ເຊັນເອັມໂອຢູ ການລົງທຶນພັດທະນາສູນຂໍ້ມູນແຫ່ງຊາດ ແລະ ລະບົບແລກປ່ຽນຂໍ້ມູນພາກລັດ

ດ້ວຍຄວາມເຊື່ອໝັ້ນຕໍ່ປະສົບການໃນການດໍາເນີນທຸລະກິດຂອງ ກຸ່ມບໍລິສັດ ພົງສະຫວັນ ທີ່ຄວບຄຸມຫຼາຍຂົງເຂດ ຊຶ່ງໄດ້ປະກອບສ່ວນເຂົ້າໃນການສ້າງສາພັດທະນາປະເທດຊາດເປັນເວລາເກືອບ 50 ປີທີ່ຜ່ານມາ, ກະຊວງເຕັກໂນໂລຊີ ແລະ ການສື່ສານ ໄດ້ມອບສິດພາຍໃຕ້ບົດບັນທຶກຄວາມເຂົ້າໃຈສະບັບນີ້ໃຫ້ ບໍລິສັດ ພູນຜົນນະຄອນ ຈໍາກັດ ຊຶ່ງເປັນໜຶ່ງໃນບໍລິສັດໃນເຄືອຂອງກຸ່ມພົງສະຫວັນ ດໍາເນີນການຄົ້ນຄວ້າສຶກສາບົດວິພາກເສດຖະກິດ-ເຕັກນິກ ຂອງໂຄງການລົງທຶນພັດທະນາສູນຂໍ້ມູນແຫ່ງຊາດ ແລະ ລະບົບແລກປ່ຽນຂໍ້ມູນພາກລັດ ໃນໄລຍະເວລາ 6 ເດືອນ ໂດຍມີຈຸດປະສົງແນໃສ່ຄົ້ນຄວ້າສະຖານທີ່ຕັ້ງ, ອອກແບບພື້ນຖານໂຄງລ່າງ, ປະເພດ ແລະ ລະບົບເຕັກນິກຂອງໂຄງການລົງທຶນພັດທະນາສູນຂໍ້ມູນແຫ່ງຊາດ ຊຶ່ງລວມທັງລະບົບຄລາວເພື່ອບໍລິການພາຍໃນ ແລະ ລະຫວ່າງປະເທດ (National Cloud) ແລະ ລະບົບແລກປ່ຽນຂໍ້ມູນພາກລັດ.

ທ່ານ ພວງປະເສີດ ແກ້ວສຸວັນ ກ່າວວ່າ: ໃນການສ້າງສູນຂໍ້ມູນແຫ່ງຊາດທີ່ມີມາດຕະຖານສາກົນ ແລະ ລະບົບເຊື່ອມໂຍງແລກປ່ຽນຂໍ້ມູນພາກລັດ ອັນເປັນພື້ນຖານສໍາຄັນໃນການຂັບເຄື່ອນປະເທດໄປສູ່ຍຸກໃໝ່ຂອງຄວາມເປັນດີຈີຕອນຢ່າງແທ້ຈິງ ແລະ ເພື່ອຜັນຂະຫຍາຍວິໄສທັດ 30 ປີ ແລະ ຍຸດທະສາດ 20 ປີ ແລະ ແຜນການ 5 ປີ ໃນການຈັດຕັ້ງປະຕິບັດການຫັນເປັນດີຈີຕອນຂອງ ສປປ ລາວ, ການພັດທະນາໂຄງການດັ່ງກ່າວຈະເປັນໂຄງລ່າງພື້ນຖານແຫ່ງຊາດທີ່ຊ່ວຍຮັບຮອງ ແລະ ສະໜັບສະໜູນການພັດທະນາດີຈີຕອນໄດ້ຢ່າງຍືນຍົງ, ສາມາດຫຼີກລ່ຽງການລົງທຶນທີ່ຊໍ້າຊ້ອນ ແລະ ປະຢັດງົບປະມານໃນການບໍາລຸງຮັກສາລະບົບ.

