ພິທີປະກາດການໃຫ້ອະໄພຍະໂທດຫຼຸດຜ່ອນໂທດ ແລະ ປ່ອຍຕົວນັກໂທດທີ່ໄດ້ຮັບອະໄພຍະໂທດ ເນື່ອງໃນໂອກາດວັນຊາດທີ 2 ທັນວາ ຄົບຮອບ 48 ປີໄດ້ຈັດຂຶ້ນໃນວັນທີ 26 ທັນວາຜ່ານມາ ທີ່ຄ້າຍຂຸມຂັງ-ດັດສ້າງແຂວງເຊກອງໂດຍມີທ່ານ ຄໍາບາງ ພະສະແຫວງ ຫົວໜ້າອົງການໄອຍະການປະຊາຊົນແຂວງຮອງປະທານຄະນະກໍາມະການອະໄພຍະໂທດຂັ້ນແຂວງ, ມີທ່ານ ພັນເອກ ທະວີສັກ ເພັດພູຫຼວງ ຮອງຫົວໜ້າກອງບັນຊາການປ້ອງກັນຄວາມສະຫງົບ(ປກສ) ແຂວງ,ມີຄະນະກໍາມະການອະໄພຍະໂທດຂັ້ນແຂວງພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ພັນໂທ ມູນສະຫວັດ ສີລິວັດ ຮອງຫົວໜ້າຄ້າຍຂຸມຂັງ-ດັດສ້າງໄດ້ຜ່ານບົດສະຫຼຸບຕີລາຄາໂດຍຫຍໍ້ກ່ຽວກັບການຈັດຕັ້ງປະຕິບັດວຽກງານອະໄພຍະໂທດປະຈໍາປີ 2023 ແລະ ວາງທິດທາງແຜນການວຽກງານຈຸດສຸມປີ 2024. ຫຼັງຈາກນັ້ນ, ທ່ານ ພັນເອກ ທະວີສັກ ເພັດພູຫຼວງ ໄດ້ຜ່ານລັດຖະດໍາລັດຂອງປະທານປະເທດ ສະບັບເລກທີ 219/ປປທ, ລົງວັນທີ 21 ພະຈິກ 2023ວ່າດ້ວຍການໃຫ້ອະໄພຍະໂທດແກ່ນັກໂທດທີ່ມີຄວາມກ້າວໜ້າໃນຂອບເຂດທົ່ວປະເທດເນື່ອງໃນໂອກາດວັນຊາດທີ 2 ທັນວາ 2023 ຄົບຮອບ 48 ປີ.
ທ່ານນາງ ແກ້ວອຸດອນ ເຜິ້ງແກ້ວມະນີ ຫົວໜ້າຂະແໜງຕິດຕາມກວດກາຄ້າຍຄຸມຂັງ-ດັດສ້າງແຂວງ ກ່າວວ່າ: ແຂວງເຊກອງມີນັກໂທດທີ່ມີເງື່ອນໄຂໄດ້ຮັບການອະໄພຍະໂທດຫຼຸດຜ່ອນໂທດ ແລະ ປ່ອຍຕົວນັກໂທດທັງໝົດ19 ຄົນ, ຍິງ 0 ຄົນ, ໃນນີ້, ຜູ້ໄດ້ຮັບການອະໄພຍະໂທດຫຼຸດຜ່ອນໂທດທັງໝົດ 9 ຄົນ, ນັກໂທດທີ່ມີເງື່ອນໄຂໄດ້ຮັບການອະໄພຍະໂທດປ່ອຍຕົວທັງໝົດ 10 ຄົນຊຶ່ງບຸກຄົນດັ່ງກ່າວມີຄວາມກ້າວໜ້າປະພຶດດີຈຶ່ງມີການໃຫ້ອະໄພຍະໂທດຕໍ່ບຸກຄົນທີ່ຫຼົງຜິດມີຄວາມຮູ້ສຶກກິນແໜງແຄງໃຈຕໍ່ການກະທຳຜິດຂອງຕົນ ແລະ ມີຄວາມຈິງໃຈໃຊ້ແທນຄ່າເສຍຫາຍ, ຄ່າປັບໃໝຕາມຄຳຕັດສິນຂອງສານ.
