ນອກເໜືອຈາກໄພຂົ່ມຂູ່ຕໍ່ຄວາມໝັ້ນຄົງດ້ານອາຫານ ແລະ ນ້ຳ, ຂະແໜງການເງິນຂອງລັດຖະບານ ແລະ ພາກສ່ວນທະນາຄານກໍອາດຈະໄດ້ຮັບຜົນກະທົບເຊັ່ນກັນ ຖ້າຫາກໄພພິບັດສ້າງຄວາມເສຍຫາຍໃຫ້ແກ່ພື້ນຖານໂຄງລ່າງ ແລະ ເຮັດໃຫ້ປະເທດທີ່ຂາດແຄນເງິນສົດມີຄວາມຫຍຸ້ງຍາກໃນການຊຳລະໜີ້ສິນທີ່ກ່ຽວຂ້ອງ.
ທ່ານ ແອນໂທນີ ນີຢອງ ຜູ້ອຳນວຍການຝ່າຍການປ່ຽນແປງສະພາບອາກາດ ແລະ ການເຕີບໂຕສີຂຽວ ຂອງທະນາຄານພັດທະນາອາຟຣິກາ (AfDB) ກ່າວໃນການສຳພາດວ່າ: ເຫດການນີ້ພຽງຢ່າງດຽວຈະສົ່ງຜົນໃຫ້ລວມຍອດຜະລິດພັນພາຍໃນປະເທດ (GDP) ຂອງບັນດາປະເທດທີ່ໄດ້ຮັບຜົນກະທົບຮ້າຍແຮງ ຫຼຸດລົງສະເລ່ຍ 1-2% ຊຶ່ງມີມູນຄ່າປະມານ 10-20 ຕື້ໂດລາ ທົ່ວທະວີບອາຟຣິກາ.
ທັງນີ້, ການຄາດຄະເນຫຼ້າສຸດຈາກ AfDB ໃນເດືອນພຶດສະພາຜ່ານມາລະບຸວ່າ: ທົ່ວທະວີບອາຟຣິກາຈະມີການເຕີບໂຕທາງເສດຖະກິດຢູ່ທີ່ 4.2% ໃນປີນີ້ ແລະ ເພີ່ມຂຶ້ນເປັນ 4.4% ໃນປີ 2027, ໂດຍສົມມຸດວ່າຂໍ້ຂັດແຍ່ງລະຫວ່າງ ສະຫະລັດ ອາເມຣິກາ ແລະ ອິສຣາແອນ ກັບ ອີຣານໄດ້ຮັບການແກ້ໄຂແລ້ວ. ເຖິງຢ່າງໃດກໍຕາມ, ໂຕເລກເຫຼົ່ານີ້ແມ່ນສ້າງຂຶ້ນກ່ອນຈະມີການຄາດຄະເນກ່ຽວກັບປະກົດການຊຸບເປີແອວນີໂຢ.
ນອກຈາກນັ້ນ, AfDB ຄາດຄະເນວ່າຊາວກະສິກອນໃນອາຟຣິກາປະເຊີນກັບການສູນເສຍລາຍໄດ້ທັງໝົດເກືອບ 330 ລ້ານໂດລາໃນປີນີ້, ໃນຂະນະທີ່ອຸດສາຫະກໍາການປະມົງອາດຈະໄດ້ຮັບຜົນກະທົບຮ້າຍແຮງຍ້ອນອຸນຫະພູມທະເລທີ່ເພີ່ມຂຶ້ນ ແລະ ພາຍຸ.
ຄໍາເຫັນ