ເຊກອງ ເຜີຍແຜ່ນິຕິກຳວຽກງານຂະບວນການແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ

ທ່ານ ນາງ ຂັນທະລີ ວັນລະເບືອມ ຮອງຫົວໜ້າຄະນະຈັດຕັ້ງແຂວງ ໄດ້ເຜີຍແຜ່ນິຕິກຳວຽກງານຍ້ອງຍໍເລກທີ 03, 04/ພນ, ລົງວັນທີ 27 ທັນວາ ຂອງກະຊວງພາຍໃນ ກ່ຽວກັບການຈັດຕັ້ງປະຕິບັດການແຂ່ງຂັນ ແລະ ຍ້ອງຍໍ, ແຈ້ງການແນະນໍາ ເລກທີ 47/ຄຈຂ, ລົງວັນທີ 27 ຕຸລາ 2025 ຂອງຄະນະຈັດຕັ້ງແຂວງ ກ່ຽວກັບການຄັດເລືອກຜົນງານຂະບວນການແຂ່ງຂັນ ຮັກຊາດ ແລະ ພັດທະນາ ໄລຍະ 5 ປີ (2021-2025) ພ້ອມທັງນໍາສະເໜີ ກ່ຽວກັບວຽກງານແຂ່ງຂັນ ແລະ ຍ້ອງຍໍ ຊຶ່ງການແຂ່ງຂັນ ແມ່ນການເຄື່ອນໄຫວທີ່ມີການຈັດຕັ້ງ ຂອງບຸກຄົນ, ນິຕິບຸກຄົນ ແລະ ການຈັດຕັ້ງຕ່າງໆ ເພື່ອປຸກລະດົມເຕົ້າໂຮມກຳລັງແຮງແຂ່ງຂັນ, ເສີມຂະຫຍາຍຫົວຄິດປະດິດສ້າງ, ຈັດຕັ້ງ ແລະ ປະຕິບັດໜ້າທີ່ວຽກງານ, ສ້າງຜົນງານດີເດັ່ນ ປະກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ. ຈາກນັ້ນ, ກໍໄດ້ຜັນຂະຫຍາຍແຈ້ງການຂອງຄະນະຈັດຕັ້ງສູກາງພັກ ສະບັບລົງວັນທີ 11 ກັນຍາ 2025 ກ່ຽວກັບການຄັດເລືອກເປົ້າໝາຍ ທີ່ຈະໄດ້ຮັບຫຼຽນກາລະນຶກ 50 ປີ ວັນສະຖາປະນາ ສປປ ລາວ; ມີການແນະນໍາວິທີການປະກອບເອກະສານຍ້ອງຍໍ, ການຊຸກຍູ້ ແລະ ປະເມີນຜົນຂະບວນການແຂ່ງຂັນຮັກຊາດ, ສ້າງບ້ານພັດທະນາ ໃຫ້ທັນກັບກໍານົດເວລາ ແລະ ຜູ້ເຂົ້າຮ່ວມ ກໍໄດ້ແລກປ່ຽນບົດຮຽນ, ແລກປ່ຽນຄໍາເຫັນ, ມີການຊັກຖາມ ແລະ ແກ້ຂໍ້ຂ້ອງໃຈ ເພື່ອເຮັດໃຫ້ການຄັດເລືອກປະເມີນຍ້ອງຍໍຖືກຕ້ອງ ສອດຄ່ອງ ກັບການຈັດຕັ້ງປະຕິບັດວຽກງານຕົວຈິງໃນແຕ່ລະໄລຍະ.

ທ່ານ ນາງ ສີສະຫງ່າ ແກ້ວດວງດີ ໄດ້ເນັ້ນໜັກໃຫ້ຄະນະພັກ, ຄະນະນໍາ ແລະ ຄະນະຮັບຜິດຊອບວຽກງານແຂ່ງຂັນ ແລະ ຍ້ອງຍໍ ແຕ່ລະຂັ້ນ ຕ້ອງໄດ້ຄົ້ນຄວ້າ, ເຊື່ອມຊຶມບັນດາມະຕິ, ຄໍາສັ່ງ, ຄໍາແນະນໍາຕ່າງໆຂອງຂັ້ນເທິງ, ກຳແໜ້ນ ແລະ ເຊື່ອມຊຶມຢ່າງເລິກເຊິ່ງບັນດາຮູບການ ແລະ ວິທີການໃນການຈັດຕັ້ງປະຕິບັດ ຕ້ອງເກັບກຳ ແລະ ຢັ້ງຢືນຜົນງານຂອງບຸກຄົນ, ກົມກອງລວມໝູ່ ໃຫ້ມີຄວາມຊັດເຈນ, ຄົ້ນຄວ້າ, ເລືອກເຟັ້ນ ໃຫ້ໄດ້ບຸກຄົນ, ກົມກອງທີ່ດີເດັ່ນຖືກຕ້ອງ ເປັນຈິງ; ພ້ອມນີ້ ກໍໃຫ້ສະຫຼຸບລາຍງານຜົນການປະເມີນເພື່ອສະເໜີການຍ້ອງຍໍ ໃຫ້ທ່ວງທັນກັບກຳນົດເວລາ.

(ຂ່າວ: ພຸດທະສອນ)