 |
ທ່ານ ສຸລັດ ອິນທະວົງ ຫົວໜ້າດ່ານພາສີສາກົນລະໄລ ໃຫ້ຮູ້ວ່າ: ດ່ານພາສີສາກົນລະໄລ ແຂວງສາລະວັນມີຊາຍແດນຕິດຈອດກັບດ່ານສາກົນລະໄລ ແຂວງກວາງຈິ ສສ ຫວຽດນາມ, ສະພາບດິນຟ້າອາກາດມີການປ່ຽນແປງຢູ່ເລື້ອຍໆ ຝົນຕົກຫຼາຍກວ່າແດດອອກ, ດ່ານສາກົນລະໄລມີການນຳເຂົ້າ-ສົ່ງອອກສິນຄ້າຂອງບັນດາຫົວໜ່ວຍທຸລະກິດບໍ່ມີຫຼາຍຄືດ່ານສາກົນແຫ່ງອື່ນໆ, ມີແຕ່ບາງບໍລິສັດ ຫຼື ບາງບຸກຄົນເທົ່ານັ້ນທີ່ມາໃຊ້ບໍລິການຜ່ານດ່ານໃນການນຳເຂົ້າ-ສົ່ງອອກສິນຄ້າ.
ສຳລັບການຈັດຕັ້ງປະຕິບັດວຽກງານວິຊາສະເພາະ ຄະນະດ່ານໄດ້ເພີ່ມທະວີການກວດກາສິນຄ້າຢ່າງເຂັ້ມງວດ ເພື່ອປ້ອງກັນການຮົ່ວໄຫຼ, ປັບປຸງກົນໄກການບໍລິການໃຫ້ມີຄວາມວ່ອງໄວ ແລະ ຖືກຕ້ອງຕາມລະບຽບການ. ນອກນັ້ນ, ໄດ້ໂຄສະນາເຜີຍແຜ່ກົດໝາຍ, ນິຕິກຳຕ່າງໆ ທີ່ກ່ຽວຂ້ອງເພື່ອໃຫ້ສັງຄົມ ກໍຄືນັກທຸລະກິດທີ່ມາໃຊ້ບໍລິ ການນຳເຂົ້າ-ສົ່ງອອກສິນຄ້າ ໃຫ້ມີຄວາມເຂົ້າໃຈຢ່າງເລິກເຊິ່ງ ແນໃສ່ຮັບປະກັນໃຫ້ຜູ້ປະກອບການປະຕິບັດລະ ບຽບຫຼັກການໃຫ້ຖືກຕ້ອງສອດຄ່ອງ ສາມາດປະກອບສ່ວນເສຍພັນທະເຂົ້າງົບປະມານຂອງລັດໃຫ້ຄົບຖ້ວນຕາມຕົວຈິງ.
 |
ຜ່ານການຈັດຕັ້ງປະຕິບັດຕົວຈິງໃນ 6 ເດືອນຕົ້ນປີ 2026 ສາມາດເກັບລາຍຮັບໄດ້ທັງໝົດ 467.84 ຕື້ກວ່າກີບ ທຽບໃສ່ແຜນ 6 ເດືອນຕົ້ນປີ 2026 ຈໍານວນ 46 ຕື້ກວ່າກີບ ເທົ່າກັບ 1017.05%, ທຽບໃສ່ແຜນການປີ 92 ຕື້ກວ່າກີບ ເທົ່າກັບ 508.53%, ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 855.06%, ສ່ວນໝວດສິນຄ້າລາຍຮັບຕົ້ນຕໍໄດ້ມາຈາກ: ຄ່າຊັກພິເສດ, ປະເພດນ້ຳມັນເຊື້ອໄຟ, ພາຫະນະ, ອາໄຫຼ່, ເຄື່ອງກໍ່ສ້າງ, ເຄື່ອງ ໃຊ້ໄຟຟ້າ, ເຄື່ອງອຸປະໂພກ-ບໍລິໂພກ ແລະ ສິນຄ້າປະເພດອື່ນໆ, ປັບໃໝ-ຂາຍເຄື່ອງຮິບ, ຄ່າທຳນຽມຕ່າງໆ, ຄ່າທຳນຽມຄັງແຮ ແລະ ສິນຄ້າອື່ນໆ.
ສຳລັບທິດທາງແຜນການ 6 ເດືອນທ້າຍປີ 2026 ເພື່ອສືບຕໍ່ຮັກສາຜົນງານ ແລະ ຮັບປະກັນການເກັບລາຍຮັບໃຫ້ບັນລຸຕາມຄາດໝາຍ, ດ່ານພາສີສາກົນລະໄລ ໄດ້ວາງມາດຕະການສຳຄັນຄື: ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ພະນັກງານ-ລັດຖະກອນໃຫ້ມີຈັນຍາບັນ ແລະ ຄວາມຮັບຜິດຊອບສູງ, ເພີ່ມທະວີການກວດກາສິນຄ້າຢ່າງເຂັ້ມງວດ ເພື່ອປ້ອງກັນການຮົ່ວໄຫຼ, ປັບປຸງກົນໄກການບໍລິການວຽກຂໍ້ມູນຂ່າວສານສັງລວມ ແລະ ຄຸ້ມຄອງການແຈ້ງພາສີໃຫ້ມີຄວາມວ່ອງໄວ, ທັນສະໄໝ, ຄຸ້ມຄອງສາງ ແລະ ກວດກາສິນຄ້າ, ຄຸ້ມຄອງພາຫະນະ, ຜູ້ໂດຍສານ ແລະ ມາດຕະການໃນການຈັດຕັ້ງປະຕິບັດຈຳນວນໜຶ່ງ ເພື່ອເຮັດໃຫ້ການຈັດເກັບລາຍຮັບບັນລຸຕາມລະດັບຄາດໝາຍ. ແຫຼ່ງຂ່າວ: ແຂວງສາລະວັນ
ຄໍາເຫັນ