ຂ່າວລະບຸວ່າ: ຈາກແບບສຳຫຼວດທາງອອນລາຍ, ທີ່ໄດ້ສອບຖາມຜູ້ຄົນຈາກ 20 ປະເທດທີ່ເຄີຍເດີນທາງໄປຫຼາຍປະເທດກ່ຽວກັບສະຖານທີ່ທີ່ຢາກກັບໄປຢ້ຽມຢາມອີກຄັ້ງ ພົບວ່າ: ຍີ່ປຸ່ນໄດ້ຮັບຄະແນນສູງສຸດ 52.7%, ຮອງລົງມາແມ່ນ ສ ເກົາຫຼີ 20.0% ແລະ ສະຫະລັດ ອາເມຣິກາ 16.6%.
ຄວາມສົນໃຈໃນອາຫານ ແລະ ສິນຄ້າຂອງຍີ່ປຸ່ນ, ລວມເຖິງຄຸນນະພາບຂອງສິນຄ້າມືສອງ ມີຄະແນນສູງກວ່າອັດຕາແລກປ່ຽນເງິນເຢນທີ່ອ່ອນຄ່າ ຊຶ່ງມັກຈະຖືກອ້າງວ່າເປັນສາເຫດທີ່ເຮັດໃຫ້ຈຳນວນນັກທ່ອງທ່ຽວເພີ່ມຂຶ້ນ.
ສິນຄ້າທີ່ຂາຍດີທີ່ສຸດໃນຮ້ານສະດວກຊື້ໃນຍີ່ປຸ່ນແມ່ນຊູຊິ 46.9%, ກະແລັມ 45.1%, ເຂົ້າປັ້ນ ແລະ ຂະໜົມຫວານ 43.3%.
ຜົນການສໍາຫຼວດ ຊຶ່ງຈັດຂຶ້ນໃນລະຫວ່າງເດືອນພຶດສະພາ ຫາ ເດືອນມິຖຸນາ ຜ່ານມາ, ມີຜູ້ເຂົ້າຮ່ວມຕອບແບບສອບຖາມ 12,400 ຄົນ ຈາກອົສຕຣາລີ, ອັງກິດ, ການາດາ, ຈີນ, ຝຣັ່ງ, ເຢຍລະມັນ, ຮົງກົງ, ອິນເດຍ, ອິນໂດເນເຊຍ, ອີຕາລີ, ມາເລເຊຍ, ຟີລິບປິນ, ຊາອຸດິດ ອາຣັບບີ, ສິງກະໂປ, ສ ເກົາຫຼີ, ແອັດສະປາຍ, ແຄວ້ນໄຕ້ຫວັນ, ໄທ, ຫວຽດນາມ ແລະ ສະຫະລັດ ອາເມຣິກາ.
ໃນບັນດາ 47 ແຂວງຂອງຍີ່ປຸ່ນ, ໂຕກຽວ, ຮອກໄກໂດ, ໂອຊາກາ ແລະ ກຽວໂຕ ເປັນແຂວງທີ່ນັກທ່ອງທ່ຽວຮູ້ຈັກຫຼາຍທີ່ສຸດ ແລະ ມີປະສົບການການທ່ອງທ່ຽວທີ່ດີທີ່ສຸດເມື່ອທຽບກັບແຂວງອື່ນໆ.
ອັດຕາສ່ວນນັກທ່ອງທ່ຽວທີ່ໄປຢ້ຽມຢາມເຂດຊົນນະບົດຂອງຍີ່ປຸ່ນແຕ່ບໍ່ໄດ້ໄປຢ້ຽມຢາມໂຕກຽວ, ນາໂກຢາ, ໂອຊາກາ ຫຼື ກຽວໂຕ ມີຈຳນວນນ້ອຍ.
ສຳລັບຜູ້ທີ່ໄປຢ້ຽມຢາມຊົນນະບົດ, 96.2% ພໍໃຈກັບປະສົບການ ແລະ 93.4% ຕ້ອງການກັບໄປຢ້ຽມຢາມອີກ.
ຜູ້ຮັບຜິດຊອບການສຳຫຼວດ ຂອງ ບໍລິສັດ Dentsu ກ່າວວ່າ: ຊົນນະບົດມີຄວາມສາມາດສູງສຳລັບການທ່ອງທ່ຽວ, ແຕ່ຍັງມີສິ່ງທ້າທາຍທີ່ຕ້ອງໄດ້ຮັບການແກ້ໄຂ.
ຕາມການສຳຫຼວດ, ບັນຫາທີ່ເຮັດໃຫ້ຜູ້ຄົນບໍ່ໄປຢ້ຽມຢາມຊົນນະບົດໄດ້ແກ່ ຂາດສັນຍານ Wi-Fi, ການຮອງຮັບຫຼາຍພາສາບໍ່ພຽງພໍ ແລະ ການເຂົ້າເຖິງບໍ່ສະດວກ.
ຄໍາເຫັນ