ຊາວນະຄອນ-ຫຼວງພະບາງ ອັງເຊີນພະເຈົ້າໝ່ານລົງຫົດສົງ

ທຸກໆປີພາຍຫຼັງສຳເລັດການສະເຫຼີມສະຫຼອງບຸນກຸດສົງການປີໃໝ່ລາວ ຊາວນະຄອນ-ຫຼວງພະບາງ ແຂວງຫຼວງພະບາງ ໄດ້ອາລາດທະນາອົງພະໝ່ານ ຊຶ່ງເປັນອົງພະທີ່ສັກສິດອີກ 1 ອົງທີ່ປະຊາຊົນຊາວຫຼວງພະບາງໄດ້ໃຫ້ການເຄົາລົບນົບໄຫວ້ລົງຫົດສົງ ເພື່ອຂໍພອນໃນໂອກາດປີໃໝ່ລາວ. ພິທີໄດ້ຈັດຂຶ້ນໃນຕອນເຊົ້າວັນທີ 22 ເມສານີ້ ເລີ່ມຈາກພະເຖລະໄດ້ນຳພາຊາວພຸດທະສາສະນິກະຊົນ ກ່າວຄຳອາລາດທະນາອົງພະເຈົ້າໝ່ານຈາກຫໍພະໝ່ານລົງປະດິດສະຖານທີ່ຫໍສົງຂອງວັດຊຽງທອງ.
    ຈາກນັ້ນໄດ້ມີພິທີແຫ່ອ້ອມພັດທະສິມມາ 3 ຮອບ ແລ້ວອັງເຊີນອົງພະເຈົ້າໝ່ານຂຶ້ນປະທັບໃນຫໍສົງ ແລະພະສົງ-ສາມະເນນໄດ້ນຳພາຊາວພຸດທະສາສະນິກະຊົນກ່າວຄຳຄາລະວະ ຈຶ່ງດຳເນີນການຫົດສົງຢ່າງເປັນທາງການ. ອົງພະເຈົ້າໝ່ານສ້າງດ້ວຍທອງຄຳເນື້ອນົບພະເກົ້າ ຫຼືຄຳເນື້ອເກົ້າ ເປັນຄຳທີ່ງົດງາມ ແລະ ສູງຄ່າທີ່ສຸດ ປະດັບດ້ວຍອັນຍະມະນີນົບພະເກົ້າ ນ້ຳດີທີ່ສຸດທັ້ງ 9 ສີ ບໍລິເວນເຂັມຂັດສ້ອຍສັງວານ ຊາຍໄຫວ ແລະ ເຄື່ອງຊົງທັງອົງສ້າງຂຶ້ນໂດຍຄົນປະເທດພະມ້າ ຫຼັງຈາກສ້າງແລ້ວຈຶ່ງນຳຂຶ້ນມາລ່ອງແພໄປຕາມແມ່ນ້ຳຂອງເພື່ອກັບພະມ້າ ພໍຮອດບໍລິເວນເມືອງຫຼວງພະບາງອົງພະໄດ້ຢຸດ ແລະ ໝູນວົນນ້ຳເຮັດແນວໃດກໍ່ບໍ່ສາມາດດຶງແພໄປຕໍ່ໄດ້ ທະ ຫານພະມ້າໄດ້ດຶງຢູ່ຫຼາຍເທື່ອ ແຕ່ບໍ່ເກີດຜົນຜູ້ອັງເຊີນໄດ້ເຮັດການສັກກະລະ ແລະ ຕັ້ງຈິດອະທິຖານວ່າ “ຫາກອົງພະບໍ່ກັບສູ່ຫົງສາວະດີ ກໍຂໍໃຫ້ທ່ານເລືອກວັດທີ່ຈະຢູ່ເຖີດ, (ໃນຂະນະນັ້ນຫຼວງພະບາງມີຫຼາຍກວ່າ 100 ວັດ, ປັດຈຸບັນມີພຽງ 60 