ຂ່າວລະບຸວ່າ: ຄະນະຜູ້ແທນອາເມຣິກາ ນຳໂດຍ ທ່ານ ໂດໂນລ ລູ ຜູ້ຊ່ວຍລັດຖະມົນຕີກະຊວງການຕ່າງປະເທດ ຮັບຜິດຊອບວຽກງານອາຊີໃຕ້ ແລະ ອາຊີກາງ ແລະ ທ່ານ ເຈດເດຍ ພີ ຣໍໂຢ ຮອງຜູ້ຊ່ວຍລັດຖະມົນຕີກະຊວງປ້ອງກັນປະເທດຝ່າຍຄວາມໝັ້ນຄົງອິນໂດປາຊີຟິກ.
ຝ່າຍອິນເດຍຕາງໜ້າໂດຍ ທ່ານ ນາກາຣາຊ ໄນດູ ຜູ້ຊ່ວຍລັດຖະມົນຕີກະຊວງການຕ່າງປະເທດ ຮັບຜິດຊອບວຽກງານທະວີບອາເມຣິກາ ແລະ ທ່ານ ວີດເວສ ເນກິ ຜູ້ຊ່ວຍລັດຖະມົນຕີກະຊວງປ້ອງກັນປະເທດ ຮັບຜິດຊອບວຽກງານການຮ່ວມມືສາກົນ.
ຖະແຫຼງການຂອງກະຊວງການຕ່າງປະເທດ ອາເມຣິກາ ໃຫ້ຮູ້ວ່າ: ໃນການເຈລະຈາ, ສອງຝ່າຍໄດ້ປຶກສາຫາລືກ່ຽວກັບການຊຸກຍູ້ບັນດາບຸລິມະສິດຮ່ວມ, ໃນນັ້ນມີການຮ່ວມມືດ້ານປ້ອງກັນປະເທດ, ການຮ່ວມມືການບິນພົນລະເຮືອນ ແລະ ອະວະກາດ, ພະລັງງານສະອາດ ແລະ ການປະສານງານດ້ານອຸດສາຫະກຳ ແລະ ຂົນສົ່ງ.
ສອງຝ່າຍຍັງໄດ້ປຶກສາຫາລືກ່ຽວກັບບັນຫາພາກພື້ນ ແລະ ໂລກ, ໃນນັ້ນມີການສະໜັບສະໜູນສັນຕິພາບທີ່ທ່ຽງທຳ ແລະ ຍືນຍົງ, ສະໜັບສະໜູນການຊ່ວຍເຫຼືອດ້ານມະນຸດສະທຳ.
ກອງປະຊຸມສົນທະນາ 2+2 ໄລຍະກາງ ແມ່ນການເຄື່ອນໄຫວກະກຽມໃຫ້ແກ່ການເຈລະຈາຂັ້ນລັດຖະມົນຕີ 2+2 ລະຫວ່າງ ອາເມຣິກາ ແລະ ອິນເດຍ ໃນສະພາບການທີ່ 2 ປະເທດພວມສືບຕໍ່ຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານ.
ຄໍາເຫັນ