ພິທີປະກາດແຕ່ງຕັ້ງຮອງປະທານຄະນະກຳມະການປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ) ແຂວງເຊກອງ ຈັດຂຶ້ນໃນວັນທີ 6 ພະຈິກ ຜ່ານມາທີ່ໂມສອນຫ້ອງວ່າການແຂວງເຊກອງ ພາຍໃຕ້ການເປັນປະທານຂອງ ສະຫາຍ ພົຕ ຈັນທອງ ສອນຕະອາດ ກຳມະການຄະນະກຳມະການ ປກຊ-ປກສ ສູນກາງ ຮອງລັດຖະມົນຕີກະຊວງປ້ອງກັນປະເທດ ໂດຍມີສະຫາຍ ເຫຼັກໄຫຼ ສີວິໄລ ປະທານ ປກຊ-ປກສ ແຂວງ ເຈົ້າແຂວງເຊກອງກໍາມະການຄະນະກໍາມະການ ປກຊ-ປກສ ຂັ້ນແຂວງ, ມີຄະນະພັກ-ຄະນະບັນຊາ 2 ກຳລັງປະກອບອາວຸດ ແລະ ຂະແໜງການກ່ຽວຂ້ອງເຂົ້າຮ່ວມ.
ສະຫາຍ ພັອ ວຽງໄຊ ສີລິວົງ ຮອງຫົວໜ້າຫ້ອງການຄະນະກຳມະການ ປກຊ-ປກສ ສູນກາງ ຂຶ້ນຜ່ານມະຕິຕົກລົງຂອງຄະນະເລຂາທິການສູນກາງພັກ ສະບັບເລກທີ 450/ຄລສພ, ລົງວັນທີ 6 ຕຸລາ 202 ວ່າດ້ວຍການແຕ່ງຕັ້ງຮອງປະທານຄະນະກໍາມະການ ປກຊ-ປກສ ແຂວງເຊກອງ ໂດຍເຫັນດີແຕ່ງຕັ້ງສະຫາຍ ພັອ ຄຳບານ ພົມມະນີວົງ ເປັນຮອງປະທານຄະນະກຳມະການ ປກຊ-ປກສ ແຂວງເຊກອງ.
ສະຫາຍ ພົຈວ ທອງສີ ກຸນສະນະ ຮອງປະທານຄະນະກໍາມະການ ປກຊ-ປກສ ແຂວງເຊກອງ ໄດ້ລາຍງານວ່າ: ໃນໄລຍະຜ່ານມາ ຄະນະກໍາມະການ ປກຊ-ປກສ ແຂວງ ໄດ້ເອົາໃຈໃສ່ເຄື່ອນໄຫວ ແລະ ປະຕິບັດໜ້າທີ່ພາລະບົດບາດຂອງຕົນ ໂດຍຖືເອົາການສຶກສາອົບຮົມການເມືອງແນວຄິດ ພະນັກງານ, ສະມາຊິກພັກ ແລະ ປະຊາຊົນບັນດາເຜົ່າໃຫ້ຮັບຮູ້ເຂົ້າໃຈຢ່າງເລິກເຊິ່ງຕໍ່ແນວທາງການເມືອງ, ແຜນນະໂຍບາຍຂອງພັກ-ລັດ ແລະ ປະກອບສ່ວນເຂົ້າໃນການແກ້ໄຂບັນຫາປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມ ເປັນຕົ້ນ, ບັນຫາການບຸກລຸກຖາງປ່າຫວງຫ້າມ, ຄ້າ-ຂາຍເຖື່ອນ, ຊື້-ຂາຍ ແລະ ມົ້ວສຸມຢາເສບຕິດ, ຫຼິ້ນການພະນັນ, ຂີ້ລັກງັດແງະ, ອຸບັດເຫດ ແລະ ບັນຫາການຖືສາສະໜາ. ພ້ອມນີ້ ກໍໄດ້ເອົາໃຈໃສ່ປັບປຸງກໍ່ສ້າງກຳລັງ, ຈັດຕັ້ງຝຶກອົບຮົມຫັດແອບ, ຮ່ຳຮຽນການເມືອງ-ການທະຫານ ແລະ ວຽກງານວິຊາສະເພາະຢ່າງເປັນປົກກະຕິ. ໃນນີ້, ໄດ້ຈັດຝຶກອົບຮົມຫັດແອບວຽກງານ ປກຊ-ປກສ ໃຫ້ພະນັກງານການນໍາເປົ້າໝາຍ 3 ຊຸດທີ V; ອົບຮົມກໍ່ສ້າງນາຍສິບປະຈຳປີ 2023 ຈໍານວນ 1 ຊຸດ; ບໍາລຸງເລຂາ-ຮອງເລຂາ 1 ຊຸດ; ອົບຮົມກຸ່ມບ້ານທົງແຄນ ເມືອງກະລຶມ 1 ຊຸດ ແລະ ຫັນພະນັກງານສອງກໍາລັງລົງກໍ່ສ້າງຮາກຖານການເມືອງຢູ່ຮາກຖານ, ຊີ້ນຳກຳລັງຈັດຕັ້ງລະບົບປະຈຳການຕະຫຼອດ 24 ຊົ່ວໂມງ, ຈັດຕັ້ງກຳລັງອອກເຄື່ອນໄຫວ ແລະ ປ້ອງກັນເວນຍາມຕາມຄວາມຮັບຜິດຊອບຂອງບັນດາກົມກອງ, ປ້ອງກັນເວນຍາມວັນສໍາຄັນຂອງຊາດ, ຂອງພັກ, ຂອງທ້ອງຖິ່ນ ແລະ ການນໍາຂັ້ນສູງທີ່ເດີນທາງມາເຄື່ອນໄຫວເຮັດວຽກຢູ່ແຂວງເຊກອງມີຄວາມປອດໄພ 100%.
