 |
ເນື່ອງໃນໂອກາດວັນສື່ມວນຊົນ ແລະ ການພິມຈໍາໜ່າຍ, ວັນສ້າງຕັ້ງໜັງສືພິມປະຊາຊົນ ສຽງຂອງສູນກາງພັກ ຄົບຮອບ 76 ປີ (13/8/1950-13/8/2026) ໃກ້ຈະມາເຖິງນີ້. ທ່ານ ສີວັນ ຫອມໄຊຍະເດດ ຮັກສາການຫົວໜ້າບັນນາທິການໃຫຍ່ໜັງສືພິມປະຊາຊົນ ໄດ້ໃຫ້ສໍາພາດຕໍ່ສື່ມວນຊົນໃນວັນທີ 10 ສິງຫານີ້ ທີ່ສໍານັກງານໜັງສືພິມປະຊາຊົນ ໂດຍໄດ້ຍົກໃຫ້ເຫັນການເຕີບໃຫຍ່ຂະຫຍາຍຕົວຂອງສື່ມວນຊົນລາວຕະຫຼອດໄລຍະ 76 ປີຜ່ານມາ; ຍົກໃຫ້ເຫັນມູນເຊື້ອແຫ່ງການກຳເນີດເກີດຂຶ້ນຂອງພັກປະຊາຊົນ ປະຕິວັດລາວ ແລະ ກະແສຟອງແຫ່ງການຕໍ່ສູ້ກູ້ຊາດ ຍາດເອົາເອກະລາດ ປະຊາທິປະໄຕ ແລະ ຜືນແຜ່ນດິນອັນຄົບຖ້ວນຂອງລາວ ຈົນໄດ້ໄຊຊະນະຢ່າງສົມບູນ ຕິດພັນຢ່າງສະໜິດແໜ້ນກັບໝາກຜົນແຫ່ງການດໍາເນີນວຽກງານການເມືອງ-ແນວຄິດດ້ວຍການນໍາໃຊ້ຫຼາຍວິທີການ, ຫຼາຍພາຫະນະ ເພື່ອໂຄສະນາເຜີຍແຜ່ກົນອຸບາຍຂອງສັດຕູ ແລະ ປຸກລະດົມຂົນຂວາຍ ກຳລັງແຮງຂອງປະຊາຊົນບັນດາເຜົ່າ. ໃນໄລຍະທໍາອິດຂອງການປະຕິວັດສາມຊາດອິນດູຈີນ, ການດຳເນີນວຽກງານການເມືອງ-ແນວຄິດ ນອກຈາກໂຄສະນາປາຖະກະຖາ ດ້ວຍປາກເປົ່າແລ້ວ, ຍັງນໍາໃຊ້ໃບປິວ-ໃບຂ່າວ ກໍຄືສື່ສິ່ງພິມ ຊຶ່ງແມ່ນພາຫະນະສື່ມວນຊົນ ຕາມທິດຊີ້ນໍາອັນຖືກຕ້ອງຂອງ “ພັກກອມມູນິດອິນດູຈີນ ປີ 1930. ຕົ້ນກໍາເນີດຂອງພັກປະຊາຊົນ ປະຕິວັດລາວ”. ໃບຂ່າວໄດ້ເປັນສື່ສິ່ງພິມທີ່ສຳຄັນຫຼາຍ ໃນການປຸກລະດົມຂົນຂວາຍປະຊາຊົນ ເຂົ້າຮ່ວມຂະບວນການປະຕິວັດຢ່າງກວ້າງຂວາງ ເຮັດໃຫ້ກຳລັງປະຕິວັດເຕີບໃຫຍ່ເຂັ້ມແຂງຢ່າງວ່ອງໄວ ພາຍໃຕ້ການນໍາພາຂອງຄະນະພັກແຄວ້ນລາວ. ເພື່ອປະຕິບັດໜ້າທີ່ການເມືອງ, ພັກເຮົາໄດ້ຈັດກອງປະຊຸມໃຫຍ່ຜູ້ແທນປະຊາຊົນທົ່ວປະເທດ ໃນວັນທີ 13-15 ສິງຫາ 1950 ແລະ ໄດ້ຕົກລົງສ້າງຕັ້ງ “ແນວລາວອິດສະຫຼະ” ແລະ “ລັດຖະບານລາວຕໍ່ຕ້ານ” ໂດຍມີສະເດັດເຈົ້າສຸພານຸວົງ ເປັນປະທານແນວລາວອິດສະຫຼະ ໂດຍໄດ້ວາງໂຄງການການ ເມືອງ 12 ຂໍ້ອອກ. ພ້ອມທັງຕົກລົງສ້າງຕັ້ງ ໜັງສືພິມປະຕິວັດ ໃສ່ຊື່ວ່າ: ໜັງສືພິມ “ລາວອິດສະຫຼະ” ຢ່າງເປັນທາງການ ຊຶ່ງເປັນໜັງສືພິມປະຕິວັດລາວ ສະບັບທໍາອິດ ທີ່ເກີດຂຶ້ນໃນເງື່ອນໄຂທີ່ມີຄວາມຫຍຸ້ງຍາກທີ່ສຸດ. ຈາກນັ້ນ, ອີງຕາມສະພາບຄວາມເປັນຈິງ ໄດ້ປ່ຽນຊື່ມາເປັນໜັງສືພິມ “ລາວຮັກຊາດ” ໃນວັນທີ 6 ມັງກອນ 1956 ກໍໄດ້ສືບຕໍ່ຕ້ານຈັກກະພັດໂຕໃໝ່ຜູ້ຮຸກຮານ ແລະ ລູກແລ້ງຕີນມື, ໜັງສືພິມ ໄດ້ຍ້າຍໄປຈັດພິມຢູ່ຫວຽດນາມ, ປີ 1962 ມາພິມຢູ່ວຽງໄຊ ແຂວງຫົວພັນ. ວັນທີ 11 ສິງຫາ 1975 ຄືນມາຕັ້ງສຳນັກງານຢູ່ວຽງຈັນ, ປ່ຽນຊື່ມາເປັນໜັງສືພິມ “ສຽງປະຊາຊົນ”. ໃນວັນທີ 22 ມີນາ 1983 ໄດ້ປ່ຽນຊື່ມາເປັນ “ໜັງສືພິມປະຊາຊົນ” ຈົນຮອດປັດຈຸບັນ. ຫຼັງຈາກນັ້ນ, ໄດ້ສ້າງຕັ້ງວິທະຍຸກະຈາຍສຽງແຫ່ງຊາດ ໃນວັນທີ 13 ສິງຫາ 1960, ໜັງສືພິມກອງທັບ ໃນວັນທີ 20 ມັງກອນ 1965, ສໍານັກຂ່າວສານປະເທດລາວ ໃນວັນທີ 6 ມັງກອນ 1968, ໂທລະພາບແຫ່ງຊາດ ວັນທີ 1 ທັນວາ 1983”, ໜັງສືພິມພາສາຕ່າງປະເທດ ໃນປີ 1994.
