ສະຫາຍ ພົອ ວິໄລ ຫຼ້າຄໍາຟອງ ຕ້ອນຮັບຄະນະຜູ້ແທນສະພາທິດສະດີສູນກາງພັກກອມມູນິດຫວຽດນາມ

ສະຫາຍ ພົນເອກ ວິໄລ ຫຼ້າຄຳຟອງ ໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ການເຂົ້າຢ້ຽມຂ່ຳນັບຂອງຄະນະຜູ້ແທນຂັ້ນສູງສະພາທິດສະດີສູນກາງພັກກອມມູນິດຫວຽດນາມ ຊຶ່ງເປັນການປະກອບສ່ວນອັນສໍາຄັນ ໃນການສືບຕໍ່ເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີພິເສດ ການຮ່ວມມືຮອບດ້ານ ແລະ ການເປັນຫຸ້ນສ່ວນຍຸດທະສາດ ລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ໃຫ້ໝັ້ນຄົງຂະໜົງແກ່ນຍິ່ງໆຂຶ້ນ.

ພ້ອມນີ້, ສະຫາຍ ກໍໄດ້ຊົມເຊີຍຜົນສໍາເລັດຂອງການຈັດກອງປະຊຸມສໍາມະນາທິດສະດີ ລະຫວ່າງສອງພັກລາວ-ຫວຽດນາມ ໃນໄລຍະຜ່ານມາ ຊຶ່ງເປັນພື້ນຖານທີ່ສໍາຄັນໃຫ້ແກ່ການສະໜອງຂໍ້ມູນດ້ານທິດສະດີ-ພຶດຕິກໍາ ໃຫ້ແກ່ການບູລະນະແນວທາງນະໂຍບາຍຂອງພັກໃນແຕ່ລະໄລຍະ.

ໃນໂອກາດດຽວກັນ, ຫົວໜ້າຄະນະຜູ້ແທນສະພາທິດສະດີສູນກາງພັກກອມມູນິດຫວຽດນາມ ໄດ້ສະແດງຄວາມຂອບໃຈຢ່າງຈິງໃຈຕໍ່ ສະຫາຍ ພົນເອກ ວິໄລ ຫຼ້າຄຳຟອງ ທີ່ໄດ້ສະຫຼະເວລາອັນມີຄ່າຕ້ອນຮັບຄະນະ, ອັນເຕັມໄປດ້ວຍໄມຕີຈິດມິດຕະພາບອັນດູດດື່ມ, ສະໜິດສະໜົມຖານສະຫາຍອ້າຍນ້ອງ, ພ້ອມທັງໄດ້ລາຍງານກ່ຽວກັບຜົນສຳເລັດຂອງການເຮັດວຽກ ແລະ ການແລກປ່ຽນບົດຮຽນທາງດ້ານທິດສະດີ-ພຶດຕິກໍາຕົວຈິງ ລະຫວ່າງສອງສະພາທິດສະດີສູນກາງພັກ ລາວ-ຫວຽດນາມ ທີ່ໄດ້ພົວພັນຮ່ວມມືການຄົ້ນຄວ້າທິດສະດີທີ່ມີຜົນສໍາເລັດໃນຫຼາຍດ້ານ ເພື່ອເປັນການເພີ່ມພູນຄູນສ້າງຄັງສາງທາງດ້ານທິດສະດີສະດີ ແລະ ພຶດຕິກຳຂອງພັກໃຫ້ຂະຫຍາຍຕົວຂຶ້ນຢ່າງບໍ່ຢຸດຢັ້ງ ແລະ ໄດ້ຮັບໝາກຜົນສູງຂຶ້ນເລື້ອຍໆ.

(ແຫຼ່ງຂ່າວ: ສະພາທິດສະດີສູນກາງພັກ)