ເຊັນບົດບັນທຶກການຮ່ວມມືສ້າງຄວາມເຂັ້ມແຂງໃຫ້ແກ່ບຸກຄະລາກອນການທ່ອງທ່ຽວຂອງລາວ.

ຈຸດປະສົງຂອງການເຊັນບົດບັນທຶກຄັ້ງນີ້: ແມ່ນເພື່ອຮ່ວມກັນສົ່ງເສີມ ແລະ ສ້າງຄວາມເຂັ້ມແຂງໃຫ້ແກ່ບຸກຄະລາກອນການທ່ອງທ່ຽວຂອງລາວ; ເພື່ອຊຸກຍູ້ສົ່ງເສີມວຽກງານໂຄສະນາການທ່ອງທ່ຽວລາວໃຫ້ມີຄວາມເຂັ້ມແຂງ; ເພື່ອຈັດຕັ້ງໂຄງການແລກປ່ຽນວຽກງານທ່ອງທ່ຽວ ແລະ ນັກວິຊາການທ່ອງທ່ຽວເຊິ່ງກັນ ແລະ ກັນ.

ພ້ອມນີ້, ຍັງຈະຮ່ວມມືກັນທາງດ້ານວິຊາການ ໂດຍມີຂອບເຂດຄວາມຮ່ວມມືຄື: ຮ່ວມກັນວາງແຜນ ແລະ ສົ່ງເສີມການດໍາເນີນໂຄງການຄົ້ນຄວ້າດ້ານການຕະຫຼາດການທ່ອງທ່ຽວຂອງ ສປປ ລາວ ໃຫ້ມີຄວາມເຂັ້ມແຂງ ແລະ ສາມາດນໍາໄປຜັນຂະຫຍາຍໃຊ້ປະໂຫຍດໄດ້ໃນທາງປະຕິບັດ ໂດຍຝ່າຍກົມສົ່ງເສີມຕະຫຼາດການທ່ອງທ່ຽວ, ກະຊວງວັດທະນະທໍາ ແລະ ການທ່ອງທ່ຽວ ເປັນຜູ້ຮ່ວມກໍານົດທິດທາງ, ຫົວຂໍ້ ແລະ ເນື້ອໃນການຄົ້ນຄວ້າ ໃນຂະນະທີ່ຄະນະວິທະຍາສາດສັງຄົມ, ມະຫາວິທະຍາໄລແຫ່ງຊາດ ເປັນຜູ້ສະໜອງວິທີການ ແລະ ວິທະຍາການຄົ້ນຄວ້າທາງວິຊາການ; ສົ່ງເສີມການແລກປ່ຽນທາງວິຊາການ ໂດຍການເຊື້ອເຊີນນັກວິຊາການ ຫຼື ຜູ້ຊ່ຽວຊານດ້ານການທ່ອງທ່ຽວຂອງທັງສອງຝ່າຍ ເຂົ້າຮ່ວມກອງປະຊຸມສໍາມະນາ, ກອງປະຊຸມວິຊາການ ຫຼື ກິດຈະກໍາທາງວິຊາການອື່ນໆ ທີ່ແຕ່ລະຝ່າຍໄດ້ຈັດຂຶ້ນ; ສົ່ງເສີມການຮ່ວມມືດ້ານການສອນ ແລະ ການບັນຍາຍພິເສດ ໂດຍເຊື້ອເຊີນນັກວິຊາການ ຫຼື ຜູ້ຊ່ຽວຊານຈາກກົມສົ່ງເສີມຕະຫຼາດການທ່ອງທ່ຽວ, ກະຊວງວັດທະນະທໍາ ແລະ ການທ່ອງທ່ຽວ ເຂົ້າຮ່ວມເປັນວິທະຍາກອນພິເສດ ຫຼື ຮ່ວມການສອນໃນບາງວິຊາການທີ່ກ່ຽວຂ້ອງ ຕາມຄວາມເໝາະສົມ; ຮ່ວມກັນວາງແຜນ ແລະ ດໍາເນີນການຝຶກງານນັກສຶກສາ ໂດຍກໍານົດຂັ້ນຕອນ, ຂອບເຂດໜ້າທີ່ ແລະ ການຕິດຕາມຢ່າງຊັດເຈນ ເພື່ອຮັບເອົານັກສຶກສາເຂົ້າຝຶກງານຢູ່ກົມສົ່ງເສີມຕະຫຼາດການທ່ອງທ່ຽວ; ຄ່າໃຊ້ຈ່າຍທີ່ເກີດຂຶ້ນຈາກການດໍາເນີນກິດຈະກໍາຮ່ວມກັນ ຈະຕ້ອງໄດ້ຮັບການຕົກລົງຮ່ວມກັນລ່ວງໜ້າ ໂດຍການກໍານົດຄວາມຮັບຜິດຊອບຂອງແຕ່ລະຝ່າຍຢ່າງຊັດເຈນ ກ່ອນການເລີ່ມດໍາເນີນໂຄງການ ຫຼື ກິດຈະກໍານັ້ນ.

ພາບ-ຂ່າວ: ກົມສົ່ງເສີມຕະຫຼາດການທ່ອງທ່ຽວ ກະຊວງ ວທ.