ຂ່າວຕ່າງປະເທດລາຍງານວ່າ: ສຳນັກຂ່າວທີ່ຂຶ້ນກັບກະຊວງນ້ຳມັນອີຣານ ລາຍງານໃນທີ 27 ທັນວາ ຜ່ານມາວ່າ: ອີຣານ ແລະ ອີຣັກ ໄດ້ເຊັນບົດບັນທຶກຄວາມເຂົ້າໃຈກ່ຽວກັບການຝຶກອົບຮົມກຳມະກອນໃນຂະແໜງການນ້ຳມັນ. ພິທີດັ່ງກ່າວຈັດຂຶ້ນຢູ່ນະຄອນຫຼວງເຕເຮຣານ ຂອງອີຣານ, ຕາງໜ້າຝ່າຍອີຣານແມ່ນທ່ານ ເມດດີ ອາລີ ມາດາດີ ຮອງລັດຖະມົນຕີກະຊວງນ້ຳມັນ ຜູ້ຮັບຜິດຊອບການຄຸ້ມຄອງ ແລະ ການພັດທະນາຊັບພະຍາກອນມະນຸດອີຣານ ແລະ ຝ່າຍອີຣັກ ແມ່ນທ່ານ ບັດຊີມ ໂມຮາເມັດ ກູເດຍ ຮອງລັດຖະມົນຕີກະຊວງນ້ຳມັນຜູ້ຮັບຜິດຊອບວຽກງານຂຸດຄົ້ນນ້ຳມັນ. ທ່ານ ຈາວັດ ໂອຈີ ລັດຖະມົນຕີກະຊວງນ້ຳມັນອີຣານ ແລະ ທ່ານ ຮາຢັນ ອັບເດວການີ ລັດຖະມົນຕີກະຊວງນ້ຳມັນອີຣັກໄດ້ເຂົ້າຮ່ວມໃນພິທີເຊັນສັນຍາດັ່ງກ່າວ.
ໃນບົດບັນທຶກ, ໄດ້ກຳນົດໃຫ້ຈັດຕັ້ງປະຕິບັດວຽກງານໃນສອງສາມອາທິດຂ້າງໜ້າ, ສອງຝ່າຍໄດ້ເຫັນດີໃຫ້ມີການຈັດຝຶກອົບຮົມພະນັກງານທີ່ສັງກັດກະຊວງນ້ຳມັນຂອງສອງປະເທດ, ເລີ່ມຄົ້ນຄວ້າກ່ຽວກັບການຮ່ວມມື ແລະ ການຈັດກອງປະຊຸມທາງອອນລາຍ.
ໃນມື້ດຽວກັນໄດ້ມີການພົບປະກັນລະຫວ່າງຄະນະຜູ້ແທນສອງຝ່າຍ, ທ່ານ ໂອຈີ ກ່າວວ່າ: ອີຣານ ແລະ ອີຣັກ ຄວນຈັດຕັ້ງປະຕິບັດໂຄງການຂະໜາດໃຫຍ່ຮ່ວມກັນບົນພື້ນຖານອ່າງນ້ຳມັນ ແລະ ແກັສທຳມະຊາດຂະໜາດໃຫຍ່ຂອງສອງລັດ ເພື່ອຜົນປະໂຫຍດຂອງສອງຝ່າຍ.
ທ່ານ ອັບເດວ ການີ ກ່າວວ່າ: ອີຣັກ ໄດ້ສົ່ງເສີມໃຫ້ບໍລິສັດອີຣານເຂົ້າມາມີສ່ວນຮ່ວມໃນໂຄງການຕ່າງໆຂອງອີຣັກ, ລວມທັງການພັດທະນາຂົງເຂດນ້ຳມັນ. ລັດຖະມົນຕີອີຣັກໄດ້ສະເໜີລາຍການການລົງທຶນຮ່ວມກັນໃນການຜະລິດແກັສ ແລະ ການສ້າງໂຮງກັ່ນ ຊຶ່ງແມ່ນຂົງເຂດທີ່ສອງຝ່າຍມີທ່າແຮງໃນການຮ່ວມມືກັນ.
ກ່າວໃຫ້ສຳພາດນັກຂ່າວຫຼັງການພົບປະກັນ, ທ່ານ ໂອຈີ ກ່າວວ່າ: ອີຣານໄດ້ກຽມພ້ອມຢ່າງເຕັມສ່ວນໃນການຊ່ວຍອີຣັກພັດທະນາອຸດສາຫະກຳນ້ຳມັນຂອງຕົນ ຕັ້ງແຕ່ການສຳຫຼວດຂຸດຄົ້ນຈົນເຖິງການແປຮູບເປັນຜະລິດຕະພັນສຳເລັດຮູບ. ທ່ານກ່າວໃນເວລາພົບປະກັນວ່າ ສອງຝ່າຍໄດ້ບັນລຸສັນຍາທີ່ໜ້າພໍໃຈໃນຂົງເຂດການສຳຫຼວດ, ການພັດທະນາບໍ່ນໍ້າມັນຮ່ວມກັນ, ການສ້າງສາ ແລະ ການສ້ອມແປງໂຮງກັ່ນຂອງອີຣັກຄືນໃໝ່ໂດຍການຊ່ວຍເຫຼືອຈາກຜູ້ຊ່ຽວຊານອີຣານ.
ຄໍາເຫັນ