ຂ່າວຕ່າງປະເທດລາຍງານ ເມື່ອບໍ່ດົນມານີ້, ບໍລິສັດ ບອສຕັນ ຄອນຊັນຕິງ ກຣຸບ (BCG) ໄດ້ເປີດເຜີຍບົດລາຍງານຜົນການສຶກສາໂດຍລະບຸວ່າ: ທະນາຄານທົ່ວໂລກອາດຈະມີມູນຄ່າບໍລິສັດເພີ່ມຂຶ້ນ7 ລ້ານໆໂດລາໃນອີກ 5 ປີຂ້າງໜ້າ ຖ້າເນັ້ນການຂະຫຍາຍຕົວຂອງທຸລະກິດ ແລະ ສົ່ງເສີມການຈຳ ໜ່າຍຜະລິດຕະພັນຂອງບໍລິສັດ.
ບໍລິສັດທີ່ປຶກສາລະບຸວ່າ: ບັນດາທະນາຄານໃຫ້ກູ້ຢືມອາດຈະມີມູນຄ່າບໍລິສັດເພີ່ມຂຶ້ນຈາກປັດຈຸບັນ 2 ເທົ່າ ຖ້າເນັ້ນໃຫ້ຄວາມສຳຄັນກັບການຂະຫຍາຍຕົວຂອງບໍລິສັດ ແລະ ປັບປຸງອັດຕາສ່ວນຕະຫຼາດຕໍ່ມູນຄ່າທາງບັນຊີ (P/BV) ເຖິງແມ່ນວ່າຈະປະເຊີນກັບອຸປະສັກຕ່າງໆ. ຫຸ້ນທະນາຄານປະມານ 75% ມີ P/BV ຕໍ່າກວ່າ 1 ໃນປີ 2022 ຂະນະທີ່ອັດຕາສ່ວນລາຄາຫຸ້ນຕໍ່ກຳໄລຫຸ້ນ (P/PE) ຢູ່ໃນລະດັບເກືອບ 50% ຂອງລະດັບໃນປີ 2008. ຂະນະດຽວກັນ, ຜົນຕອບແທນຂອງຜູ້ຖືຫຸ້ນໃນປັດຈຸບັນໜ້ອຍກວ່າດັດຊະນີຕະຫຼາດໃຫຍ່ໆນັບຕັ້ງແຕ່ເກີດວິກິດທາງການເງິນ ແລະ ຊ່ອງຫວ່າງຜົນຕອບແທນຫຸ້ນກໍກວ້າງຂຶ້ນເລື້ອຍໆ. ເຖິງແມ່ນວ່າທະນາຄານລົງທຶນເພີ່ມຜົນຜະລິດ ແລະ ຫຼຸດຄວາມຊັບຊ້ອນໃນການດຳເນີນງານ ແຕ່ກຳໄລຂອງທະນາຄານຍັງຄົງຕົກຢູ່ພາຍໃຕ້ແຮງກົດດັນຈາກຄວາມຕ້ອງການເງິນສູງ ແລະ ການແຂ່ງຂັນທີ່ເພີ່ມຂຶ້ນຈາກບໍລິສັດໃໝ່ເຊັ່ນ: ບໍລິສັດເຕັກໂນໂລຊີທາງການເງິນ ຫຼື ຟິນເທັກ.
BCG ເນັ້ນວ່າ: ທະນາຄານບໍ່ອາດຈະກັບໄປສູ່ລະດັບທີ່ສາມາດສ້າງກຳໄລ ແລະ ມີມູນຄ່າ ເໝືອນໄລຍະກ່ອນເກີດວິກິດການທາງດ້ານການເງິນ.
ຄໍາເຫັນ