 |
ທ່ານ ພັທ ໂພໄຊ ຄຸນຈະເລີນ ຫົວໜ້າດ່ານຕໍາຫຼວດກວດຄົນເຂົ້າ-ອອກເມືອງ (ຕມ) ປະຈໍາດ່ານ ສາກົນພູເກືອ ໄດ້ໃຫ້ສໍາພາດເມື່ອວັນທີ 10 ກໍລະກົດ 2026 ນີ້ວ່າ: ໃນໄລຍະ 6 ເດືອນຜ່ານມາ ເຈົ້າໜ້າທີ່ ຕມ ໄດ້ເອົາໃຈໃສ່ ປະສານສົມທົບກັບພາກສ່ວນຂະແໜງການທີ່ກ່ຽວຂ້ອງ ໃນການແກ້ໄຂວຽກງານປະກົດການຫຍໍ້ທໍ້ ທີ່ເກີດຂຶ້ນພາຍໃນດ່ານສາກົນພູເກືອ, ພ້ອມທັງສະຫຼຸບຖອດຖອນບົດຮຽນກ່ຽວກັບການຈັດຕັ້ງປະຕິບັດໜ້າທີ່.ນອກນັ້ນຍັງໄດ້ປະ
ສານສົມທົບກັບ ດ່ານສາກົນເບີອີ (ສສ ຫວຽດນາມ) ເພື່ອແລກປ່ຽນສະພາບການທີ່ເກີດຂຶ້ນໃນຂອບເຂດຊາຍແດນກໍ່ຄືຂອບເຂດປະຕູດ່ານໃຫ້ມີຄວາມສະຫງົບໂດຍພື້ນຖານ. ພ້ອມນັ້ນ, ກໍາລັງຕຳຫຼວດກວດຄົນເຂົ້າ-ອອກເມືອງ ທີ່ປະຈຳການຢູ່ ດ່ານສາກົນພູເກືອ ແມ່ນມີແນວ ຄິດຫຼັກໝັ້ນການເມືອງໜັກແໜ້ນ ຫ້າວຫັນເຮັດສຳເລັດໜ້າທີ່ວຽກງານວິຊາສະເພາະທີ່ການຈັດຕັ້ງມອບໝາຍໃຫ້, ຊຶ່ງສະແດງອອກໃນການບໍລິການບັນດາຄົນຕ່າງດ້າວ ແລະ ຊາວຕ່າງປະເທດ ລວມທັງພົນລະເມືອງລາວ ທີ່ມີການເຂົ້າ-ອອກ ຜ່ານປະຕູດ່ານ ແມ່ນມີຄວາມເປັນລະ ບຽບຮຽບຮ້ອຍ ຮັບປະກັນທາງດ້ານຄວາມສະຫງົບປອດໄພ, ມີຄວາມສາມັກຄີ ຮັກແພງຊ່ວຍ ເຫຼືອເຊິ່ງກັນ ແລະ ກັນບໍ່ວ່າໃນຍາມເຈັບເປັນ ກໍ່ຄືການເຮັດໜ້າທີ່ວຽກງານວິຊາສະເພາະ.
ທ່ານ ພັທ ໂພໄຊ ຄຸນຈະເລີນ ໄດ້ໃຫ້ຮູ້ຕື່ມວ່າ: ໃນຕໍ່ໜ້ານີ້ ທາງເຈົ້າໜ້າທີ່ ຕມ ປະຈໍາດ່ານສາກົນພູເກືອ ຈະສືບຕໍ່ຍົກສູງການຄຸ້ມຄອງ ແລະ ກວດກາຄົນເຂົ້າ-ອອກເມືອງ ໃຫ້ຖືກຕ້ອງຕາມກົດໝາຍ, ເພີ່ມທະວີການຄຸ້ມຄອງຄົນຕ່າງປະ ເທດ, ພາຫະນະ ແລະ ສິນຄ້າຜ່ານດ່ານ ພ້ອມທັງປ້ອງກັນການເຂົ້າ-ອອກເມືອງຜິດກົດໝາຍ, ສືບຕໍ່ປະສານງານຢ່າງໃກ້ຊິດກັບພາກສ່ວນປະຈຳດ່ານ ເຊັ່ນ: ພາສີ, ກັກກັນພືດ-ສັດ, ສາທາລະ ນະສຸກ, ທະຫານ ແລະ ຕຳຫຼວດ ເພື່ອອຳນວຍຄວາມສະດວກໃນການຜ່ານດ່ານ ແລະ ຮັກສາຄວາມປອດໄພ. ນອກຈາກນັ້ນ ຈະເນັ້ນໜັກໃສ່ການຕໍ່ສູ້ ແລະ ສະກັດກັ້ນອາຊະຍາກຳຂ້າມຊາດ, ການຄ້າມະນຸດ, ການລັກລອບເຂົ້າ-ອອກເມືອງ ແລະ ການນຳໃຊ້ເອກະສານປອມ ຄວບຄູ່ກັບການນຳເທັກໂນໂລຊີມາໃຊ້ໃນການບໍລິຫານຂໍ້ມູນ ເພື່ອຍົກລະດັບປະສິດທິພາບການບໍລິການ.
ພ້ອມນີ້ ຈະສືບຕໍ່ເອົາໃຈໃສ່ວຽກງານສ້າງພະນັກງານ ອົບຮົມ ແລະ ພັດທະນາຄວາມຮູ້ຄວາມສາມາດດ້ານວິຊາສະເພາະ ຄຸນນະທຳ ແລະ ລະບຽບວິໄນ ເພື່ອໃຫ້ການປະຕິບັດໜ້າທີ່ຕອບສະໜອງຕໍ່ສະພາບການຕົວຈິງ ແລະ ປະກອບສ່ວນຮັກສາຄວາມໝັ້ນຄົງ ຄວາມສະຫງົບ ຕາມຊາຍແດນ ພ້ອມສ້າງຄວາມເຊື່ອໝັ້ນໃຫ້ແກ່ປະຊາຊົນ ແລະ ນັກເດີນທາງທີ່ໃຊ້ບໍລິການຜ່ານດ່ານສາກົນພູເກືອ.ຂ່າວ: ມະນີວອນ
ຄໍາເຫັນ