50 ປີ ຜ່ານມາ ໂຮງໝໍມິດຕະພາບໄດ້ຕັ້ງໜ້າປະກອບສ່ວນການບໍລິການສຸຂະພາບ

ທ່ານ ສອນໄຊ ລາດຊະວົງ ຜູ້ອໍານວຍການໂຮງໝໍມິດຕະພາບ, ໄດ້ຕາງໜ້າໃຫ້ພະນັກງານແພດໝໍ ພະຍາບານ ແລະ ບຸກຄະລະກອນທັງໝົດ ສະແດງຄວາມຍີນດີຊົມເຊີຍ ແລະ ຮູ້ບຸນຄຸນຢ່າງສູງຕໍ່ການຈັດຕັ້ງ, ການນໍາພາຂອງພັກ-ລັດຖະບານ ໃນການສ້າງສາພັດທະນາປະເທດຊາດໃຫ້ມີຄວາມຈະເລີນກ້າວໜ້າ, ມີສະຖຽນລະພາບທາງດ້ານການເມືອງ, ມີຄວາມໝັ້ນຄົງທາງດ້ານເສດຖະກິດ-ສັງຄົມ, ປະຊາຊົນມີຄວາມສາມັກຄີປອງດອງ ແລະ ປະເທດຊາດ ມີຄວາມສະຫງົບ ຕໍ່ເນື່ອງຕະຫຼອດໄລຍະ 50 ປີ.

ພາຍໃຕ້ການນໍາພາຂອງພັກ, ໂຮງໝໍມິດຕະພາບລາວ ໄດ້ກໍາເນີດເກີດຂຶ້ນພາຍໃຕ້ການຮ່ວມມືຊ່ວຍເຫຼືອ ຂອງອາດີດສະຫະພາບໂຊວຽດ ໃນການກໍ່ສ້າງ ອາຄານສະຖານທີ່ນອນຂະໜາດ 150 ຕຽງ ສໍາເລັດ ແລະ ເປີດນໍາໃຊ້ໃຫ້ບໍລິການໃນປີ 1988 ເປັນຕົ້ນມາ ຊຶ່ງໃສ່ຊື່ວ່າໂຮງໝໍມິດຕະພາບລາວ-ໂຊວຽດ ໃນເບື້ອງຕົ້ນ ເພື່ອແນໃສ່ໃຫ້ບໍລິການປີ່ນປົວທົ່ວໄປໃຫ້ການນໍາຂັ້ນສູງລະດັບຫົວໜ້າກົມຂຶ້ນໄປ ຊຶ່ງມີແພດຊ່ຽວຊານໂຊຫວຽດ ມາປະຈໍາການຢູ່ນໍາ ແລະ ຊ່ວຍກໍ່ສ້າງບຸກຄະລະກອນແພດ. ໄລຍະຕໍ່ມາ ເຫັນວ່າຄວາມຮຽກຮ້ອງຕ້ອງການຂອງປະຊາຊົນບັນດາເຜົ່າ ໃນການບໍລິການສຸຂະພາບ, ການນໍາກະຊວງສາທາລະນະສຸກ ຈຶ່ງໄດ້ເປີດກ້ວາງພະລະບົດບາດ ໃຫ້ປະຊາຊົນທຸກຊັ້ນຄົນ ສາມາດເຂົ້າມາຮັບບໍລິການ ແລະ ມີຄວາມຈໍາເປັນເປີດກ້ວາງການພົວພັນຮ່ວມມືກັບສາກົນກ້ວາງຂຶ້ນຕື່ມ ຈຶ່ງປ່ຽນຈາກຊື່ເດີມ ໂຮງໝໍມິດຕະພາບລາວ-ໂຊວຽດ ເປັນໂຮງໝໍມິດຕະພາບ (ສາມາດເປີດກວ້າງການຮ່ວມມື) ແລະ ພ້ອມດຽວກັນນັ້ນ, ໄດ້ຖືກມອບໝາຍໃຫ້ມີການພັດທະນາລົງເລິກໃນບາງບູລິມະສິດເຊັ່ນ: ການບົ່ງມະຕິ, ປີ່ນປົວຜ່າຕັດການກະທົບກະດູກ, ຜ່າຕັດສະໝອງ-ກະດູກສັນຫຼັງ, ປີ່ນປົວພະຍາດໄຂ່ຫຼັງ-ຟອກເລືອດ, ປີ່ນປົວພະຍາດມະເຮັງ ແລະ ປີ່ນປົວສົມທົບການແພດພື້ນເມືອງ ລວມທັງເຮັດບົດບາດໂຮງໝໍມະຫາວິທະຍາໄລ. ຕະຫຼອດຫຼາຍປີຜ່ານມາ ການນໍາໂຮງໝໍແຕ່ລະໄລຍະ ກໍໄດ້ໄດ້ເອົາໃຈໃສ່ ໃນການພັດທະນາໂຮງໝໍ ໃຫ້ສາມາດຕອບສະໜອງການບໍລິການປີ່ນປົວຂັ້ນສູງສຸດທີ່ມີຄຸນນະພາບ, ມີຄວາມພົ້ນເດັ່ນສ້າງຄວາມເຊື່ອໝັ້ນ ໃຫ້ຜູ້ມາຮັບບໍລິການ, ມີຄວາມໄວ້ວາງໃຈ ຈາກການນໍາພັກ-ລັດຂັ້ນສູງ, ເຖິງຢ່າງໃດກໍຕາມການນໍາໂຮງໝໍ ຍັງສືບຕໍ່ເອົາໃຈໃສ່ພັດທະນາຍົກລະດັບເຕັກນິກ ປະກອບອຸປະກອນທັນສະໄໝ ໃນການບົ່ງມະຕິພະຍາດ ດ້ວຍຊີທີສະແກນເນີເອັມອາໄອ ລວມທັງປຸກສ້າງອາຄານນອນປີ່ນປົວຫຼັງໄໝ່ ແລະ ເປີດນໍາໃຊ້ ໃນປີ 2019 ໃຫ້ກາຍເປັນທາງເລືອກຜູ້ມີເງື່ອນໄຂສູງ ຊຶ່ງເປັນທ່າແຮງ ໃນການຕອບສະໜອງ ໃນການຈັດຕັ້ງນະໂຍບາຍໃໝ່ ຫັນຫົວໜ່ວຍບໍລິຫານວິຊາການ ກຸ້ມຕົນເອງເທື່ອລະກ້າວ, ປະຕິບັດມະຕິ 04/ກມສພ ວ່າດ້ວຍການສ້າງເສດຖະກິດ ເອກະລາດເປັນເຈົ້າຕົນເອງ. ສາມາດຫຼຸດຜ່ອນການນໍາໃຊ້ງົບປະມານປົກກະຕິ ຈາກລັດຖະບານໄດ້ຫຼາຍກ່ວາ 50%

ທ່ານ ສອນໄຊ ລາດຊະວົງ ໃຫ້ຮູ້ຕື່ມວ່າ: ສຳລັບວຽກງານກໍ່ສ້າງບຸກຄະລະກອນ, ໂຮງໝໍມິດຕະພາບ ຖືວ່າພວກເຮົາມີຄວາມແຂງແຮງພໍສົມຄວນ ຜ່ານມາເຖິງປັດຈຸບັນ ເຫັນວ່າມີການນໍາຂັ້ນສູງ ກະຊວງສາທາລະນະສຸກ ທີ່ໄດ້ເຕີບໃຫ່ຍຂະຫຍາຍໂຕຂຶ້ນຈາກໂຮງໝໍມິດຕະພາບ ເຊັ່ນ: ໄດ້ຮັບຕໍາແໜ່ງ ລັດຖະມົນຕີ, ຮອງລັດຖະມົນຕີ, , ຮອງອະທິການ, ຜູ້ອໍານວຍການ, ຫົວໜ້າສູນເປັນແຕ່ລະໄລຍະ. ສໍາລັບການກໍ່ສ້າງຍົກລະດັບວິຊາການ ຢູ່ພາຍໃນ ແລະ ຕ່າງປະເທດ ລວມທັງມີການຮ່ວມມືແລກປ່ຽນບົດຮຽນກັບສາກົນສະໝໍ່າສະເໝີ ເຮັດໃຫ້ໂຮງໝໍມີແພດແຕ່ລະສາຂາວິຊາ ທີ່ມີປະສົບການ, ມີຊ່ຽວຊານຂັ້ນ 2 ຂັ້ນ 1, ປະລິນຍາໂທ, ປະລິນຍາຕີ, ຊັ້ນສູງ, ເບື້ອງການຮຽນການສອນ ພະນັກງານຫຼາຍທ່ານໄດ້ເປັນອາຈານສອນ, ເປັນຫົວໜ້າພາກວິຊາ(ທຽບເທົ່າຄະນະບໍດີ) ພິເສດແພດອາວຸໂສ 2 ທ່ານໄດ້ຮັບນາມມະຍົດສາດສະດາຈານພິເສດ ຊຶ່ງຊີ້ໃຫ້ເຫັນໃນການປະຕິບັດບົດບາດໂຮງໝໍມະຫາວິທະຍາໄລ. ແນ່ນອນ ນອກຈາກມີແພດໝໍ ພະຍາບານ ກໍໄດ້ສ້າງພະນັກງານເຕັກນິກການແພດ ທີ່ອໍານວຍຄວາມສະດວກໃຫ້ການປະຕິບັດເຕັກນິກ ຮັບປະກັນຄວາມຊັດເຈນ ປອດໄພໃນການນໍາໃຊ້ອຸປະກອນການແພດທັນສະໄໝ ເຮັດໃຫ້ໂຮງໝໍສາມາດຮັບປະກັນ ໃຫ້ການບໍລິການການແພດສຸກເສີນ, ມີລະບອບ, ລະບຽບການ ທາງດ້ານວິຊາການ ໃນບົ່ງມະຕິ ປີ່ນປົວພະຍາດ ທີ່ເຂັ້ມແຂງ.

