ຊຽງຊວາງຍົກສູງປະສິດທິຜົນຂອງການລົງທຶນ

ໃນໄລຍະກາງສະໄໝຜ່ານມາ,ແຂວງຊຽງຂວາງໄດ້ເພີ່ມທະວີ ຄຸ້ມຄອງ, ຕິດຕາມ, ກວດກາ ແລະ ຊຸກຍູ້ ການຈັດຕັ້ງປະຕິບັດໂຄງການລົງທຶນຂອງລັດ ໃນແຕ່ລະປີໃຫ້ສອດຄ່ອງກັບແຜນພັດທະນາເສດຖະກິດ-ສັງຄົມ ຂອງແຂວງ, ແກ້ໄຂບັນດາໂຄງການໜີ້ສິນທີ່ແກ່ຍາວມາຫຼາຍປີ, ປະຕິບັດຕາມແຈ້ງການເພີ່ມເຕີມຂອງກະຊວງແຜນການ ແລະ ການລົງທຶນ ສະບັບເລກທີ 2182/ກຜທ.ກຜ ຕໍ່ກັບ ໂຄງການທີ່ຈັດຕັ້ງປະຕິບັດສໍາເລັດ 100% ແລະ ມີມູນຄ່າ 300 ລ້ານກີບລົງມາເພື່ອປົດອອກຈາກບັນຊີໂຄງການລົງທຶນຂອງລັດໄດ້ 16 ໂຄງການມູນຄ່າ 2,84 ຕື້ກີບ. ເຈລະຈາຕໍ່ລອງ ແລະ ຫັກລົບມູນຄ່າໂຄງການຕາມຜົນຂອງການກວດກາໂຄງການນອກແຜນຈໍານວນ 25 ໂຄງການຈາກມູນຄ່າສັນຍາເບື້ອງຕົ້ນ 241,34 ຕື້ກີບ ມາເປັນມູນຄ່າ 226,28 ຕື້ກີບ, ສາມາດປະຢັດງົບປະມານໄດ້ 15,06 ຕື້ກີບ. 
ສໍາເລັດການສະເໝີຂໍໂຈະໂຄງການກໍ່ສ້າງເມືອງໜອງແຮດ ໃຫ້ກາຍເປັນເມືອງຕົວແບບດ້ານຊົນເຜົ່າແຂວງຊຽງຂວາງ ອອກຈາກບັນຊີສາລະບານງົບປະມານການລົງທຶນຂອງລັດ. ສະເໝີດັດແກ້ມູນຄ່າໂຄງການທີ່ມີມູນຄ່າຫຼາຍກວ່າ 10 ຕື້ກີບຂຶ້ນໄປຈໍານວນ 7 ໂຄງການ, ມູນຄ່າຕາມສັນຍາ 413,44 ຕື້ກີບ, ມູນຄ່າຕ້ອງຫັກລົບຕາມການກວດກາ 24,19 ຕື້ກີບ, ມູນຄ່າທີ່ຜ່ານການຫັກລົບຕົວຈິງຍັງເຫຼືອ 389,25 ຕື້ກີບ. ສັງລວມໂຄງການລົງທຶນຂອງລັດເພື່ອສະເໝີກະຊວງແຜນການ ແລະ ການລົງທຶນ ແລະ ສະພາປະຊາຊົນແຂວງ ເພື່ອດັດແກ້ມູນຄ່າຕາມຜົນກວດກາຂອງອົງການກວດກາແຫ່ງລັດຈໍານວນ 38 ໂຄງການຈາກມູນຄ່າ 1.751,10 ຕື້ ກີບມາເປັນມູນຄ່າ 1.648,32 ຕື້ກີບ (ດັດແກ້ຫຼຸດມູນຄ່າ 102,78 ຕື້ກີບ). ລົງປະເມີນຜົນໂຄງການສືບຕໍ່ກໍາລັງຈັດຕັ້ງປະຕິບັດມີຈໍານວນ 1 ໂຄງການມີມູນຄ່າ 3,85 ຕື້ກີບຮ່ວມກັບ ຄະນະກໍາມະການປະເມີນຜົນ (JEC).ໂຄງການທີ່ລັດຖະບານອະນຸຍາດ ແລະ ມອບສິດໃຫ້ຂັ້ນແຂວງຕິດຕາມ, ຄຸ້ມຄອງມີ 22 ໂຄງການ ໂດຍສະເພາະແມ່ນໂຄງການຂຸດຄົ້ນແຮ່ທາດມີ 11 ໂຄງການ ແລະ ໂຄງການເຮັດທົດລອງມີ 11 ໂຄງການ, ລົງຊຸກຍູ້ຕິດຕາມ, ກວດກາ ແລະ ປະເມີນການຈັດຕັ້ງປະຕິບັດໄດ້ທັງໝົດ 4 ໂຄງການ ໃນນັ້ນ, ໂຄງການລົງທຶນປົກກະຕິ 2 ໂຄງການ ແລະ ໂຄງການທົດລອງ 2 ໂຄງການ ແລະ ລົງຕິດຕາມກວດກາໂຄງການຂັ້ນແຂວງ ທັງໝົດ 44 ໂຄງການ ໃນນັ້ນ:ໂຄງການລົງທຶນພາກເອກະຊົນພາຍໃນມີ 33 ໂຄງການ ແລະ ເອກະຊົນຕ່າງປະເທດມີ 9 ໂຄງການ ແລະ ຮ່ວມທຶນ 2 ໂຄງການ ແລະ ໄດ້ອອກຂໍ້ຕົກລົງລົບລ້າງ 2 ໂຄງການ.
ຂ່າວ: ວັນໄຊ ຕະວິນຍານ