ກວ່າວັດ) ເຈົ້າອາວາດທຸກວັດໄດ້ມາອັງເຊີນ ມາອຸ້ມຂຶ້ນຈາກແມ່ນ້ຳຂອງ ແຕ່ກໍ່ບໍ່ມີວັດໃດສາມາດຍົກຂຶ້ນໄດ້ ມີພຽງເຈົ້າອາວາດວັດຊຽງທອງທີ່ຕັ້ງຈິດອະທິຖານ ທັນໃດນັ້ນສິ່ງທີ່ບໍ່ຄາດຝັນກໍ່ເກີດຂຶ້ນທ່ານອຸ້ມອົງພະຂຶ້ນຈາກນ້ຳໄດ້ຢ່າງປະຕິຫານ ແລະ ໄດ້ອັງເຊີນເຂົ້າວັດ ທັງເຮັດການສົມໂພດຢ່າງຍິ່ງໃຫຍ່ ແຕ່ຝົນກໍ່ຕົກລົງບໍ່ມີທີທ່າວ່າຈະຢຸດ ທ່ານຈຶ່ງທຳການສ້າງ “ຫໍພະໝ່ານ” ແລະ ເກັບລັອກຄວາມງົດງາມໄວ້ພາຍໃນ 365 ວັນຈຶ່ງນຳອອກມາພຽງ 3 ຫາ 7 ວັນເທົ່ານັ້ນ ແຕ່ຍາມໃດຝົນບໍ່ຕົກບ້ານເມືອງແຫ້ງແລ້ງຈະທຳການອັງເຊີນທ່ານມາສົງນ້ຳ ຝົນກໍ່ຈະຕົກຄືກັບປະຕິຫານ ອົງພະຫ້າມຜູ້ໃດຕ້ອງທ່ານ ແລະ ຫ້າມຂຶ້ນໄປຫໍພະໝ່ານເດັດຂາດ ພ້ອມທຳການສ້າງ “ຫໍພະໝ່ານ” ໄວ້ດ້ານຫຼັງຂອງພະອຸໂບສົດ ນັບແຕ່ປີພຸດທະສັກກະລາດ 2.493 ຈົນມາເຖິງປັດຈຸບັນ ຜະໜັງດ້ານຫຼັງວິຫານດ້ວຍສີບົວ ປະດັບດ້ວຍແວ່ນສີ ສະແດງເຖິງວິຖີຊີວິດຂອງຜູ້ຄົນ ມີຄວາມສວຍງາມແບບພື້ນບ້ານ ທີ່ເປັນເອກະລັກຂອງຫຼວງພະບາງ. 
    ໃນໂອກາດບຸນປີໃໝ່ລາວ ທຸກໆປີຈະມີການອັງເຊີນອົງພະໝ່ານມາໃຫ້ປະຊາຊົນຫົດສົງນ້ຳ ແລະ ກາບໄຫ້ວເປັນປະຈຳທຸກປີ, ສໍາລັບປີນີ້ການຫົດສົງອົງພະໝ່ານຈະດໍາເນີນຈົນເຖິງຕອນແລງຂອງວັນທີ 28 ເມສາຈຶ່ງ ສຳເລັດ, ນອກຈາກການຫົດສົງອົງພະໝ່ານໄດ້ມີການຕັ້ງກອງບຸນຂຶ້ນທີ່ວັດຊຽງທອງ ເພື່ອສົມທົບທຶນກໍ່ສ້າງຫ້ອງ ການອົງການພຸດທະສາສະໜາສໍາພັນລາວ (ອພສ) ແຂວງຫຼວງພະບາງ. ດັ່ງນັ້ນ, ຈຶ່ງຂໍເຊີນຊວນມວນຊົນ ພ້ອມດ້ວຍແຂກທັງພາຍໃນ ແລະ ຕ່າງປະເທດໄປຮ່ວມຫົດສົງອົງພະໝ່ານ ແລະ ຮ່ວມອະນຸໂມທະນາບຸນຕາມກຳລັງສັດທາ. ຂ່າວ: ຫຼວງພະບາງ