ຊາວໜຸ່ມຈາກ 5 ປະເທດ ຊະນະໂຄງການຜູ້ປະກອບການໄວໜຸ່ມເພື່ອສັງຄົມ

ເມື່ອບໍ່ດົນມານີ້, ຜູ້ປະກອບການເພື່ອສັງຄົມ ຈໍານວນ 6 ທີມ ຈາກ 5 ປະເທດ ປະກອບມີ: ສປ ຈີນ, ອິນເດຍ, ອິນໂດເນເຊຍ, ສປປ ລາວ ແລະ ສິງກະໂປ ໄດ້ຮັບຊະນະເລີດ ໃນໂຄງການຜູ້ປະກອບການໄວໜຸ່ມ ເພື່ອສັງຄົມ ທົ່ວໂລກ ປະຈໍາປີ 2023 ຊຶ່ງຈັດໂດຍມູນນິທິສາກົນສິງກະໂປ(SIF) ທີ່ປະເທດສິງກະໂປ ໂດຍທີມທີ່ຊະນະ ໄດ້ນໍາສະເໜີແນວຄວາມຄິດທາງທຸລະກິດທີ່ພົ້ນເດັ່ນທີ່ສຸດ ທີ່ສາມາດແກ້ໄຂສາເຫດທາງດ້ານສັງຄົມ ແລະ ສິ່ງແວດລ້ອມ ລວມທັງການບໍລິການທາງສຸຂະພາບຈິດ, ການອະນຸລັກນໍ້າ, ການສະໜອງທັກສະ ແລະ ເຕັກໂນໂລຊີ ສໍາລັບຊຸມຊົນທີ່ຂາດແຄນ ແລະ ການສ້າງຄວາມເຂັ້ມແຂງໃຫ້ແກ່ແມ່ຍິງ.
ທ່ານ ລຽນ ວີ ແຈວ (Lian Wee Cheow) ຮອງປະທານ ມູນນິທິເອັສໄອເອັຟ ແລະ ເປັນຫົວໜ້າຄະນະກຳມະການໂຄງການຜູ້ປະກອບການໄວໜຸ່ມເພື່ອສັງຄົມ (Young Social Entrepreneurs, YSE)ໄດ້ກ່າວວ່າ: ນັບຕັ້ງແຕ່ປີ 2010, ໂຄງການຜູ້ປະກອບການໄວໜຸ່ມ ເພື່ອສັງຄົມທົ່ວໂລກ ໄດ້ສະໜັບສະໜູນເຄືອຂ່າຍທີ່ກໍາລັງເຕີບໃຫຍ່ຂະຫຍາຍຕົວ ໃນປັດຈຸບັນປະກອບມີຊາວໜຸ່ມຫຼາຍກວ່າ 1.400 ຄົນຈາກ 43 ປະເທດຊຶ່ງເປັນຕົວແທນຂອງວິສາຫະກິດ ເພື່ອສັງຄົມ ເຖິງ 674 ແຫ່ງ ໂດຍການໃຫ້ຄໍາແນະນໍາ, ກອງປະຊຸມການສ້າງຄວາມອາດສາມາດ ແລະ ໂອກາດໃນການຮຽນຮູ້ໃນພາກພື້ນ, ໂຄງການດັ່ງກ່າວໄດ້ສະໜັບສະໜູນກຸ່ມທີ່ກໍາລັງຈະເປັນຜູ້ປະກອບການເພື່ອສັງຄົມ ເພື່ອເລີ່ມຕົ້ນການເດີນທາງຂອງພວກເຂົາ.
ທ່ານ ອີຣິກ ຈວາ (Eric Chua) ເລຂາທິການລັດຖະສະພາອາວຸໂສ ກະຊວງວັດທະນະທຳ, ຊຸມຊົນ ແລະ ຊາວໜຸ່ມ, ກະຊວງພັດທະນາສັງຄົມ ແລະ ຄອບຄົວ ສິງກະໂປ ໄດ້ກ່າວວ່າ: ທີມເຫຼົ່ານີ້ ໄດ້ສຸມເຫື່ອແຮງໃສ່ບັນຫາຕ່າງໆທາງສັງຄົມທີ່ພວກເຂົາສົນໃຈຢ່າງເລິກເຊິ່ງ ໂດຍໄດ້ນໍາສະເໜີແນວຄວາມຄິດທີ່ໜ້າສົນໃຈຫຼາຍ. ຈາກການເຂົ້າເຖິງການບໍລິການສຸຂະພາບຈິດ, ການຈັດຕັ້ງປະຕິບັດແບບຍືນຍົງ, ຄວາມສະເໝີພາບດ້ານການສຶກສາ ແລະ ການສະໜັບສະໜູນຊຸມຊົນທີ່ມີຄວາມສ່ຽງ ຊຶ່ງຫຼາຍຄົນໄດ້ເວົ້າຢ່າງກະຕືລືລົ້ນ ຕໍ່ກັບການສ້າງການປ່ຽນແປງທີ່ມີຄວາມໝາຍໃນສັງຄົມ ແລະ ມີຄວາມປະທັບໃຈ ໃນຄວາມຕ້ອງການທີ່ຈະຮັບໃຊ້ຄົນອື່ນ ແລະ ການອຸທິດຕົນຂອງພວກເຂົາໃນການເບິ່ງໂລກກວ້າງໃນປັດຈຸບັນ ເພື່ອປະດິດສ້າງວິທີການແກ້ໄຂສໍາລັບຊຸມຊົນໂດຍລວມ. 
ທ່ານ ນາງ ມະນີທິບ ວົງພະຈັນ ຜູ້ຮ່ວມກໍ່ຕັ້ງ ເລີລາວ (LeLao) ຈາກປະເທດລາວ ໄດ້ກ່າວວ່າ: ໂຄງການໄດ້ແນະນຳຂ້າພະເຈົ້າ ໃຫ້ຮູ້ຈັກກັບເຄືອຂ່າຍຂອງໝູ່ເພື່ອນ ທີ່ມີແນວຄວາມຄິດແບບດຽວກັນໃນທົ່ວໂລກ ຜູ້ທີ່ກໍາລັງເຮັດວຽກທີ່ໜ້າສົນໃຈ ເພື່ອສ້າງຄວາມແຕກຕ່າງໃນທາງທີ່ດີຕໍ່ສັງຄົມ. ພາກສ່ວນທີ່ມັກທີ່ສຸດຂອງໂຄງການແມ່ນເວລາທີ່ພວກເຮົາໄດ້ແລກປ່ຽນຄວາມຄິດ ແລະ ຮຽນຮູ້ຂໍ້ມູນໃໝ່ໆກ່ຽວກັບຊຸມຊົນຂອງພວກເຮົາ ຊຶ່ງໄດ້ຮັບແຮງບັນດານໃຈເພີ່ມຂຶ້ນ ເພື່ອສືບຕໍ່ເຮັດວຽກຂອງພວກເຮົາໃນການເສີມສ້າງຄວາມເຂັ້ມແຂງ ໃຫ້ກັບຊຸມຊົນທີ່ມີຄວາມສ່ຽງ ໂດຍຜ່ານແຟຊັ່ນແບບນິເວດ. ພະນັກງານຂອງ ເລີລາວ ໄດ້ສ້າງຜະລິດຕະພັນແຟຊັນ ທີ່ມີລາຄາສົມເຫດສົມຜົນ ແລະ ຍືນຍົງ ທີ່ນຳເອົາສິ່ງເສດເຫຼືອຈາກຜ້າມາໃຊ້ຄືນ ແລະ ຜະລິດຕະພັນດັ່ງກ່າວ ໄດ້ຖືກອອກແບບ ເພື່ອສະແດງເຖິງມໍລະດົກວັດທະນະທຳ ຂອງລາວທີ່ອຸດົມສົມບູນ.
ທີມຊະນະເລີດທີ່ໄດ້ຮັບການປະກາດໃນໂຄງການ YSE GLOBAL ປະຈໍາປີ 2023 - ການນໍາສະເໜີເພື່ອການປ່ຽນແປງ6 ໃນ 15 ທີມທີ່ໄດ້ຖືກຄັດເລືອກ ໄດ້ຮັບການປະກາດເປັນຜູ້ຊະນະເລີດໃນເວລາທີ່ພວກເຂົາເຂົ້າຮ່ວມ ການນໍາສະເໜີເພື່ອການປ່ຽນແປງ ອອນລາຍ  ພວກເຂົາໄດ້ຖືກຄັດເລືອກໂດຍອີງໃສ່ຜົນກະທົບ ແລະ ຂະໜາດຂອງແນວຄວາມຄິດທຸລະກິດຂອງພວກເຂົາ, ລວມທັງລະດັບຄວາມມຸ່ງໝັ້ນຂອງພວກເຂົາ. ທີມທີ່ຖືກຄັດເລືອກລວມມີ (ຕາມລໍາດັບຕົວອັກສອນພາສາອັງກິດ):

