 |
ທ່ານ ນາງ ມະໂນລາ ສຸດທິຈັກ ກຳມະການພັກແຂວງຄະນະບໍລິຫານງານສູນກາງສະຫະພັນແມ່ຍິງລາວ ປະທານສະຫະພັນແມ່ຍິງແຂວງ ໄດ້ຍົກໃຫ້ເຫັນເຖິງຕົ້້ນກໍາເນີດ ແລະ ຄວາມເປັນມາຂອງວັນແມ່ຍິງສາກົນ ວັນທີ 8 ມີນາ, ຊຶ່ງກໍາເນີດເກີດຂຶ້ນໃນທ່າມກາງສະພາບຄວາມຫຍຸ້ງຍາກສັບສົນ ແມ່ຍິງຖືກກົດຂີ່ຂູດຮີດ ຈາກນາຍຈ້າງ,ເຮັດວຽກໜັກ ມື້ໜຶ່ງ 16-17 ຊົ່ວໂມງ ໂດຍບໍ່ມີມື້ພັກ; ເຮັດໃຫ້ແມ່ຍິງ ຢູ່ປະເທດຕ່າງໆ ລຸກຂຶ້ນຕໍ່ສູ້ ຢ່າງເປັນຂະບວນ. ສະນັ້ນ, ແມ່ຍິງຈິ່ງພາກັນ ລຸກຂຶ້ນປະທ້ວງ ດ້ວຍຫຼາຍຮູບການເປັນຕົ້ນ: ນັດຢຸດງານປະທ້ວງ, ທວງໃຫ້ນາຍຈ້າງ ຫຼຸດເວລາການເຮັດວຽກລົງ, ຍັງເຫຼືອ ມື້ລະ 8 ຊົ່ວໂມງ, ຕໍ່ມາໃນວັນທີ 8 ມີນາ ປີ 1910 ຄວາມພະຍາຍາມ ຂອງພວກແມ່ຍິງ ກໍໄດ້ຂະຫຍາຍໄປໃນວົງກວ້າງ ໄປສູ່ປະເທດຕ່າງໆ.ຈາກນັ້ນ, ກອງປະຊຸມແມ່ຍິງສາກົນ ທີ່ນະຄອນ ໂຄເປັນຮາກ (Copenhagen) ປະເທດ ເດັນມາກ (Denmark). ຈິ່ງໄດ້ປະກາດ ຮັບຮອງເອົາ ຂໍ້ຮຽກຮ້ອງ ຂອງບັນດາ ກໍາມະກອນຍິງ ທີ່ໃຫ້ຫຼຸດເວລາເຮັດວຽກລົງ, ເຫຼືອມື້ລະ 8 ຊົ່ວໂມງ, ຈາກວັນດັ່ງກ່າວນັ້ນ ເພິ່ນຈິ່ງກໍານົດເອົາວັນທີ 8 ມີນາ ຂອງທຸກໆປີ ເປັນວັນແມ່ຍິງສາກົນ.
 |
ໂອກາດນີ້ ທ່ານ ສີສຸພັນ ມະຫາວົງ ໄດ້ໂອ້ລົມ ແລະໃຫ້ທິດຊີ້ນໍາຕໍ່ຄະນະບໍລິຫານງານ, ຄະນະຮາກຖານ, ຄະນະໜ່ວຍສະຫະພັນແມ່ຍິງແຕ່ລະຂັ້ນ ຈົ່ງສືບຕໍ່ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ສະມາຊິກແມ່ຍິງ, ແມ່ຍິງບັນດາເຜົ່າ ທີ່ຢູ່ໃນຄວາມຮັບຜິດຊອບຂອງຕົນ ຮັກສາໄດ້ມູນເຊື້ອອັນດີງາມຂອງສະຫະພັນແມ່ຍິງລາວ ເພື່ອສ້າງໃຫ້ແມ່ຍິງມີຄຸນທາດການເມືອງທີ່ໜັກແໜ້ນ, ປະຕິບັດໜ້າທີ່ວຽກງານ ທີ່ຂັ້ນເທິງມອບໝາຍໃຫ້ບັນລຸຜົນສໍາເລັດຕາມຄາດໝາຍ; ສືບຕໍ່ປັບປຸງການຈັດຕັ້ງ ຄະນະສະຫະພັນແມ່ຍິງແຕ່ລະຂັ້ນ ໃຫ້ນັບມື້ນັບເຂັ້ມແຂງ, ຄະນະສະຫະພັນແມ່ຍິງແຕ່ລະຂັ້ນ ຕະຫຼອດຮອດສະມາຊິກແມ່ຍິງ ຈະຕ້ອງເອົາໃຈໃສ່ ແລະ ເປັນເຈົ້າການໃນການພັດທະນາຕົນເອງ ທາງດ້ານຄວາມຮູ້, ຄວາມສາມາດ ເພື່ອປະກອບສ່ວນເຂົ້າໃນການພັດທະນາວຽກງານແມ່ຍິງ ກໍຄືການພັດທະນາວຽກງານຂອງຕົນຮັບຜິດຊອບໃຫ້ເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ, ຄະນະສະຫະພັນແມ່ຍິງແຕ່ລະຂັ້ນ ຕ້ອງຖືເອົາຂໍ້ແຂ່ງຂັນ 3 ດີຕິດພັນກັບຂະບວນເຄື່ອນໄຫວວຽກງານດ້ານວິຊາສະເພາະ ຂອງຕົນ ເພື່ອເປັນການປະກອບສ່ວນເຂົ້າໃນການຕ້ານ ແລະ ແກ້ໄຂປະກົດການຫຍໍ້ທໍ້ ທີ່ເກີດຂຶ້ນກັບແມ່ຍິງ, ຄອບຄົວ ແລະ ສັງຄົມໃຫ້ນັບມື້ນັບດີຂຶ້ນ ແລະສືບຕໍ່ຊຸກຍູ້ຂະບວນການອື່ນໆ ໃຫ້ດີຂຶ້ນເປັນກ້າວໆ.
 |
(ຂ່າວ: ພຸດທະສອນ)
ຄໍາເຫັນ