ອາຫານລາວພື້ນບ້ານ ເນັ້ນສຸຂະພາບ ສືບສານພູມປັນຍາທ້ອງຖິ່ນ

ໃນງານນິເທດສະການ “ຄຸນຄ່າພູມປັນຍາລາວ” ຄັ້ງທີ 1, ທ່ານນາງ ມ່ອງ ບົວຄໍາດີ ຜູ້ຮັບຜິດຊອບກິດຈະກຳ ສຶກສານອກລະບົບຂອງສະມາຄົມຄຸນຄ່າລາວ ໄດ້ນໍາສະເໜີແນວທາງການສົ່ງເສີມອາຊີບ ຜ່ານການເຮັດອາຫານລາວພື້ນບ້ານ ໂດຍເນັ້ນທັງຄຸນຄ່າຂອງອາຫານທ້ອງຖິ່ນ ແລະ ການໃສ່ໃຈຕໍ່ສຸຂະພາບຂອງຜູ້ບໍລິໂພກ ໄດ້ໃຫ້ສໍາພາດ ວ່າ: ອາຫານທີ່ນໍາມາຈັດສະແດງພາຍໃນງານ ເນັ້ນໃຫ້ເຫັນພູມປັນຍາແບບດັ້ງເດີມຂອງຄົນລາວ ໂດຍເລືອກນໍາໃຊ້ວັດຖຸດິບທີ່ຫາໄດ້ໃນທ້ອງຖິ່ນ ແລະ ປຸງແຕ່ງແບບອາຫານລາວ, ໃນນັ້ນ ມີອາຫານຈາກປາ ເຊັ່ນ: ໝົກປາ, ຍໍາຜັກລວມ, ເຂົ້າທັນຍາພືດ ແລະ ອື່ນໆ. ການປຸງແຕ່ງອາຫານ ແມ່ນບໍ່ໃສ່ນໍ້າຕານ, ກະທິ, ປາແດກ ແລະ ແປ້ງນົວ ແຕ່ເນັ້ນລົດຊາດ ຈາກວັດຖຸດິບທຳມະຊາດ ທັງນີ້ ກໍເພື່ອໃຫ້ອາຫານລາວ ສາມາດເປັນອາຫານທີ່ຮັບປະທານໄດ້ຢ່າງເໝາະສົມ ແລະ ດີຕໍ່ສຸຂະພາບຂອງຜູ້ບໍລິໂພກ. ສໍາລັບຊ່ອງທາງການຈຳໜ່າຍອາຫານດັ່ງກ່າວແມ່ນຢູ່ຕະຫຼາດປອດສານພິດ ແລະ ຮັບເຮັດຕາມຄໍາສັ່ງຂອງລູກຄ້າໂດຍສະເພາະໃນງານບຸນ, ງານສັງສັນຕ່າງໆ. ການຮັບເຮັດອາຫານຕາມຄໍາສັ່ງ ແມ່ນເປັນອີກຊ່ອງທາງໜຶ່ງ ທີ່ສາມາດສ້າງອາຊີບ ແລະ ລາຍໄດ້ໃຫ້ແກ່ຜູ້ເຮັດອາຫານ ສໍາລັບລາຄາອາຫານ ມີຫຼາຍລະດັບ ຂຶ້ນຕາມປະເພດ ແລະ ຂະໜາດຂອງອາຫານ ຊຶ່ງເລີ່ມຕົ້ນ 20.000 ກີບຂຶ້ນໄປ.

ທ່ານນາງ ມ່ອງ ບົວຄໍາດີ ກ່າວຕື່ມວ່າ: ການນໍາອາຫານລາວພື້ນບ້ານມາຈັດສະແດງໃນງານຄັ້ງນີ້ບໍ່ພຽງແຕ່ເປັນການນໍາສະເໜີເມນູອາຫານເທົ່ານັ້ນ ແຕ່ຍັງເປັນການເຜີຍແຜ່ພູມປັນຍາການປຸງແຕ່ງອາຫານລາວ ແລະ ສົ່ງຕໍ່ຄຸນຄ່າອາຫານພື້ນບ້ານໄປສູ່ຄົນຮຸ່ນໃໝ່ ພ້ອມນີ້ ສະມາຄົມຄຸນຄ່າອາຫານລາວ ຍັງເນັ້ນການສຶກສານອກລະບົບ ແລະ ການສົ່ງເສີມອາຊີບໂດຍນຳໃຊ້ທັກສະດ້ານອາຫານເປັນແນວທາງໜຶ່ງໃນການສ້າງອາຊີບ ການເນັ້ນອາຫານລາວທີ່ໃສ່ໃຈຕໍ່ສຸຂະພາບຈຶ່ງເປັນທັງການອະນຸລັກພູມປັນຍາ ອາຫານພື້ນບ້ານ ແລະ ຕໍ່ຍອດເປັນອາຊີບໃນຊຸມຊົນ. ການດໍາເນີນງານດັ່ງກ່າວ ຖືເປັນອີກແນວທາງໜຶ່ງໃນການນໍາເອົາພູມປັນຍາຈາກວິຖີຊີວິດດັ້ງເດີມ ມາປັບໃຊ້ໃຫ້ແທດເໝາະກັບສັງຄົມປັດຈຸບັນ ທັງໃນດ້ານສຸຂະພາບ, ການສ້າງອາຊີບ ແລະ ການສືບສານອາຫານລາວໃຫ້ຄົງຢູ່ຕໍ່ໄປ.

ເພື່ອຢາກໃຫ້ອາຫານ, ການດໍາລົງຊີວິດແບບລາວໆ ຍັງຄົງຢູ່ກັບຄົນລາວສືບຕໍ່ໄປຍາວນານ ທຸກຄົນໃນສັງຄົມ ຕ້ອງຮ່ວມແຮງຮ່ວມໃຈກັນອະນຸລັກ ດ້ວຍການສົ່ງເສີມ, ປົກປັກຮັກສາ, ນໍາໃຊ້, ທ່າແຮງທີ່ມີພາຍໃນປະເທດ ໃຫ້ເກີດປະໂຫຍດສູງສຸດ.