ອາເມຣິກາ ໃຫ້ຄຳໝັ້ນສັນຍາປະກອບສ່ວນເງິນ 3 ຕື້ໂດລາ ແກ່ກອງທຶນດິນຟ້າອາກາດສີຂຽວ

ວິທະຍຸກະຈາຍສຽງຫວຽດນາມລາຍງານວ່າ: ເມື່ອບໍ່ດົນມານີ້, ທ່ານນາງ ຄາມາລາ ແຮຣີສ ຮອງປະທານາທິບໍດີ ອາເມຣິກາ ໃຫ້ຮູ້ວ່າ:  ອາເມຣິກາ ໃຫ້ຄຳໝັ້ນສັນຍາຈະປະກອບສ່ວນບ້ວງເງິນຈຳນວນ 3 ຕື້ໂດລາ ໃຫ້ແກ່ກອງທຶນດິນຟ້າອາກາດສີຂຽວ. ທ່ານນາງ ຄາມາລາ ແຮຣີສໄດ້ກ່າວຄຳເຫັນໃນກອງປະຊຸມຄັ້ງທີ 28 ບັນດາຝ່າຍເຂົ້າຮ່ວມສົນທິສັນຍາແມ່ຂອງ ສປຊ ກ່ຽວກັບການປ່ຽນແປງຂອງດິນຟ້າອາກາດ (COP28) ທີ່ຈັດຂຶ້ນຢູ່ ດູບາຍສະຫະລັດ ອາຣັບເອມີເຣດ. ທ່ານເນັ້ນໜັກວ່າ: ອາເມຣິກາ ຈະປະກອບສ່ວນບ້ວງເງິນດັ່ງກ່າວ ໃຫ້ແກ່ກອງທຶນດິນຟ້າອາກາດສີຂຽວ ເພື່ອແນໃສ່ຊ່ວຍເຫຼືອບັນດາປະເທດພວມພັດທະນາສາມາດສຳຜັດກັບແຫຼ່ງທຶນທີ່ເຂົາເຈົ້າຕ້ອງການ ເພື່ອລົງທຶນເຂົ້າຂົງເຂດພະລັງງານສະອາດ, ບັນດາມາດຕະການອີງໃສ່ທຳມະຊາດ ແລະ ຄວາມສາມາດຮັບມືກັບຜົນກະທົບຂອງການປ່ຽນແປງຂອງດິນຟ້າອາກາດ.
ກ່ອນໜ້ານັ້ນ, ໃນວັນທີ 5 ຕຸລາ 2023, ຄະນະບໍລິຫານກອງທຶນດິນຟ້າອາກາດ ສີຂຽວໃຫ້ຮູ້ວ່າ: ກອງທຶນນີ້ໄດ້ຮັບຄຳໝັ້ນສັນຍາຈະປະກອບສ່ວນບ້ວງເງິນ ຈຳນວນ 9,3 ຕື້ໂດລາຂອງ 25 ປະເທດໃນໂລກ, ເພື່ອຊ່ວຍເຫຼືອດ້ານການເງິນໃຫ້ແກ່ບັນດາປະເທດມີຄວາມສ່ຽງໄພສູງ ຕໍ່ໜ້າບັນດາຜົນກະທົບການປ່ຽນແປງຂອງດິນຟ້າອາກາດ.