 |
ທ່ານ ນາງ ປານແກ້ວ ແພງປັນຍາ ຄະນະສະຫະກອນຜູ້ຜະລິດຊາ ທັງຮັບຜິດຊອບ ຄັງເງິນສົດ ເມືອງເມິງ ແຂວງບໍ່ແກ້ວ ໃຫ້ສໍາພາດຕໍ່ນັກຂ່າວໜັງສືພິມປະຊາຊົນສຽງຂອງສູນກາງພັກ, ໃນໂອກາດ ເຂົ້າຮ່ວມງານສະເຫຼີມສະຫຼອງ ວັນສະຫະກອນ 11 ພຶດສະພາ 2026 ທີ່ສູນການຄ້າລາວ-ໄອເຕັກ ນະຄອນຫຼວງວຽງຈັນ ວ່າ: ສະຫະກອນຜູ້ຜະລິດຊາ ດໍາເນີນມາແຕ່ປີ 2022 ທໍາອິດແມ່ນຜະລິດຊາເປັນກຸ່ມ ຈາກນັ້ນ ກໍຄ່ອຍໆຂະຫຍາຍເປັນ ສະຫະກອນ, ປັດຈຸບັນ ມີຈໍານວນສະມາຊິກ ເຖິງ 150 ຄອບຄົວ ກວມເອົາ 5 ບ້ານ ແລະ ຍັງຈະຮັບຮອງເອົາຈໍານວນສະມາຊິກຕື່ມອີກ, ການຜະລິດ ແມ່ນເລັ່ງໃສ່ຊາຂຽວ ເປັນຈໍານວນຫຼາຍ, ສ່ວນຊາແດງ, ຊາພູເອີ ແລະ ຊາຂາວ ແມ່ນຜະລິດຈໍານວນໜ້ອຍ ຍ້ອນວ່າ ຜະລິດຊາຂຽວຫຼາຍ ແມ່ນເພື່ອສົ່ງອອກໄປທີ່ຕະຫຼາດເອີຣົບ, ປີ 2022 ເປັນປີທໍາອິດ(ທົດລອງ)ສົ່ງຊາຂຽວໄປເອີຣົບ, 2023 ສົ່ງອອກ 3 ໂຕນປາຍ, ປີ 2024 ສົ່ງອອກ 4 ໂຕນປາຍ ແລະ ປັດຈຸບັນ ກຽມສົ່ງອອກ 5 ໂຕນ, ຂັ້ນຕອນກຽມຈະສົ່ງອອກ ແມ່ນຜູ້ຮັບຊື້ໄດ້ເຮັດການວິໄຈດ້ວຍຕົນເອງ ສະນັ້ນ ຈຶ່ງເວົ້າໄດ້ວ່າ ຈໍານວນຊາຂຽວຂອງພວກເຮົາ ແມ່ນປອດສານພິດແທ້ໆ 100%. ຄຽງຄູ່ກັບການຜະລິດ ເພື່ອສົ່ງອອກແລ້ວ, ຜະລິດຕະພັນຊາພວກເຮົາ ຍັງໄດ້ຝາກຂາຍ ພາຍໃນແຂວງຫຼວງພະບາງ ໝາຍຄວາມວ່າ ຊາຂອງພວກເຮົາ ຍັງບໍ່ທັນເປັນທີ່ຮູ້ຈັກຂອງຕະຫຼາດພາຍໃນປະເທດເທື່ອ ເນື່ອງຈາກວ່າ ເປັນຜະລິດຕະພັນນ້ອງໃໝ່ ແຕ່ກໍໄປດົ່ງດັງທີ່ຕະຫຼາດເອີຣົບ, ຈຸດພິເສດຊາຂອງສະຫະກອນເປັນຊາທໍາມະຊາດລ້ວນໆ, ລາຄາຂາຍພາຍໃນ 50ກະລາມ 45 ພັນກີບ, ລາຄາຂາຍພາຍໃນ 1 ກິໂລ 5 ແສນກີບ, ກົງກັນຂ້າມ ລາຄາຂາຍຍົກ ຊື້ເປັນໂຕ່ນໆ 1 ກິໂລລະ ລາຄາຢູ່ລະຫວ່າງ 2 ແສນກີບ ຫາ 3 ແສນກີບ, ຄຽງຄູ່ກັບການຜະລິດສົ່ງອອກ, ລາຍຮັບພາຍໃນຄອບຄົວໜຶ່ງຕໍ່ 1 ເດືອນ 5-6 ລ້ານກີບ.
ທ່ານ ນາງ ປານແກ້ວ ແພງປັນຍາ ກ່າວຕື່ມວ່າ: ຄຽງຄູ່ກັບການຜະລິດດັ່ງກ່າວ ຍັງມີຂໍ້ຫຍຸ້ງຍາກ ຍ້ອນຂັ້ນຕອນການສົ່ງອອກ ແລະ ການເກັບອາກອນ ຢາກໃຫ້ມີການຍົກເວັ້ນອາກອນ ຫຼື ຈະເກັບໃນລາຄາທີ່ຕໍ່າ ຊຶ່ງເປັນການທີ່ໄດ້ຊ່ວຍເຫຼືອປະຊາຊົນ ກໍຄືສະຫະກອນຜູ້ປູກຊາ ເພາະວ່າ ຍັງເປັນສະຫະກອນນ້ອງໃໝ່, ສ່ວນຂໍ້ສະດວກ ແມ່ນ ຈໍານວນສະມາຊິກ ມີຄວາມດຸໝັ່ນໃນການກະສິກໍາ ຈຶ່ງຢຶດຖືເອົາອາຊີບປູກຝັງເປັນຕົ້ນຕໍ.
ດັ່ງນັ້ນ, ປະຊາຊົນລາວທຸກທົ່ວໜ້າ ຫາກວ່າ ພວກທ່ານ ພໍມີດິນຫວ່າງ ຢ່າປ່ອຍປະຮົກເຮື້ອໄວ້ ຈົ່ງນໍາໃຊ້ຕອນດິນເຫຼົ່ານັ້ນ ໃຫ້ເກີດປະໂຫຍດ ດ້ວຍການນໍາເອົາແນວພັນພືດ ໄປປູກໃສ່ ດັ່ງຄໍາສຸພາສິດ ກ່າວໄວ້ວ່າ: “ຢາກກິນໝາກ ໃຫ້ປູກຜົນ ຢາກເປັນຄົນ ໃຫ້ຮໍ່າຮຽນຄວາມຮູ້”
ຄໍາເຫັນ