 |
ທ່ານ ຄໍາມ່ວນ ຄໍາບຸນມີ ໄດ້ກ່າວເປີດກອງປະຊຸມ, ພ້ອມທັງລາຍງານການຈັດຕັ້ງປະຕິບັດວຽກງານສ່ວຍສາອາກອນໃນ 6 ເດືອນຕົ້ນປີ 2026 ຍົກໃຫ້ເຫັນຜົນງານດ້ານດີ, ດ້ານອ່ອນ, ຂໍ້ຄົງຄ້າງ ແລະບາງບົດຮຽນທີ່ຖອດຖອນໄດ້ໃນການຈັດຕັ້ງນໍາພາວຽກງານແຕ່ລະດ້ານ ນັບແຕ່ດ້ານການເມືອງ-ແນວຄິດ, ດ້ານການຈັດຕັ້ງ, ບຸກຄະລາກອນ, ບໍລິຫານການເງິນ,ວຽກງານກວດກາພາຍໃນ, ວຽກງານຜົນການກວດສອບ-ກວດກາ ແລະວຽກງານຈັດເກັບລາຍຮັບເຂົ້າງົບປະມານ. ຜ່ານການປະຕິບັດໃນ 6 ເດືອນຕົ້ນປີ 2026 ສາມາດເກັບລາຍຮັບເຂົ້າງົບປະມານແຫ່ງລັດໄດ້ຫລາຍກວ່າ 758 ຕື້ກວ່າກີບ, ເທົ່າກັບ 70.94% ຂອງແຜນການປີ, ເທົ່າກັບ 122.31% ຂອງແຜນ 6 ເດືອນຕົ້ນປີ, ໃນນັ້ນ ລາຍຮັບສ່ວຍສາອາກອນຫລາຍກວ່າ 549 ຕື້ກີບ,ເທົ່າກັບ 63.07% ຂອງແຜນການປີ, ລາຍຮັບຊັບສິນຫລາຍກວ່າ 209 ຕື້ກີບ,ເທົ່າກັບ 105.05% ຂອງແຜນການປີ. ພ້ອມນີ້, ກໍໄດ້ຜ່ານທິດທາງແຜນການ 6 ເດືອນທ້າຍປີ 2026 ເພື່ອສືບຕໍ່ຊຸກຍູ້ການຈັດເກັບລາຍຮັບໃຫ້ໄດ້ຕາມຄາດໝາຍແຜນການວາງໄວ້. ໂອກາດນີ້,ໄດ້ມີການຜ່ານບົດລາຍງານວຽກງານປ້ອນຂໍ້ມູນຕອນດິນ, ປັກໝຸດຕອນດິນ, ວຽກງານກວດກາໄລ່ລຽງອາກອນ ແລະວຽກງານ ການຕິດຕັ້ງໃບເກັບເງິນ ລະບົບ ອີເທັກອິນວອຍ (E-Tax-Invoice)
ຈາກນັ້ນ,ຜູ້ເຂົ້າຮ່ວມ ໄດ້ປະກອບຄຳເຫັນໃສ່ບົດສະຫຼຸບ ແລະທິດທາງແຜນການ ເພື່ອເຮັດໃຫ້ການຈັດເກັບລາຍຮັບງົບປະມານມີປະສິດທິຜົນ.
 |
ຕອນທ້າຍ ທ່ານ ຄໍາພັນ ພັນທຸລັກ ໄດ້ມີຄໍາເຫັນເນັ້ນໜັກໃຫ້ພະນັກງານ- ລັດຖະກອນໃນຂະແໜງສ່ວຍສາອາກອນໃນທົ່ວແຂວງ ພ້ອມກັນເຊື່ອມຊຶມ, ກໍາແໜ້ນ ບັນດານິຕິກໍາ, ຂໍ້ກໍານົດ, ກົດລະບຽບ ທີ່ກ່ຽວຂ້ອງໃຫ້ເລິກເຊິ່ງ ເພື່ອຈັດຕັ້ງປະຕິບັດໜ້າທີ່ວຽກງານໃຫ້ມີຜົນສໍາເລັດ, ເພີ່ມທະວີຄວາມຮັບຜິດຊອບ ໃນການປະຕິບັດໜ້າທີ່ວຽກງານ, ເປັນຫົວຈັກຫຼັກແຫຼ່ງໃນການຈັດເກັບລາຍຮັບໃຫ້ສູນກາງ ແລະແຂວງ ໂດຍສຸມໃສ່ເກັບກໍາຖານຂໍ້ມູນລາຍຮັບ,ການຄຸ້ມຄອງຫົວໜ່ວຍທຸລະກິດ, ການປະສານສົມທົບກັບຂະແໜງກ່ຽວຂ້ອງຂອງພະແນກການເງິນແຂວງ, ເອົາໃຈໃສ່ປະຕິບັດບັນດາໜ້າວຽກຈຸດສຸມໃນຕໍ່ໜ້າ ໂດຍສະເພາະການຂະຫຍາຍອາກອນມູນຄ່າເພີ່ມ, ເພື່ອເຮັດໃຫ້ການຈັດຕັ້ງປະຕີບັດວຽກງານສ່ວຍສາອາກອນປະຈໍາແຂວງມີຜົນສໍາເລັດຕາມຄາດໝາຍທີ່ວາງໄວ້.ພາບ-ຂ່າວ: ທະນູສິນ ອິດທິພົນ.
ຄໍາເຫັນ