ປັດຈຸບັນ ໂຮງໝໍມິດຕະພາບໄດ້ກາຍເປັນໜຶ່ງ ໃນບັນດາໂຮງໝໍສູນກາງ ທີ່ມີຄວາມພົ້ນເດັ່ນໃນວຽກງານການບໍລິການສຸຂະພາບລະດັບສູງສຸດ, ໃຫ້ການຮຽນການສອນນັກສຶກສາແພດ, ບໍາລຸງສ້າງຍົກລະດັບ ວິຊາການສະເພາະທາງ ໃຫ້ພະນັກງານທ້ອງຖີ່ນ ເປັນທີ່ຮັບຮູ້ ຂອງສັງຄົມ ແລະ ການຈັດຕັ້ງ, ມີອຸປະກອນທີ່ທັນສະໄໝໃນການກວດ ບົ່ງມະຕິ ແລະ ນໍາໃຊ້ເຕັກໂນໂລຊີໃນການປີ່ນປົວ, ຜ່າຕັດ, ສາຍແສງລັງສີ ແລະ ພິເສດ ລິເລີ່ມເຮັດການປູກຖ່າຍໄຂ່ຫຼັງ ແລະ ຍັງມີແຜນຍົກລະດັບການນໍາໄຊ້ເຕັກໂນໂລຊີໄໝ່ເພີ່ມຕື່ມ ໃນອານາຄົດໃກ້ນີ້ ເຊັ່ນ: ການຜ່າຕັດໜ້າທີ່ການສະໝອງ ໂດຍນໍາໃຊ້ອຸປະກອນລະບຸທີ່ຕັ້ງພະຍາດໃນສະໝອງ ແອ້ສັນຫຼັງ, ການຝັງແຮ້ ປົວມະເຮັງ. ສໍາລັບການບໍລິການສຸຂະພາບແມ່ນປະຕິບັດນະໂຍບາຍການເຂົ້າເຖິງຂອງທົວປວງຊົນທຸກຊັ້ນຄົນ ແລະ ສະ ເໝີພາບ ລວມທັງປະຕິບັດນະໂຍບາຍ ຕໍ່ຜູ້ທຸກຍາກອະນາຖາ ໃຫ້ໄດ້ຮັບການບໍລິການພື້ນຖານ ສະເໝີພາບ. ພິເສດຍັງໄດ້ຍົກລະດັບອໍານວຍຄວາມສະດວກ ໃຫ້ຜູ້ມີເງື່ອນໄຂຕ້ອງການສ່ວນຕົວເຊັ່ນ: ຫ້ອງນອນພິເສດ, ຫ້ອງແຍກດ່ຽວ, ຈັດເພີ່ມໃຫ້ມີການກວດສຸຂະພາບແບບໄວ ໄດ້ຜົນກັບມື້, ການບໍລິການຜ່າຕັດໄວໃນມື້, ຮັບກວດເຊັກສຸຂະພາບນອກສະຖານທີ່ ແລະ ຍັງມີແຜນການຕອບສະໜອງພະຍາບານພິເສດ ຕາມຄວາມຕ້ອງການໃຫ້ຄົນເຈັບ ແລະ ຜູ້ມາຮັບການບໍລິການ.ໂດຍລວມແລ້ວໂຮງໝໍໄດ້ປະຕິບັດຕາມຄໍາຂວັນ 5 ດີ 1 ພໍໃຈ ຄື: ຕ້ອນຮັບດີ,ສະອາດດີ,ສະດວກດີ,ບົ່ງມະຕິຖືກຕ້ອງດີ, ປິ່ນປົວດີ ແລະ ຄົນເຈັບພໍໃຈກັບການບໍລິການທີ່ໄດ້ຮັບ.