ຢູນີເທວ ໄດ້ຮັບລິຂະສິດຖ່າຍທອດສົດບານໂລກ 2026 ໃຫ້ປະຊາຊົນລາວຮັບຊົມໂດຍບໍ່ເສຍຄ່າ

ທ່ານ ພົນໂທ ສາຍໃຈ ກົມມະສິດ ໄດ້ກ່າວວ່າ: ພິທີປະກາດການເປັນເຈົ້າຂອງລິຂະສິດການອອກອາກາດ ການແຂ່ງຂັນບານໂລກ FIFA World Cup 2026™ ຢູ່ ສປປ ລາວ ທີ່ຈັດຂຶ້ນໂດຍ ບໍລິສັດ ຢູນີເທວ, ບານໂລກ ຫຼື FIFA World Cup ແມ່ນເຫດການກິລາທີ່ໃຫຍ່ທີ່ສຸດໃນໂລກ, ເປັນເທສະການບານເຕະທີ່ແຟນບານຫຼາຍພັນລ້ານຄົນທົ່ວໂລກຕັ້ງໜ້າລໍຄອຍ. ນີ້ບໍ່ພຽງແຕ່ແມ່ນການແຂ່ງຂັນກິລາເທົ່ານັ້ນ, ແຕ່ຍັງເປັນເຫດການ ການສື່ສານລະດັບໂລກ, ບ່ອນທີ່ເຕັກໂນໂລຊີ, ໂທລະພາບ, ອິນເຕີເນັດ, ໂທລະສັບມືຖື ແລະ ແພລັດຟອມດີຈີຕອນຕ່າງໆ ໄດ້ມີສ່ວນຮ່ວມເພື່ອນໍາເອົາທຸກໆໄລຍະຂອງກິລາບານເຕະມາສູ່ປະຊາຊົນ, FIFA World Cup 2026™ເປັນເຫດການຄັ້ງປະຫວັດສາດ ທີ່ມີຂະໜາດໃຫຍ່ທີ່ສຸດ ຊຶ່ງມີທີມຊາດທັງໝົດ 48 ທີມເຂົ້າຮ່ວມ ແລະ ມີການແຂ່ງຂັນທັງໝົດ 104 ນັດ. ການທີ່ປະຊາຊົນລາວໄດ້ມີໂອກາດຮັບຊົມການແຂ່ງຂັນຢ່າງຄົບຖ້ວນ, ຖືກຕ້ອງຕາມກົດໝາຍ, ມີຄຸນນະພາບ ແລະ ສະດວກສະບາຍນັ້ນແມ່ນເຫດການທີ່ມີຄວາມໝາຍຄວາມສໍາຄັນທີ່ສຸດອັນໜຶ່ງ ແລະ ບໍລິສັດ ຢູນີເທວ ໄດ້ປະກາດຢ່າງເປັນທາງການ ໃນການເປັນຜູ້ຖືລິຂະສິດການອອກອາກາດ FIFA World Cup 2026™ ຢູ່ ສປປ ລາວ. ພິເສດ, ຢູນີເທວ ຍັງໄດ້ມອບສິດໃຫ້ປະຊາຊົນລາວໄດ້ເບິ່ງການຖ່າຍທອດສົດຄົບທັງໝົດ 104 ນັດ ໂດຍບໍ່ເສຍຄ່າ 100% ຊຶ່ງສະແດງໃຫ້ເຫັນເຖິງຄວາມຮັບຜິດຊອບຕໍ່ສັງຄົມ, ນໍ້າໃຈຮັບໃຊ້ຊຸມຊົນ ແລະ ຄວາມຮູ້ບຸນຄຸນຢ່າງເລິກເຊິ່ງຂອງຢູນີເທວ ທີ່ມີຕໍ່ປະຊາຊົນລາວ ແລະ ເປັນເຫດການທີ່ມີຄວາມໝາຍສໍາຄັນໃນຫຼາຍດ້ານ: ໜຶ່ງ) ໃນການນໍາເອົາເນື້ອຫາລະດັບສາກົນທີ່ມີຄຸນນະພາບສູງ ແລະ ຖືກລິຂະສິດມາສູ່ປະ ຊາຊົນລາວຜ່ານແພລັດຟອມທີ່ທັນສະໄໝ, ເມື່ອປະຊາຊົນເຂົ້າເຖິງເນື້ອຫາທີ່ເປັນທາງການ, ຖືກຕ້ອງຕາມກົດໝາຍ ແລະ ມີຄຸນນະພາບບໍ່ພຽງແຕ່ປົກປ້ອງສິດຂອງຜູ້ຊົມເທົ່ານັ້ນ, ແຕ່ຍັງປະກອບສ່ວນສ້າງສະພາບແວດລ້ອມການສື່ສານທີ່ປອດໃສ, ສີວິໄລ ແລະ ເຄົາລົບລິຂະສິດອີກດ້ວຍ. ສອງ) ເຫດການນີ້ສະແດງໃຫ້ເຫັນເຖິງບົດບາດທີ່ສໍາຄັນຂອງໂຄງລ່າງພື້ນຖານໂທລະຄົມມະນາຄົມ, ອິນເຕີເນັດ ແລະ ແພລັດຟອມດີຈີຕອນເຂົ້າໃນຊີວິດສັງຄົມ. ປັດຈຸບັນ, ປະຊາຊົນບໍ່ພຽງແຕ່ເບິ່ງໂທລະພາບຕາມຮູບແບບດັ້ງເດີມ, ແຕ່ຍັງມີຄວາມຕ້ອງການເບິ່ງຜ່ານໂທລະສັບມືຖື, ຄອມພິວເຕີ, Smart TV, ເວັບໄຊ, ແອັບພລິເຄຊັນ ແລະ ອຸປະກອນອື່ນໆ. ດັ່ງນັ້ນ, ການທີ່ຢູນີເທວຂຸດຄົ້ນລິຂະສິດໃນຫຼາຍແພລັດຟອມ ຊຶ່ງລວມມີ LaoTV ແມ່ນທິດທາງທີ່ສອດຄ່ອງກັບທ່າອ່ຽງການຫັນເປັນ ດີຈີຕອນ ແລະ ພຶດຕິກຳການນໍາໃຊ້ບໍລິການດີຈີຕອນຂອງປະຊາຊົນ ແລະ ສາມ) ການຖ່າຍທອດສົດໃຫ້ຊົມໂດຍບໍ່ເສຍຄ່າ ຄົບທັງໝົດ 104 ນັດ ສະແດງໃຫ້ເຫັນເຖິງນໍ້າໃຈຂອງການນໍາໃຊ້ເຕັກໂນໂລຊີ ເພື່ອຮັບໃຊ້ປະຊາຊົນ, ເຕັກໂນໂລຊີຈະມີຄວາມໝາຍຢ່າງແທ້ຈິງ ກໍຕໍ່ເມື່ອມັນຊ່ວຍໃຫ້ປະຊາຊົນສາມາດເຂົ້າເຖິງຄວາມຮູ້, ຂໍ້ມູນຂ່າວສານ, ວັດທະນະທຳ, ການບັນເທີງ ແລະ ຄຸນຄ່າທາງຈິດໃຈທີ່ດີງາມຂຶ້ນກວ່າເກົ່າ, ປະຊາຊົນລາວຈະມີໂອກາດໄດ້ຮ່ວມຊົມເທສະການບານໂລກອັນຍິ່ງໃຫຍ່ຢ່າງສະດວກສະບາຍ, ຖືກກົດໝາຍ ແລະ ມີຄຸນນະພາບ.

