແລະ ບາດກ້າວທີ 4 ພາຍຫຼັງວັນເລືອກຕັ້ງ ແລະ ກະກຽມກອງປະຊຸມຄັ້ງປະຖົມມະລືກຂອງ ສສຂ ຊຸດທີ V. ມາຮອດປັດຈຸບັນ, ຄະນະກໍາມະການເລືອກຕັ້ງຂັ້ນແຂວງໄດ້ຮັບນິຕິກໍາຈາກຄະນະກໍາມະການເລືອກຕັ້ງລະດັບຊາດເປັນຕົ້ນມະຕິຕົກລົງ, ແຜນດໍາເນີນງານ, ຄໍາແນະນໍາ, ແຈ້ງການ ແລະ ເອກະສານຕ່າງໆທັງໝົດ 23 ສະບັບ ແລະ ໄດ້ຈັດຕັ້ງຜັນຂະຫຍາຍຫັນມາເປັນຂອງຄະນະກໍາມະການເລືອກຕັ້ງຂັ້ນແຂວງໄດ້ທັງໝົດ 19 ສະບັບ. ໃນການຈັດຕັ້ງປະຕິບັດວຽກງານຕົວຈິງໄດ້ສໍາເລັດບາດກ້າວທີ 1, ພວມດໍາເນີນການຈັດຕັ້ງປະຕິບັດບາດກ້າວທີ 2 ແລະ ກະກຽມວາງແຜນການຈັດຕັ້ງປະຕິບັດບາດກ້າວທີ 3.
ໄດ້ສໍາເລັດການອອກມະຕິແຕ່ງຕັ້ງຄະນະກຳມະການຂັ້ນແຂວງ, ຂັ້ນເມືອງ ແລະ ແບ່ງຄວາມຮັບຜິດຊອບ ພາຍໃນຢ່າງຈະແຈ້ງ ລວມທັງແຕ່ງຕັ້ງບັນດາອະນຸກຳມະການຊ່ວຍວຽກຢ່າງເປັນລະບົບຕາມຄໍາແນະນໍາຂອງຄະນະກຳມະການລະດັບຊາດ, ໄດ້ອອກນິຕິກໍາຂອງຄະນະກໍາມະການເລືອກຕັ້ງຂັ້ນແຂວງ ເພື່ອຮັບໃຊ້ການເລືອກຕັ້ງທັງໝົດ 19 ສະບັບ ເພື່ອເປັນບ່ອນອີງໃຫ້ຄະນະກໍາມະການເລືອກຕັ້ງຂັ້ນແຂວງ, ເມືອງ.
ໄດ້ຈັດຕັ້ງໂຄສະນາຫາສຽງໃຫ້ຜູ້ອອກສະໝັກຮັບເລືອກຕັ້ງເປັນ ສສຊ ຊຸດທີ X ແລະ ສສຂ ຕາມລະບຽບກົດໝາຍ, ຈັດຕັ້ງນໍາພາ-ຊີ້ນໍາ ການປ່ອນບັດເລືອກຕັ້ງທົ່ວແຂວງໃນວັນທີ 22 ກຸມພາ 2026 ໃຫ້ບັນລຸຜົນສໍາເລັດຕາມລະດັບຄາດໝາຍ, ໃນນັ້ນຕ້ອງຮັບປະກັນ, ນໍາພາຜູ້ມີສິດເລືອກຕັ້ງໄປປ່ອນບັດເລືອກຕັ້ງໃຫ້ຄົບຖ້ວນ100%, ນໍາພາຜູ້ມີສິດເລືອກຕັ້ງໃຫ້ຮູ້ໃຊ້ສິດໃນການປ່ອນບັດເລືອກຕັ້ງຖືກຕ້ອງຕາມລະບຽບການເລືອກຕັ້ງ 100%, ນໍາພາວຽກງານປ້ອງກັນຊາດ-ປ້ອງກັນຄວາມສະຫງົບໃຫ້ມີຄວາມສະຫງົບ ແລະ ມີຄວາມປອດໄພ 100%, ນໍາພາວຽກງານປ່ອນບັດເລືອກຕັ້ງໃຫ້ຮັບປະກັນຄວາມໂປ່ງໃສ ແລະ ສໍາເລັດທັນຕາມກຳນົດເວລາ100%.
 |
ທ່ານ ພົນໂທ ແສງນວນ ໄຊຍະລາດ ຍັງໂອ້ລົມ ແລະ ໄດ້ເນັ້ນໜັກໃຫ້ຄະນະກຳມະການເລືອກຕັ້ງຂັ້ນແຂວງ ແລະ ເມືອງໃຫ້ແຕ່ລະອະນຸກໍາມະການສືບຕໍ່ຊີ້ນໍາໃນການຈັດຕັ້ງປະຕິບັດວຽກງານຂອງຕົນດ້ວຍຄວາມຮັບຜິດຊອບສູງ ພ້ອມທັງຮຽກຮ້ອງໃຫ້ແຕ່ລະອະນຸກໍາມະການຕ່າງໆ ຕ້ອງວາງແຜນການ, ແຜນງານໃຫ້ລະອຽດຈະແຈ້ງ ແລະ ພ້ອມກັນຈັດຕັ້ງປະຕິບັດໜ້າທີ່ວຽກງານໃຫ້ທ່ວງທັນເວລາຕາມລະດັບຄາດໝາຍທີ່ວາງໃວ້, ໃຫ້ເກັບກໍາຜູ້ທີ່ມີສິດລົງເລືອກຕັ້ງມີຈຳນວນທໍ່ໃດ, ຜູ້ມີສິດປ່ອນບັດເລືອກຕັ້ງພາຍໃນແຂວງມີຈໍານວນທໍ່ໃດ, ຜູ້ມີສິດປ່ອນບັດເລືອກຕັ້ງຢູ່ແຂວງໄປປ່ອນຢູ່ບ່ອນອື່ນມີຈໍານວນທໍ່ໃດ, ໃຫ້ປະສານສົມທົບກັບບັນດາບໍລິສັດຕ່າງໆຢູ່ພາຍໃນແຂວງ, ສະເພາະ 2 ກຳລັງ ປກສ-ປກຊ ແມ່ນຕ້ອງໄດ້ປ່ອນກ່ອນ ເພາະຮອດວັນທີ 22 ກຸມພາ 2026 , 2 ກຳລັງດັ່ງກ່າວແມ່ນປ້ອງກັນຄວາມສະຫງົບ ແລະ ເຮັດໜ້າທີ່ບໍລິການໃຫ້ຄວາມສະດວກ ແລະ ເປັນລະບຽບຮຽບຮ້ອຍ.
ຂ່າວ: ບຸນຕອມ
ຄໍາເຫັນ