ໂອກາດນີ້, ສະຫາຍ ພົຕ ຈັນທອງ ສອນຕະອາດ ໄດ້ມີຄໍາເຫັນໂອ້ລົມ ແລະ ຊີ້ນໍາໃຫ້ຄະນະກໍາມະການ ປກຊ-ປກສ ແຂວງ ເພີ່ມທະວີວຽກງານສຶກສາອົບຮົມການເມືອງ-ແນວຄິດ, ສ້າງໃຫ້ພະນັກງານ, ສະມາຊິກພັກ ກໍຄື ປະຊາຊົນບັນດາເຜົ່າມີຄວາມຮັບຮູ້ເຂົ້າໃຈ, ມີຄວາມເປັນເອກະພາບຕໍ່ແນວທາງນະໂຍບາຍຂອງພັກ-ລັດ ແລະ ມີສ່ວນຮ່ວມໃນການເຄື່ອນໄຫວຈັດຕັ້ງປະຕິບັດວຽກງານ ປກຊ-ປກສ ໃຫ້ເປັນຂະບວນການກວ້າງຂວາງ ແລະ ແຂງແຮງ; ສືບຕໍ່ນໍາພາ-ຊີ້ນໍາວຽກງານການສ້າງພາລາທິການກັບທີ່, ຊຸກຍູ້ສົ່ງເສີມການປູກ-ການລ້ຽງໃຫ້ 2 ກໍາລັງມີຢູ່ມີກິນ, ປະຕິບັດຄໍາເວົ້າທີ່ວ່າ: ເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ; ສຸມໃສ່ແກ້ໄຂບັນຫາປະກົດການຫຍໍ້ທໍ້ທີ່ເກີດຂຶ້ນໃນສັງຄົມ ເປັນຕົ້ນ, ບັນຫາການຄ້າ-ຂາຍເຖື່ອນ, ມົ້ວສຸມຢາເສບຕິດ, ຫຼິ້ນການພະນັນ, ບັນຫາສາສະໜາ, ຂີ້ລັກງັດແງະ ແລະ ບັນຫາອຸບັດເຫດ; ເພີ່ມທະວີການພົວພັນຮ່ວມມື, ເອົາໃຈໃສ່ຮັກສາຄວາມສະຫງົບຕາມບໍລິເວນຊາຍແດນໃຫ້ມີຄວາມເປັນລະບຽບຮຽບຮ້ອຍ ເພື່ອສ້າງເງື່ອນໄຂເຮັດໃຫ້ແຂວງເຊກອງສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ, ປະຊາຊົນມີຄວາມສາມັກຄີປອງດອງ ແລະ ເສດຖະກິດ-ສັງຄົມຂະຫຍາຍຕົວກ້າວຂຶ້ນຢ່າງບໍ່ຢຸດຢັ້ງ.
ຂ່າວ: ສັນຍາ; ພາບ: ປກສ ແຂວງ
ສະມໍລບີ ສ້າງຂະບວນການອະນາໄມລວມ ແກ້ໄຂບັນຫາການຖິ້ມ-ຈູດຂີ້ເຫຍື້ອຊະຊາຍ
ບັນຫາການຖິ້ມຂີ້ເຫຍື້ອຊະຊາຍ ແລະ ການຈູດຂີ້ເຫຍື້ອໃນພື້ນທີ່ສາທາລະນະຍັງເປັນປະເດັນສໍາຄັນທີ່ສົ່ງຜົນກະທົບຕໍ່ສິ່ງແວດລ້ອມ, ສຸຂະພາບຂອງປະຊາຊົນເຂດໃກ້ຄຽງ ໂດຍສະເພາະການຖິ້ມໃສ່ພື້ນທີ່ ທີ່ເປັນດິນເປົ່າວ່າງ ປະຊາຊົນບາງກຸ່ມຍັງສວຍໂອກາດບໍ່ເຂົ້າຮ່ວມສັນຍາ. ບັນຫາດັ່ງກ່າວບໍ່ພຽງແຕ່ສະທ້ອນພຶດຕິກໍາສ່ວນບຸກຄົນ ແຕ່ຍັງສະທ້ອນຊ່ອງວ່າງທາງສັງຄົມ, ການສວຍໂອກາດ ແລະ ຄວາມບໍ່ເຂົ້າໃຈດ້ານການຮັບຜິດຊອບຕໍ່ສ່ວນລວມ.
ຄໍາເຫັນ