ເຊັນສັນຍາຄວາມເຂົ້າໃຈ ກ່ຽວກັບການຄຸ້ມຄອງ ແລະ ນຳໃຊ້ສິ່ງເສດເຫຼືອຢູ່ໂຄງການໄຟຟ້າຫົງສາ

ໃນວັນທີ 14 ທັນວານີ້ທີ່ຫ້ອງວ່າການເມືອງຫົງສາ ແຂວງໄຊຍະບູລີ ໄດ້ຈັດພິທີເຊັນບົດບັນທຶກຄວາມເຂົ້າໃຈ (MOU) ວ່າດ້ວຍການມອບໝາຍການຄຸ້ມຄອງ ແລະ ການນໍາໃຊ້ສິ່ງເສດເຫຼືອຢູ່ພາຍໃນໂຄງການໄຟຟ້າຫົງສາ ລະຫວ່າງ ບໍລິສັດ ຊ່າງພິນິດເອັນເຈີເນຣິງ ຈຳກັດ (CPE) ກັບ ອົງການປົກຄອງເມືອງຫົງສາ. ໃຫ້ກຽດເຂົ້າຮ່ວມລົງນາມໃນຄັ້ງນີ້ໂດຍທ່ານ ຄຳຫຼ້າ ຜີວວັນນາ ເຈົ້າເມືອງຫົງສາ, ທ່ານ ວິລະເວດ ຫານຊະນະ ຜູ້ຈັດການຝ່າຍລັດຖະກິດສຳພັນ ບໍລິສັດ ຊ່າງພິນິດເອັນເຈີເນຣິງ ຈຳກັດ ພ້ອມດ້ວຍທີມງານ, ມີຄະນະກຳມະການຄຸ້ມຄອງຂັ້ນເມືອງເຂົ້າຮ່ວມ.
ທ່ານ ບຸນທະວີ ສີປະເສີດ ຫົວໜ້າຫ້ອງວ່າການເມືອງ ຄະນະກຳມະການຄຸ້ມຄອງຂັ້ນເມືອງ ໄດ້ຂຶ້ນຜ່ານຮ່າງບົດບັນທຶກຄວາມເຂົ້າໃຈ ວ່າດ້ວຍການມອບໝາຍການຄຸ້ມຄອງ ແລະ ການນຳໃຊ້ສິ່ງເສດເຫຼືອຢູ່ພາຍໃນໂຄງການ ໄຟຟ້າຫົງສາ ໃຫ້ຮູ້ວ່າ: ບໍລິສັດ ຊ່າງພິນິດເອັນເຈີເນຣິງ ຈຳກັດ ເຫັນດີມອບການຄຸ້ມຄອງ ແລະ ນຳໃຊ້ສິ່ງເສດເຫຼືອທີ່ຢູ່ໃນຄວາມຮັບຜິດຊອບຂອງຕົນໃຫ້ເມືອງຫົງສາເປັນຜູ້ຮັບຜິດຊອບຮ່ວມເຊັ່ນ: ສິ່ງເສດເຫຼືອທີ່ບໍ່ເປັນອັນຕະລາຍຄື:  ເສດໂລຫະ ແລະ ຢາງຕີນລົດເກົ່າ ແມ່ນມອບໃຫ້ເມືອງຫົງສາເປັນຜູ້ຄຸ້ມຄອງໂດຍກົງ ແລະ ຈັດປະມູນ ຊື້-ຂາຍ; ສ່ວນສິ່ງເສດເຫຼືອທີ່ເປັນອັນຕະລາຍຄື: ນ້ຳມັນເຄື່ອງເກົ່າ ແລະ ໝໍ້ໄຟເກົ່າ ແມ່ນບໍລິສັດເປັນຜູ້ຄຸ້ມຄອງ ແລະ ຈັດປະມູນ ຊື້-ຂາຍ ບົນພື້ນຖານມີການກວດກາຂໍ້ມູນ, ກວດນັບຈຳນວນ, ບໍລິມາດ ຮ່ວມກັນ ລະຫວ່າງ ຄະນະກຳມະການຄຸ້ມຄອງຂັ້ນເມືອງ ແລະ ບໍລິສັດ ແລ້ວຫັກພັນທະໃຫ້ລັດ 30% ໃນການຊື້-ຂາຍແຕ່ລະຄັ້ງ.
ຫຼັງຈາກນັ້ນ, ທັງສອງຝ່າຍໄດ້ເຊັນສັນຍາຮ່ວມກັນ ທັງນີ້ກໍເພື່ອເຮັດໃຫ້ການຈັດຕັ້ງປະຕິບັດໂຄງການດັ່ງກ່າວໄດ້ຮັບຜົນເປັນຢ່າງດີ, ມີຄວາມຖືກຕ້ອງຕາມຂັ້ນຕອນ ແລະ ລະບຽບການ, ຮັບປະກັນຄວາມປອດໄພ ແລະ ກຳຈັດບໍ່ໃຫ້ຕົກຄ້າງ ຊຶ່ງຈະສົ່ງຜົນກະທົບຕໍ່ສິ່ງແວດລ້ອມໃນຕໍ່ໜ້າ ພ້ອມທັງຄວາມເປັນເອກະພາບໃນການພັດທະນາ, ການນຳໃຊ້ສິ່ງເສດເຫຼືອໃຫ້ເກີດປະໂຫຍດສູງສຸດຕື່ມອີກ. 
(ຂ່າວ-ພາບ: ກິດຕິສັກ ບົວໄລ)