 |
ທ່ານ ນາງ ກຽນຕາ ວັນມະນາ ຫົວໜ້າພະແນກການຕ່າງປະເທດ ປະຈໍາແຂວງຄໍາມ່ວນ ໄດ້ຜ່ານຂໍ້ຕົກລົງຂອງລັດຖະມົນຕີກະຊວງການຕ່າງປະເທດ 2 ສະບັບ ວ່າດ້ວຍການຮັບຮອງເອົາໂຄງການຊ່ວຍເຫຼືອລ້າຈາກອົງການ ສຸພະນິມິດ ສາກົນ (World Vision International) ປະຈໍາ ສປປ ລາວ ຄື: ໂຄງການກະສິກໍາເຊື່ອມສານ ເພື່ອປັບປຸງວຽກງານ ໂພຊະນາການຢູ່ເມືອງມະຫາໄຊ ແລະ ເມືອງເຊບັ້ງໄຟ ແຂວງຄໍາມ່ວນ ໄລຍະ 2. ໃນນີ້, ເມືອງມະຫາໄຊ ມີ 13 ບ້ານເປົ້າໝາຍ, ງົບປະມານໂຄງການ 840,000 ໂດລາສະຫະລັດ; ເມືອງເຊບັ້ງໄຟ ມີ 13 ບ້ານເປົ້າໝາຍ, ງົບປະມານໂຄງການ 157,000 ໂດລາສະຫະລັດ, ໄລຍະເວລາປະຕິບັດໂຄງການແມ່ນເລີ້ມແຕ່ມື້ອະນຸມັດຈົນເຖິງວັນທີ 30 ກັນຍາ 2028 ຊຶ່ງຜູ້ໃຫ້ທຶນໂດຍແມ່ນ ອົງການສຸພະນິມິດ ແຫ່ງປະເທດ ອອັສສະເຕຣເລຍ (World Vision Australia).
ຈຸດປະສົງຂອງໂຄງການ ແມ່ນເພື່ອປະກອບສ່ວນເຂົ້າໃນແຜນພັດທະນາເສດຖະກິດ-ສັງຄົມ ຄັ້ງທີ IX (2021-2025) ໂດຍເລັ່ງໃສ່ຢຸດຕິຄວາມອຶດຫິວ, ບັນລຸຄວາມໝັ້ນຄົງດ້ານສະບຽງອາຫານ ແລະ ປັບປຸງໂພຊະນາການ ແລະ ສົ່ງເສີມກະສິກໍາແບບຍືນຍົງ, ລວມທັງແຜນງານແຫ່ງຊາດດ້ານການປັບປຸງວຽກງານໂພຊະນາການໃນຂົງເຂດວຽກງານຂອງກະຊວງກະສິກໍາ ແລະ ສິ່ງແວດລ້ອມ ໂດຍສະເພາະການຜະລິດສະບຽງອາຫານທີ່ມີສານອາຫານໃນການບໍລິໂພກໃນລະດັບຄົວເຮືອນ, ຊຶ່ງໂຄງການນີ້ແມ່ນປະກອບມີ 4 ກິດຈະກໍາຫຼັກຄື: ວຽກງານປັບປຸງສຸຂະພາບແມ່ ແລະ ເດັກ ແລະ ໂພຊະນາການ , ວຽກງານສົ່ງເສີມການຜະລິດກະສິກໍາ ເພື່ອປັບປຸງຊີວິດການເປັນຢູ່ຂອງປະຊາຊົນ, ວຽກງານນໍ້າ ແລະ ສຸຂາອະນາໄມ, ສ້າງຄວາມເຂັ້ມແຂງໃນດ້ານການປະສານງານຫຼາຍຂະແໜງການ ເພື່ອສະໜັບສະໜູນການເບິ່ງແຍງດູແລເດັກກ່ອນໄວຮຽນ ແລະ ການສ້າງຄວາມສໍາພັນສາມັກຄີໃນຄອບຄົວ ແລະ ຊຸມຊົນ.
ໃນພິທີ, ຕາງໜ້າລົງນາມໃຫ້ແກ່ສອງຝ່າຍໂດຍທ່ານ ນາງ ອີແດລໄວສ໌ ຊີລານ ຜູ້ອໍານວຍການ ອົງການສຸພະນິມິດສາກົນ ປະຈໍາ ສປປ ລາວ, ທ່ານ ນາງ ດາລຸນນີ ໄຊຍະບຸດ ຮອງຫົວໜ້າພະແນກກະສິກໍາ ແລະ ສິ່ງແວດ ລ້ອມແຂວງ.
(ຂ່າວ-ພາບ: ແດງສະຫວັດ ແສນພານິດ)
ຄໍາເຫັນ