ຊາວກະສິກອນເມືອງຫົງສາ ເກັບກ່ຽວເຂົ້ານາປີສຳເລັດແລ້ວ 53%

ຕາມການລາຍງານຂອງໜ່ວຍງານປູກຝັງ-ລ້ຽງສັດ ຫ້ອງການກະສິກຳ ແລະ ປ່າໄມ້ເມືອງຫົງສາ ແຂວງໄຊຍະບູລີ ໃນວັນທີ 26 ຕຸລາ ນີ້ວ່າ: ທົ່ວເມືອງຫົງສາ ມີເນື້ອທີ່ແຜນການປູກເຂົ້ານາປີ ທັງໝົດ 1.575,08 ເຮັກຕາ, ຄິດໄລ່ສະມັດຖະພາບ 4,5 ໂຕນຕໍ່ເຮັກຕາ. ໂດຍໃຊ້ແນວພັນ ເຂົ້າ 450 ປີ, ເຂົ້າຫອມຈັນ, ເຂົ້າໄກ່ນ້ອຍ, ເຂົ້າຕາກົບ, ເຂົ້າເລົ້າແຕກ, ເຂົ້າດໍລາຍ, ເຂົ້າດໍຂາວ, ເຂົ້າອ້າຍ ແລະ ອື່ນໆ ຊຶ່ງກາງເດືອນກັນຍາຜ່ານມາ, ຊາວກະສິກອນແມ່ນໄດ້ເລີ່ມຕົ້ນການເກັບກ່ຽວມ້ຽນມັດເຂົ້ານາປີຂອງຕົນດ້ວຍຄວາມຂຸ້ນຂ້ຽວ ແລະ ເຄັ່ງຮ້ອນ ເປັນຂະບວນຢ່າງກວ້າງຂວາງ. ທັງນີ້ ກໍເພື່ອເຮັດໃຫ້ທ່ວງທັນກັບລະດູການ ແລະ ຮັບປະກັນໄດ້ຕໍ່ການຕົກເຮ່ຍເສຍຫາຍ, ປັດຈຸບັນ ສາມາດເກັບກ່ຽວໄດ້ແລ້ວ 834,79 ຮຕ ເທົ່າ 53% ຂອງເນື້ອທີ່ທັງໝົດ. ຄຽງຄູ່ໄປພ້ອມກັນນັ້ນ ຍັງໄດ້ເກັບກູ້ພືດລະດູຝົນຢ່າງເປັນປົກກະຕິເຊັ່ນ: ເຂົ້າເນີນສູງ ເກັບກູ້ແລ້ວ 518,4 ເຮັກຕາ ເທົ່າກັບ 32%, ສາລີແຂງ ເກັບກູ້ສຳເລັດແລ້ວ 100%, ສາລີຫວານ ເກັບກູ້ສຳເລັດ 83%, ໝາກເດືອຍເກັບກູ້ແລ້ວ 592,2 ເຮັກຕາ ເທົ່າກັບ 40%, ໝາກງາ ເກັບກູ້ສຳເລັດແລ້ວ 100%, ຖົ່ວດິນເກັບກູ້ແລ້ວ 24,22 ເຮັກຕາ ເທົ່າກັບ 57%, ອ້ອຍ ເກັບກູ້ແລ້ວ 0,37 ເຮັກຕາ ເທົ່າກັບ 5%, ໝາກເຜັດເກັບກູ້ແລ້ວ 4,78 ເຮັກຕາ ເທົ່າກັບ 42% ເຮັກຕາ, ໝາກເຂືອ ເກັບກູ້ແລ້ວ 4,78 ເຮັກຕາ ເທົ່າກັບ 42%, ໝາກແຕງເກັບກູ້ແລ້ວ 5,77 ເທົ່າກັບ 77%, ເຜືອກ-ມັນ ເກັບກູ້ແລ້ວ 0,5 ເຮັກຕາ ເທົ່າກັບ 5% ແລະ ພືດຜັກຕ່າງໆ ເກັບກູ້ແລ້ວ 55,69 ເຮັກຕາ ເທົ່າກັບ 51%. 
ຕໍ່ກັບບັນຫາທີ່ພົບໃນໄລຍະທີ່ຜ່ານມາຂອງຊາວກະສິກອນພາຍໃນເມືອງແມ່ນໄພນໍ້າຖ້ວມ, ພ້ອມກັບສະພາບຝົນຕົກບໍ່ຖືກຕ້ອງຕາມລະດູການ ແລະ ຝົນຕົກຫຼາຍເກີນໄປ. ເຮັດໃຫ້ສະມັດຕະພາບຜົນຜະລິດບໍ່ໄດ້ດີເທົ່າທີ່ຄວນ.ຄາດວ່າການເກັບກ່ຽວເຂົ້ານາປີຂອງຊາວກະສິກອນພາຍໃນເມືອງຈະໃຫ້ສໍາເລັດ 100% ໃນທ້າຍເດືອນພະຈິກທີ່ຈະມາເຖິງນີ້. 
(ຂ່າວ-ພາບ: ກິດຕິສັກ ບົວໄລ)