ໂອກາດນີ້, ທ່ານ ຄໍາບາງ ພະສະແຫວງ ໄດ້ມອບໃບຢັ້ງຢືນການໃຫ້ອະໄພຍະໂທດຫຼຸດຜ່ອນໂທດ ແລະ ປ່ອຍຕົວນັກໂທດໃຫ້ແກ່ນັກໂທດຈຳນວນດັ່ງກ່າວ.ພ້ອມນີ້ທ່ານໄດ້ເນັ້ນໃຫ້ນັກໂທດແຕ່ລະຄົນສືບຕໍ່ເປັນເຈົ້າການຝຶກຝົນຫຼໍ່ຫຼອມຕົນເອງໃຫ້ກາຍເປັນຄົນດີ, ປະຕິບັດກົດລະບຽບຂອງຄ້າຍຂຸມຂັງ-ດັດສ້າງ ແລະ ລະບຽບກົດໝາຍຂອງພັກ-ລັດວາງອອກຢ່າງເຂັ້ມງວດ. ເພື່ອສ້າງຕົນເອງໃຫ້ກາຍເປັນພົນລະເມືອງທີ່ດີ, ມີຄວາມກ້າວໜ້າເພື່ອໃຫ້ໄດ້ຮັບນະໂຍບາຍການອະໄພຍະໂທດໃນປີຕໍ່ໄປ.ສໍາລັບນັກໂທດຜູ້ທີ່ໄດ້ຮັບອະໄພຍະໂທດປ່ອຍຕົວພາຍຫຼັງພົ້ນໂທດ ແລະ ຖືກປ່ອຍຕົວແລ້ວຈົ່ງປະຕິບັດຕົນໃຫ້ກາຍເປັນລູກທີ່ດີຂອງພໍ່-ແມ່, ເປັນພົນລະເມືອງດີຂອງຊາດ, ຕັ້ງໜ້າພັດທະນາຊີວິດການເປັນຢູ່ຂອງຄອບຄົວໃຫ້ຖືກຕ້ອງຕາມແນວທາງນະໂຍບາຍຂອງພັກ-ລັດ, ຫ້າມໄປເຄື່ອນໄຫວສິ່ງທີ່ບໍ່ດີທີ່ຜິດຕໍ່ລະບຽບກົດໝາຍບ້ານເມືອງ, ຕັ້ງໜ້າພັດທະນາຊີວິດການເປັນຢູ່ຂອງຄອບຄົວໃຫ້ຖືກຕ້ອງຕາມແນວທາງນະໂຍບາຍຂອງພັກ-ລັດ, ປະກອບສ່ວນປົກປັກຮັກສາ ແລະສ້າງສາພັດທະນາປະເທດຊາດໃຫ້ຈະເລີນກ້າວໜ້າ.
ຂ່າວ-ພາບ: ພຸດທະສອນ
ຫຼວງນໍ້າທາ ພົ້ນເດັ່ນການອະນຸລັກຟື້ນຟູສົ່ງເສີມຄຸນຄ່າວັດທະນະທໍາທ້ອງຖິ່ນ
ຫຼວງນໍ້າທາມີທ່າແຮງຫຼາຍດ້ານ ໂດຍສະເພາະວຽກງານວັດທະນະທໍາ ພົ້ນເດັ່ນໃນການອະນຸລັກຮັກສາ, ຟື້ນຟູ ແລະ ສົ່ງເສີມຄຸນຄ່າທາງວັດທະນະທໍາຂອງທ້ອງຖິ່ນໃຫ້ຍືນຍົງ ຄຽງຄູ່ກັບການພັດທະນາ.
ຄໍາເຫັນ