ທ່ານ ພົນໂທ ສາຍໃຈ ກົມມະສິດ ກ່າວຕື່ມວ່າ: ກິລາບານເຕະ ແມ່ນກິລາທີ່ມີພະລັງດຶງດູດຢ່າງແຮງກ້າແຕ່ລະນັດການແຂ່ງຂັນ ບໍ່ພຽງແຕ່ນໍາມາຊຶ່ງຄວາມມ່ວນຊື່ນ ບັນເທີງ, ແຕ່ຍັງສ້າງແຮງບັນດານໃຈກ່ຽວກັບນໍ້າໃຈສາມັກຄີ, ລະບຽບວິໄນ, ຄວາມມຸ່ງໝັ້ນບຸກບືນ ແລະ ຄວາມປາຖະໜາຢາກໄດ້ໄຊຊະນະ ແລະ ບັນດາຄຸນຄ່າທີ່ດີງາມຂອງກິລາ ສາມາດແຜ່ຂະຫຍາຍໄປສູ່ແຕ່ລະຄອບຄົວ, ແຕ່ລະໂຮງຮຽນ, ແຕ່ລະຊຸມຊົນ ແລະ ໂດຍສະ ເພາະແມ່ນຄົນຮຸ່ນໃໝ່ໄດ້ຢ່າງເຂັ້ມແຂງກວ່າເກົ່າ, ເມື່ອປະຊາຊົນລາວໄດ້ຮັບຊົມການແຂ່ງຂັນລະດັບໂລກທີ່ມີຊື່ສຽງ ແລະ ມີຄຸນນະພາບສູງເຊັ່ນ: FIFA World Cup, ຄວາມຮັກໃນກິລາ ແລະ ຄວາມຮັກໃນບານເຕະ ຈະຖືກຫຼໍ່ຫຼອມໃຫ້ແຂງແກ່ນຂຶ້ນ. ຈາກນັ້ນ, ຂະບວນການຝຶກແອບກິລາໃນໝູ່ປະຊາຊົນ, ນັກຮຽນ, ນັກສຶກສາ, ຊາວໜຸ່ມ ແລະ ຊຸມຊົນ ຈະມີແຮງຜັກດັນໃນການພັດທະນາຕື່ມອີກ ແລະ ປະເທດຊາດຈະພັດທະນາໄດ້ແມ່ນຕ້ອງມີຊັບພະ ຍາກອນມະນຸດທີ່ແຂງແຮງ ທັງທາງດ້ານຮ່າງກາຍ ແລະ ຈິດໃຈ. ກິລາ ຊ່ວຍຍົກລະດັບສຸຂະພາບ, ຝຶກຝົນຈິດໃຈ ສ້າງນໍ້າໃຈລວມໝູ່, ຮຽນຮູ້ການເຄົາລົບກະຕິກາ ແລະ ດໍາລົງຊີວິດໃນທາງບວກຫຼາຍຂຶ້ນ ແລະ ຢູນີເທວ ຈະສືບຕໍ່ປະສານສົມທົບຢ່າງແໜ້ນແຟ້ນກັບອົງການຄຸ້ມຄອງລັດ, ສະຖານີໂທລະພາບແຫ່ງຊາດລາວ, ພາກສ່ວນເຕັກນິກ, ສື່ມວນຊົນ ແລະ ຄູ່ຮ່ວມງານທີ່ກ່ຽວຂ້ອງ ເພື່ອຮັບປະກັນໃຫ້ການອອກອາກາດຖືກຈັດຕັ້ງປະຕິບັດຢ່າງຖືກຕ້ອງຕາມລະບຽບການ, ຖືກຕ້ອງຕາມຂອບເຂດລິຂະສິດ, ມີຄວາມປອດໄພ, ມີຄຸນນະພາບ ແລະ ມີປະສິດທິຜົນ.

ຂ່າວ-ພາບ: ບຸນອູ້ມ