 |
ໃນກອງປະຊຸມ, ສະຫາຍ ພູທະນູເພັດ ໄຊສົມບັດ ໄດ້ກ່າວບາງຕອນວ່າ: ການເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ຜູ້ແທນອົງຄະນະພັກແຂວງວຽງຈັນ ສະໄໝທີ VII ຄັ້ງນີ້ ຈະໄດ້ພ້ອມພາກັນຮັບຟັງການເຊື່ອມຊຶມເອກະສານສຳຄັນ 3 ສະບັບ ຄື: ມະຕິກອງປະຊຸມໃຫຍ່ຜູ້ແທນອົງຄະນະພັກແຂວງວຽງຈັນ ສະໄໝທີ VII, ບົດຜັນຂະຫຍາຍເນື້ອໃນລາຍງານການເມືອງຕໍ່ກອງປະຊຸມໃຫຍ່ ຜູ້ແທນອົງຄະນະພັກແຂວງວຽງຈັນ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VII (2026-2030). ການເຊື່ອມຊຶມບັນດາເອກະສານສຳຄັນຄັ້ງນີ້ ເພື່ອເປັນການຍົກສູງບົດບາດການນຳພາຂອງຄະນະພັກແຕ່ລະຂັ້ນ; ເພື່ອເພີ່ມທະວີໃນການສ້າງແຂວງໃຫ້ເປັນຫົວໜ່ວຍຍຸດທະສາດຢ່າງໜັກແໜ້ນ, ເພື່ອຕັ້ງໜ້າສ້າງເສດຖະກິດເອກະລາດເປັນເຈົ້າຕົນເອງ ແລະ ເພື່ອເປັນການສຸມໃສ່ແກ້ໄຂຄວາມທຸກຍາກຂອງປະຊາຊົນໃຫ້ໄດ້ໂດຍພື້ນຖານ.
ສະຫາຍເລຂາຄະນະບໍລິຫານງານພັກແຂວງ ກ່າວອີກວ່າ: ແຂວງວຽງຈັນ ຍັງມີຫຼາຍດ້ານທີ່ຕ້ອງເອົາໃຈໃສ່ບຸກບືນສູ້ຊົນ ຢ່າງແຂງແຮງ ແລະ ດ້ວຍຈິດໃຈບຸກທະລຸຂຶ້ນຕື່ມ ເປັນຕົ້ນແມ່ນ ການແກ້ໄຂຄວາມທຸກຍາກ ຂອງປະຊາຊົນບັນດາເຜົ່າ ເຂດຫ່າງໄກຊອກຫຼີກ, ການແກ້ໄຂຄວາມຫຼຸດໂຕນກັນ ດ້ານການພັດທະນາ ລະຫວ່າງ ຕົວເມືອງ ກັບຊົນນະບົດ, ການຄຸ້ມຄອງ, ປົກປັກຮັກສາ ແລະ ນໍາໃຊ້ຊັບພະຍາກອນທໍາມະຊາດ ທີ່ຍັງບໍ່ມີຈຸດສຸມ, ບໍ່ຄຸ້ມຄ່າ ແລະ ທໍາລາຍສິ່ງແວດລ້ອມ, ການແກ້ໄຂໜໍ່ແໜງຄວາມບໍ່ສະຫງົບ ແລະ ປະກົດການຫຍໍ້ທໍ້ຕ່າງໆ ໃນສັງຄົມ, ການຍົກສູງສະຕິຊາດ ເອກະລາດ ເປັນເຈົ້າຕົນເອງ, ຄວາມຕື່ນຕົວເປັນເຈົ້າການ ຂອງສະມາຊິກພັກ, ພະນັກງານ ແລະ ປະຊາຊົນ ຈໍານວນບໍ່ໜ້ອຍ ແລະ ບັນຫາອື່ນໆ.
(ຂ່າວ: ເມືອງວຽງຄຳ)
ຄໍາເຫັນ