76 ປີ ພາຍໃຕ້ການນໍາພາຂອງພັກ, ສື່ມວນຊົນລາວ ໄດ້ປະກອບສ່ວນຢ່າງຕັ້ງໜ້າເຂົ້າໃນການໂຄສະນາ, ປຸກລະດົມ, ຂົນຂວາຍ ທົ່ວປວງຊົນລາວທັງຊາດ ໃຫ້ມີຄວາມສາມັກຄີເປັນປຶກແຜ່ນ ດ້ວຍຄວາມຕື່ນຕົວ ເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ ໃຫ້ໄປຕາມແນວທາງຂອງພັກ, ລັດວາງອອກໃນແຕ່ລະໄລຍະ. ສື່ມວນຊົນລາວ ກໍຄືນັກຂ່າວ, ນັກຂຽນ, ນັກປະພັນແມ່ນເຮັດໜ້າທີ່ຮັບໃຊ້ພັກ, ລັດ ແລະ ປະຊາຊົນປະຕິບັດຕາມວຽກງານທີ່ໄດ້ຖືກມອບໝາຍຈາກຂັ້ນເທິງ ດ້ວຍຜົນສໍາເລັດເປັນກ້າວໆ, ປັດຈຸບັນ, ສື່ມວນຊົນ ຍິ່ງມີບົດບາດໃນການຊອກຮູ້ຮໍ່າຮຽນ, ຊອກຂໍ້ມູນຂ່າວສານຕ່າງໆທີ່ຍອດຍິ່ງ ເພື່ອໂຄສະນາເຜີຍແຜ່ດ້ວຍຫຼາຍຊ່ອງທາງ ໃຫ້ສັງຄົມໄດ້ຮັບຮູ້ ແລະ ນໍາໄປໜູນໃຊ້ເຂົ້າໃນຊີວິດຕົວຈິງ ຜ່ານທາງອອນລາຍ, ເຟສບຸກ, ເວັບໄຊ, ຕິກຕ໋ອກ, ໜັງສືພິມສະບັບເຈັ້ຍ, ວາລະສານ ແລະ ສື່ສັງຄົມອື່ນໆ. ສື່ມວນຊົນລາວ ແມ່ນກະບອກສຽງຂອງພັກ ເຄື່ອນໄຫວວຽກງານໂຄສະນາຕາມແນວທາງຂອງພັກ, ລັດ, ຕ້ານ ແລະ ສະກັດກັ້ນທຸກຖ້ອຍທໍານອງທີ່ບິດເບືອນຄວາມຈິງ ໃນສັງຄົມ. ດັ່ງຄໍາເວົ້າຂອງທ່ານ ທອງລຸນ ສີສຸລິດ ກ່າວໃນພິທີໂຮມຊຸມນຸມສະຫຼອງວັນສື່ມວນຊົນ ແລະ ການພິມຈໍາໜ່າຍ ຄົບຮອບ 70 ປີ (13 ສິງຫາ 1950-13 ສິງຫາ 2020) ວ່າ: “ສື່ມວນຊົນ ແມ່ນຜູ້ກ້າປາກອອກແສງ, ຜູ້ທີ່ແທງເຖິງໃຈ, ຜູ້ສະດຸ້ງໄວເມື່ອອ່ານ, ຜູ້ທີ່ກ້າຜ່ານອຸປະສັກ, ຜູ້ທີ່ຮັກຄວາມຈິງ, ຜູ້ທີ່ຍິງຖືກເປົ້າ”.
ທ່ານ ສີວັນ ຫອມໄຊຍະເດດ ກ່າວຕື່ມວ່າ: ກ້າວເຂົ້າສູ່ໄລຍະໃໝ່ ກໍຄືໃນຕໍ່ໜ້າ ສິ່ງທີ່ສື່ມວນຊົນ ຈະຕ້ອງໄດ້ເອົາໃຈໃສ່ແມ່ນສືບຕໍ່ສຶກສາ, ຄົ້ນຄວ້າ, ຮໍ່າຮຽນເອົາຄວາມຮູ້, ເຕັກນິກໄໝ່ໆ, ວິທະຍາ ສາດໃຫ້ຫຼາຍ ເພື່ອເຮັດເປັນຂ່າວ-ບົດ ລົງໃນໜັງສືພິມ, ເຟສບຸກ, ເວບໄຊສ ວ່ອງໄວ ທັນການ ແລະ ກວ້າງຂວາງ, ເພື່ອໃຫ້ສັງຄົມໄດ້ສຶກສາ, ຮຽນຮູ້ ເຮັດໃຫ້ເກີດຜົນເປັນຈິງ; ເພີ່ມທະວີການຕອບໂຕ້ຖ້ອຍ ທໍານອງບິດເບືອນຂອງກຸ່ມຄົນບໍ່ດີ, ພ້ອມທັງປຸກລະດົມທົ່ວສັງຄົມ ເຂົ້າໃນການປ້ອງກັນຊາດ-ປ້ອງກັນຄວາມສະຫງົບ ແລະ ສ້າງສາປະເທດຊາດ ໃຫ້ຈະເລີນຮຸ່ງເຮືອງຍືນຍົງ.
ຄໍາເຫັນ