ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ມະຫາວິທະຍາໄລເສດຖະສາດ ແລະ ລັດຖະສາດແຫ່ງລອນດອນ (LSE) ໄດ້ເຮັດການສຳຫຼວດອົງກອນຂ່າວຫຼາຍກວ່າ 100 ແຫ່ງ ຈາກ 46 ປະເທດ ກ່ຽວກັບການໃຊ້ປັນຍາປະດິດ (AI) ແລະ ເຕັກໂນໂລຊີທີ່ກ່ຽວຂ້ອງໃນລະຫວ່າງເດືອນເມສາ-ກໍລະກົດ ທີ່ຜ່ານມາ ລະບຸວ່າ: AI ເປັນທັງໄພຂົ່ມຂູ່ ແລະ ໂອກາດສຳລັບວົງການສື່ສານມວນຊົນ ໂດຍຜູ້ຕອບແບບສອບຖາມລະບຸວ່າ: ພວກເຂົາມີຄວາມກັງວົນກ່ຽວກັບຜົນກະທົບທາງຈະລິຍະທຳຕໍ່ຜົນງານຂອງພວກເຂົາ.
ທີມນັກວິໄຈທີ່ເຮັດແບບສອບຖາມລະບຸວ່າ: ຜູ້ຕອບແບບສອບຖາມຫຼາຍກວ່າ 60% ຊີ້ໃຫ້ເຫັນເຖິງຄວາມກັງວົນຜົນກະທົບທາງຈະລິຍະທຳຂອງ AI ທີ່ມີຕໍ່ຄຸນຄ່າດ້ານສື່ມວນຊົນ ບໍ່ວ່າຈະເປັນຄວາມຖືກຕ້ອງ, ຄວາມຍຸຕິທຳ ແລະ ຄວາມໂປ່ງໃສ ລວມເຖິງແງ່ມຸມອື່ນໆຂອງການສື່ສານມວນຊົນ. ທ່ານ ຊາລີ ເບກເກດ ຜູ້ອຳນວຍການໂຄງການ ແລະ ຜູ້ຂຽນບົດລາຍງານຮ່ວມກ່າວວ່າ: ວົງການສື່ສານມວນຊົນທົ່ວໂລກກຳລັງປະເຊີນກັບໄລຍະເວລາຂອງການປ່ຽນແປງທາງເຕັກໂນໂລຊີ ແລະ ເປັນທີ່ໜ້າກັງວົນ ເນື່ອງຈາກຜົນການສຶກສາສະແດງໃຫ້ເຫັນວ່າ AI ສຳລັບການສ້າງຄອນເທັນ (Content) ແບບໃໝ່ມີທັງໄພຂົ່ມຂູ່ຕໍ່ຄວາມສົມບູນຂອງຂໍ້ມູນ ແລະ ເປັນໂອກາດໃນການເຮັດໃຫ້ສື່ມວນຊົນມີປະສິດທິພາບ, ປະສິດທິຜົນ ແລະ ຄວາມໜ້າເຊື່ອຖືຫຼາຍຂຶ້ນ. ເຖິງແມ່ນວ່ານັກຂ່າວຫຼາຍທ່ານຄິດເຖິງປະໂຫຍດຂອງ AI ກ່ຽວກັບການປະຢັດເວລາໃນການເຮັດວຽກເຊັ່ນ: ການຖອດສຽງອອກຈາກບົດສຳພາດ ແຕ່ພວກເຂົາຊີ້ໃຫ້ເຫັນວ່າເນື້ອໃນທີ່ມາຈາກ AI ສຳລັບການສ້າງ Content ຈຳເປັນຕ້ອງໄດ້ຮັບການກວດສອບໂດຍມະນຸດ ເພື່ອຫຼຸດຜ່ອນຄວາມສ່ຽງຂອງອັນຕະລາຍທີ່ອາດຈະເກີດຂຶ້ນບໍ່ວ່າຈະເປັນອັກຄະຕິ ແລະ ຄວາມບໍ່ຖືກຕ້ອງ.
ນອກຈາກນີ້, ຄວາມທ້າທາຍອີກປະການໜຶ່ງທີ່ກ່ຽວຂ້ອງກັບການນຳໃຊ້ AI ຄື ຄວາມບໍ່ເທົ່າທຽມ ເນື່ອງຈາກເຕັກໂນໂລຊີ ຊຶ່ງໄດ້ຮັບການພັດທະນາໃຫ້ບໍລິການໃນພາສາອັງກິດ ນັ້ນໝາຍຄວາມວ່າຜົນປະໂຫຍດທາງດ້ານເສດຖະກິດ ແລະ ສັງຄົມຂອງ AI ຂະຫຍາຍຕົວຢູ່ໃນກຸ່ມປະເທດໂລກເໜືອ ແລະ ເກີດຄວາມເສຍຫາຍຢ່າງຫຼວງຫຼາຍຕໍ່ກຸ່ມປະເທດໂລກໃຕ້.
ຄໍາເຫັນ