ເຊັນສັນຍາໂຄງການສົ່ງເສີມປູກໝາກນໍ້າມັນເຄືອຢູ່ເມືອງຫຼວງນໍ້າທາ 

ວັນທີ 7ພະຈິກ ຜ່ານມາ ທີ່ຫ້ອງການກະສິກໍາ ແລະ ປ່າໄມ້ເມືອງຫຼວງນໍ້າທາ ແຂວງຫຼວງນໍ້າທາໄດ້ຈັດພິທີເຊັນສັນຍາໂຄງການສົ່ງເສີມປູກ ແລະ ເກັບຊື້ໝາກນ້ຳມັນເຄືອໂດຍການເປັນປະທານຂອງທ່ານ ທອງໄຊ ອາດຜາສຸກ ຮອງເຈົ້າເມືອງຫຼວງນໍ້າທາ ຜູ້ຊີ້ນຳວຽກງານເສດຖະກິດຂັ້ນເມືອງ, ມີບັນດາທ່ານຫົວໜ້າຫ້ອງການ,ຮອງຫົວໜ້າຫ້ອງການ ແລະ ບໍລິສັດທີ່ກ່ຽວຂ້ອງເຂົ້າຮ່ວມ. 
ພິທີໄດ້ຜ່ານບົດສັນຍາວ່າດ້ວຍການຊຸກຍູ້ສົ່ງເສີມປູກ ແລະ ເກັບຊື້ໝາກນໍ້າມັນເຄືອ ຢູ່ພາຍໃນ
ເມືອງຫຼວງນໍ້າທາ ລະຫວ່າງ ຫ້ອງການກະສິກໍາ ແລະ ປ່າໄມ້ເມືອງຫຼວງນໍ້າທາ ກັບ ວິສາຫະກິດ ວົງຖາວະດີ ສົ່ງເສີມກະສິກໍາສ່ວນບຸກຄົນ,  ບົດສັນຍາປະກອບມີ 19 ມາດຕາ ຊຶ່ງບ້ານເປົ້າໝາຍຂອງໂຄງການປະກອບມີ 10 ບ້ານ: ບ້ານນາລັນ, ບ້ານນາໂຮມ, ບ້ານຈະເລີນສຸກ, ບ້ານທ່າແສ່, ບ້ານຂົວສູງ, ບ້ານ ສົບຊີມ, ບ້ານຫາດຍອງ, ບ້ານສິນອຸດົມ, ບ້ານນໍ້າຕະລານ ແລະ ບ້ານນໍ້າປີກ ເມືອງຫຼວງນ້ຳທາມີ 158 ຄອບຄົວ, ເນື້ອທີ່ປູກໝາກນໍ້າມັນເຄືອ 50 ເຮັກຕາ, ມີອາຍຸ 5 ປີ  (2023-2028)ໂດຍການລົງທຶນຂອງເອກະຊົນພາຍໃນ 100%,  ມູນຄ່າການລົງທຶນທັງໝົດ3ຕື້963ລ້ານກີບ, ຮູບແບບການສົ່ງເສີມປະຊາຊົນເຊັ່ນປະຊາຊົນ:ທີ່ດິນ; ແຮງງານ; ທາງດ້ານວິສາຫະກິດແມ່ນ ສະໜອງແນວພັນ,ເຕັກນິກວິຊາການ ແລະ ການຕະຫຼາດ.
   ທັງນີ້ກໍເພື່ອຕອບສະໜອງໃຫ້ແກ່ການພັດທະນາ, ຊອກວຽກເຮັດງານທໍາໃຫ້ແກ່ຊາວກະສິກອນ ແລະ ສ້າງລາຍຮັບເຂົ້າຄອບຄົວ ແລະ ຂະຫຍາຍຜົນຜະລິດທາງດ້ານກະສິກໍາໃຫ້ກາຍເປັນສິນຄ້າທີ່ມີຄຸນນະ
ພາບ ໄດ້ຕາມມາດຕະຖານ ເພື່ອຮັບໃຊ້ພາຍໃນ ແລະ ສົ່ງອອກຕ່າງປະເທດ.
ຈາກນັ້ນ, ກໍໄດ້ເຊັນບົດບັນທຶກຮ່ວມກັນ ລະຫວ່າງ ທ່ານ ຄໍາໄພ ສີຫາລາດ ຫົວໜ້າຫ້ອງການກະສິກໍາ ແລະ ປ່າໄມ້ເມືອງຫຼວງນໍ້າທາ  ກັບ ທ່ານ ບຸນຊູ ວົງຖາວະດີ ອໍານວຍການວິສາຫະກິດ ວົງຖາວະດີ ສົ່ງເສີມກະສິກໍາສ່ວນບຸກຄົນ ໂດຍຊ້ອງໜ້າທ່ານ ທອງໄຊ ອາດຜາສຸກ ຮອງເຈົ້າເມືອງຫຼວງນໍ້າທາ ແລະ ພາກສ່ວນທີ່ກ່ຽວຂ້ອງ.
ຂ່າວ-ພາບ:ສົມພອນ