 |
ໃນພິທີ, ທ່ານ ພັອ ຄຳສີ ໄຊຍະໂຊກ ຫົວໜ້າຄຸ້ມຄອງການສຶກສາຫຼັງມະຫາ ແລະ ບຳລຸງຍົກລະດັບ ໄດ້ຜ່ານບົດສະຫຼຸບປິດຊຸດບຳລຸງວຽກງານນຳພາ-ບັນຊາ ວິຊາສະເພາະສັນຕິບານສຳລັບນາຍຕຳຫຼວດຂັ້ນ 7 ແລະ ຂັ້ນ 8 ຂອງກຳລັງປ້ອງກັນຄວາມສະຫງົບ ລະບົບ 45 ວັນ ໃຫ້ຮູ້ວ່າ: ຊຸດບໍາລຸງຄັ້ງນີ້ໄດ້ເລີ່ມຮຽນນັບແຕ່ວັນທີ 13 ສິງຫາ - ວັນທີ 1 ຕຸລາ 2026 ມີນັກສຳມະນາກອນທັງໝົດ 35 ສະຫາຍ; ໃນນີ້, ມາຈາກກົມກອງອ້ອມຂ້າງກະຊວງ ແລະ ປກສ ນະຄອນຫຼວງວຽງຈັນ 6 ສະຫາຍ, ມາຈາກ ປກສ ແຂວງທົ່ວປະເທດ 29 ສະຫາຍ. ຜ່ານການຄົ້ນຄວ້າຮ່ຳຮຽນ ແລະ ຝຶກຝົນຫຼ່ໍຫຼອມຕະຫຼອດໄລຍະເວລາ 45 ວັນ, ນັກສຳມະນາກອນທັງໝົດ 35 ສະຫາຍ ສາມາດຜ່ານການປະເມີນ ແລະ ສຳເລັດຫຼັກສູດ 100% ໂດຍຈັດຄະແນນໄດ້ເກດ A ຈຳນວນ 30 ສະຫາຍ ແລະ ເກດ B+ ຈຳນວນ 5 ສະຫາຍ. ພ້ອມນີ້, ນັກສຳມະນາກອນ ຍັງໄດ້ຮັບຮັບໃບຍ້ອງຍໍ 20 ສະຫາຍ ແລະ ໃບຊົມເຊີຍ 15 ສະຫາຍ.
ໂອກາດດັ່ງກ່າວ, ທ່ານ ພົຈວ ບຸນຊະນະ ສິມມາລາວົງ ໄດ້ມີຄໍາເຫັນໂອ້ລົມ ຊຶ່ງທ່ານໄດ້ຍ້ອງຍໍຊົມເຊີຍນັກສຳມະນາກອນທີ່ສຳເລັດການສຶກສາໃນຄັ້ງນີ້ ພ້ອມທັງເນັ້ນໃຫ້ບັນດານັກສຳມະນາກອນ ຈົ່ງນຳເອົາບົດຮຽນ ແລະ ຄວາມຮູ້ທີ່ໄດ້ຮໍ່າຮຽນໃນຄັ້ງນີ້ໄປຝຶກຝົນຫຼໍ່ຫຼອມຕົນເອງ ເພື່ອນຳເອົາຄວາມຮູ້-ຄວາມສາມາດໄປໝູນໃຊ້ເຂົ້າໃນວຽກງານວິຊາສະເພາະຕົວຈິງ ຢູ່ກົມກອງຂອງຕົນໃຫ້ເກີດຜົນປະໂຫຍດສູງສຸດ.
ຂ່າວ: ນົກແກ້ວ
ຄໍາເຫັນ