1. ອານຸບູຕີ ຊາມິຕີ (Anubhuti Samiti) (ປະເທດອິນເດຍ)
2. ໄຊນາ ຮາວ (China House) (ປະເທດຈີນ)
3. ໂຮມພາວ (HomePal) (ປະເທດສິງກະໂປ ແລະ ຈີນ)
4. ເລີລາວ (LeLao) (ປະເທດລາວ)
5. ຣີເສີໂວແອ (ReservoAir) (ປະເທດອິນໂດເນເຊຍ)
6. ຣູມາ ບຣີເກັດ (Rumah Briket) (ປະເທດອິນໂດເນເຊຍ)

ແຕ່ລະທີມໄດ້ຮັບລາງວັນເງິນທຶນສູງເຖິງ 20.000 ໂດລາສິງກະໂປ ເພື່ອນຳສະເໜີ ຫຼື ຂະຫຍາຍທຸລະກິດເພື່ອສັງຄົມຂອງພວກເຂົາ. ທີ່ປຶກສາອາສາສະໝັກຈະຖືກມອບໝາຍເພື່ອແນະນຳວິທີການນຳໃຊ້ເງິນທຶນ ແລະ ສະໜັບສະໜູນການພັດທະນາຂອງພວກເຂົາໃນອີກ 1 ປີເຄິ່ງ.
(ຂ່າວ-ພາບ:ນາງ ເນັດສີ ນັສຣດິນ)