ທ່ານ ສອນເພັດ ອິນທະວົງ ຮອງປະທານກຸ່ມບໍລິສັດ ພົງສະຫວັນ ຜູ້ອຳນວຍການໃຫຍ່ ບໍລິສັດ ພູນຜົນນະຄອນ ຈຳກັດ ໄດ້ກ່າວເຖິງຄວາມໝາຍ, ຄວາມສຳຄັນຂອງວຽກງານດັ່ງກ່າວຕໍ່ກັບການພັດທະນາເສດຖະກິດ-ສັງຄົມດີຈີຕອນຂອງຊາດ ແລະ ໄດ້ຍົກໃຫ້ເຫັນເງື່ອນໄຂອຳນວຍຄວາມສະດວກ ແລະ ປັດໄຈຕ່າງໆພາຍໃນປະເທດ ທີ່ເອື້ອອຳນວຍໃຫ້ແກ່ການລົງທຶນ ເປັນຕົ້ນແມ່ນທີ່ຕັ້ງຂອງປະເທດລາວທີ່ເປັນຈຸດເຊື່ອມຈອດຂອງບັນດາປະເທດໃນພາກພື້ນ, ແຫຼ່ງພະລັງງານທີ່ມີລາຄາຖືກ. ການເຕີບໃຫຍ່ຂະຫຍາຍຕົວທີ່ໄວວາຂອງອຸດສາຫະກໍາສູນລວມຂໍ້ມູນ, ການບໍລິການດ້ານດີຈີຕອນ ແລະ ຄລາວຄອມພິວຕິ້ງ (Cloud computing) ທີ່ນັບມື້ນັບເຕີບໂຕພາຍໃນປະເທດອາຊຽນ ຊຶ່ງຄາດວ່າຈະບັນລຸມູນຄ່າ 18 ຕື້ ໂດລາ ໃນປີ 2029.

ການເຊັນບົດບັນທຶກຄວາມເຂົ້າໃຈຂອງສອງຝ່າຍໃນຄັ້ງນີ້ ມີຄວາມໝາຍບົ່ງບອກເຖິິງການຮ່ວມມືທີ່ເປັນເອກະພາບກັນພາຍໃຕ້ອຸດົມການດຽວກັນຂອງພາກລັດ ແລະ ວິສາຫະກິດເອກະຊົນ ເພື່ອປະກອບສ່ວນເຂົ້າໃນວຽກງານການພັດທະນາລະບົບພື້ນຖານໂຄງລ່າງ ແລະ ນະວັດຕະກຳຂອງຂະແໜງ ເຕັກໂນໂລຊີ ແລະ ການສື່ສານ ກໍຄືຂອງລັດຖະບານລາວ ໃຫ້ມີໃບໜ້າໃໝ່ທີ່ຈະມີຄວາມກ້າວໜ້າໃຫ້ເທົ່າທຽມກັບບັນດາປະເທດໃນພາກພື້ນ ແລະ ສາກົນ. ບໍລິສັດ ພູນຜົນນະຄອນ ຈຳກັດ, ເປັນບໍລິສັດ ພາຍໃຕ້ກຸ່ມ ແອວເອ (LA Group) ຊຶ່ງເປັນກຸ່ມບໍລິສັດລູກໃນເຄືອຂອງ ກຸ່ມບໍລິສັດພົງສະຫວັນ ໄດ້ສະແດງໃຫ້ເຫັນເຖິງເຈດຈຳນົງທີ່ໜັກແໜ້ນໃນການປະກອບສ່ວນເຂົ້າໃນການພັດທະນາຂົງເຂດເສດຖະກິດດີຈີຕອນຂອງ ພັກ ແລະ ລັດຖະບານ ດ້ວຍປະສົບການ ແລະ ຄວາມພ້ອມໃນດ້ານຕ່າງໆ.

(ຂ່າວ-ພາບ: ສຳນານ)