ຄະນະພັກ, ອົງການປົກຄອງແຂວງເຊກອງ ໄດ້ມີການຫ້າງຫາກະກຽມສະເຫຼີມສະຫຼອງວັນສ້າງຕັ້ງແຂວງ ເຊກອງ ຄົບຮອບ 40 ປີ (14 ເມສາ 1984-14 ເມສາ 2024) ໂດຍຈະຈັດຫຼາຍກິດຈະກໍາຢ່າງຄຶກຄື້ນ ແລະ ມີຄວາມໝາຍສໍາຄັນເລິກຊຶ່ງ ເພື່ອຮອງຮັບນັກທ່ອງທ່ຽວ ມາທ່ຽວຊົມ.
ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ໃຫ້ສໍາພາດຕໍ່ນັກຂ່າວແຂວງເມື່ອບໍ່ດົນມານີ້ວ່າ: ສໍາລັບກິດຈະກໍາຕ່າງໆທີ່ຈະຈັດຂຶ້ນໃນໂອກາດສະເຫຼີມສະຫຼອງວັນສ້າງຕັ້ງແຂວງ ຄົບຮອບ 40 ປີ. ນອກຈາກ, ຈະມີພິທີສະເຫຼີມ ສະຫຼອງໃຫຍ່ຊຶ່ງຈະຈັດຂຶ້ນໃນວັນທີ 4 ເມສາ 2024 ຍັງຈະມີຫຼາຍກິດຈະກໍາທີ່ສໍາຄັນປິ່ນອ້ອມຄື: ງານວາງສະແດງ-ຈໍາໜ່າຍສິນຄ້າ ໂດຍມີສິນຄ້າທີ່ມາຈາກຫຼາຍພາກສ່ວນທັງພາຍໃນ ແລະ ຕ່າງປະເທດ; ງານວາງສະແດງຮູບພາບ 40 ປີ, ຜົນງານການເຄື່ອນໄຫວຂອງບັນດາຂະແໜງການຕ່າງໆພາຍໃນແຂວງ, ງານປະກວດນາງສາວເຊກອງ (ນາງສັງຂານ) ປີ 2024, ງານປະກວດສິລະປະ-ວັນນະຄະດີ; ກອງປະຊຸມພົບປະແລກປ່ຽນເພື່ອສົ່ງເສີມການລົງທຶນ 5 ແຂວງ 3 ປະເທດ ຄື: ແຂວງເຊກອງ, ຈໍາປາສັກ ສປປ ລາວ; ແຂວງກວາງນາມ, ດາໜັງ ສສ ຫວຽດນາມ ແລະ ແຂວງອຸບົນຣາຊະທານີ ຣາຊະອານາຈັກໄທ. ພ້ອມນີ້, ຍັງຈະມີກອງປະຊຸມພົບປະສອງຝ່າຍ ລະຫວ່າງ ແຂວງເຊກອງ ກັບ ແຂວງອຸບົນຣາຊະທານີ. ພິເສດໃນມື້ສະເຫຼີມສະຫຼອງໃຫຍ່ຈະມີການສະແດງໂດດຈ້ອງ; ຮອງເພງໂຊ, ສະແດງຄອນເສີດ, ສິລະປະກ້ອນກໍາລັງ ແລະ ສະແດງກາຍະສິນ.
ໃນໂອກາດນີ້, ທ່ານເຈົ້າແຂວງເຊກອງ ຍັງໄດ້ຮຽກຮ້ອງມາຍັງສະມາຊິກພັກ, ພະນັກງານ ແລະ ປະຊາຊົນບັນດາເຜົ່າຊາວແຂວງເຊກອງ ຈົ່ງຕັ້ງໜ້າ ແລະ ສາມັກຄີກັນເຂົ້າຮ່ວມຂະບວນການຕ່າງໆ ເປັນຕົ້ນແມ່ນຂະບວນການອະນາໄມ 3 ສະອາດ; ຂະບວນການຮັກສາຄວາມສະຫງົບປອດໄພ ແລະ ອື່ນໆ ເພື່ອຕ້ອນຮັບແຂກ ກໍຄື ນັກທ່ອງທ່ຽວທັງພາຍໃນ ແລະ ຕ່າງປະເທດ ທີ່ມາທ່ຽວຊົມໃນງານດັ່ງກ່າວໃຫ້ມີຄວາມປະທັບໃຈ.
(ຂ່າວ: ແຂວງເຊກອງ)
ຄໍາເຫັນ