ຊຽງຂວາງ ສະຫລຸບວຽກງານກໍ່ສ້າງພັກ-ພະນັກງານ

ທ້າຍອາທິດຜ່ານມາ, ແຂວງຊຽງຂວາງ ໄດ້ຈັດກອງປະຊຸມສະຫຼູບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ປະຈຳປີ 2023 ໂດຍການເປັນປະທານຂອງທ່ານ ບຸນຈັນ ສີວົງພັນ ກໍາມະການສູນກາງພັກ ເລຂາພັກແຂວງ ເຈົ້າແຂວງຊຽງຂວາງ, ມີຄະນະປະຈຳພັກແຂວງ, ກຳມະການພັກແຂວງ, ຫົວໜ້າ, ຮອງຫົວໜ້າພະແນກການ, ເລຂາ, ຮອງເລຂາຮາກຖານພັກ ແລະ ໜ່ວຍພັກເຂົ້າຮ່ວມ. 
ທ່ານ ສູນທອນ ພັນມີໄຊ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງ ໄດ້ຍົກໃຫ້ເຫັນຫຼາຍຜົນງານທີ່ຍາດມາໄດ້. ໃນປີ 2023 ຜ່ານມາ, ທົ່ວແຂວງມີ 89 ຄະນະພັກຮາກຖານ, ມີໜ່ວຍພັກ 1.077 ໜ່ວຍ, ຮັບຮອງເອົາໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນໄດ້ 876 ໜ່ວຍ ກວມ 81,33%, ມີໜ່ວຍພັກແຂງ 913 ໜ່ວຍ, ກາງ 104 ໜ່ວຍ ແລະ ບໍ່ໄດ້ຕີລາຄາ 60 ໜ່ວຍ, ຂະຫຍາຍມະຫາຊົນກ້າວໜ້າເຂົ້າເປັນສະມາຊິກພັກສຳຮອງ 446 ສະ ຫາຍ ຍິງ 157 ສະຫາຍ, ເລື່ອນສະມາຊິກພັກສຳຮອງຂຶ້ນເປັນສະມາຊິກພັກສົມບູນ 496 ສະຫາຍ ຍິງ 170 ສະຫາຍ. ພ້ອມນີ້, ຍັງໄດ້ຄົ້ນຄວ້າເຊື່ອມຊຶມນິຕິກຳຕ່າງໆຂອງສູນກາງ ແລະ ຂອງແຂວງ, ໄດ້ເອົາໃຈໃສ່ວຽກງານປ້ອງກັນພັກ-ພະນັກງານໄລຍະໃໝ່, ຝຶກອົບຮົມແລກປ່ຽນບົດຮຽນເຊິ່ງກັນ ແລະ ກັນ ໂດຍສະເພາະແມ່ນວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ. 
(ຂ່າວ: ບຸນມີ ແສງທຸມມີ)