ເປີດເຜີຍຈຳນວນຜູ້ເສຍຊີວິດຈາກພະຍາດໄຂ້ເລືອດອອກໃນວັນທີ 2 ພະຈິກຜ່ານມາ ມີເຖິງ10ຄົນ ຊຶ່ງຖືເປັນຈຳນວນຜູ້ເສຍຊີວິດລາຍວັນສູງທີ່ສຸດ ແລະ ເຮັດໃຫ້ຈຳນວນຜູ້ເສຍຊີວິດ ລວມທັງໝົດ310 ຄົນ.
ລາຍງານລະບຸວ່າ: ພົບຜູ້ຕິດເຊື້ອພະຍາດໄຂ້ເລືອດອອກກໍລະນີໃໝ່1,348 ຄົນ ໃນ 24 ຊົ່ວໂມງ ເມື່ອນັບເຖິງເວລາ 8:00 ໂມງ ຂອງວັນທີ 2 ພະຈິກຜ່ານມາ ຕາມເວລາທ້ອງຖິ່ນ ສົ່ງຜົນເຮັດໃຫ້ຄົນເຈັບພະຍາດໄຂ້ເລືອດອອກໃນບັງກລາເທດໃນປີນີ້ເພີ່ມຂຶ້ນເປັນ63,165 ຄົນ, ໂດຍມີຜູ້ເສຍຊີວິດຈາກພະຍາດດັ່ງກ່າວໃນເດືອນກໍລະກົດ 12 ຄົນ, ສິງຫາ 27 ຄົນ, ກັນຍາ 80 ຄົນ ແລະ ເດືອນຕຸລາ 134 ຄົນ.
ໃນປີ 2023 ບັງກລາເທດ ພົບຜູ້ເສຍຊີວິດຈາກພະຍາດໄຂ້ເລືອດອອກ 1,705 ຄົນຊຶ່ງຖືວ່າເປັນຈຳນວນຜູ້ເສຍຊີວິດຕໍ່ປີສູງທີ່ສຸດ ເມື່ອທຽບກັບຈຳນວນຜູ້ເສຍຊີວິດຈາກພະຍາດນີ້ໃນປີ 2022 ມີ 281 ຄົນ ແລະ ໃນປີ 2019ມີ179 ຄົນ.
ໄຂ້ເລືອດອອກເປັນພະຍາດຈາກເຊື້ອໄວຣັດທີ່ແຜ່ລາມຈາກການຖືກຍຸງລາຍທີ່ມີເຊື້ອກັດ ສົ່ງຜົນໃຫ້ເຈັບປ່ວຍກະທັນຫັນ ແລະ ມີອາການເຈັບຫົວ, ໄຂ້ຂຶ້ນສູງ, ປວດເມື່ອຍອ່ອນເພຍ, ປວດກ້າມຊີ້ນ ແລະ ຂໍ່ ຢ່າງຮຸນແຮງ, ຕ່ອມນໍ້າເຫຼືອງໃຫຍ່, ປວດຮາກ ແລະ ມີຕຸ່ມຂຶ້ນຕາມຜິວໜັງ.
ເພື່ອຕໍ່ສູ້ກັບຈຳນວນຄົນເຈັບໄຂ້ເລືອດອອກທີ່ເພີ່ມຂຶ້ນ ເຈົ້າໜ້າທີ່ສາທາລະນະສຸກຂອງບັງກລາເທດໄດ້ເພີ່ມມາດຕະການເພື່ອກວດສອບການແຜ່ພັນຂອງຍຸງ ແລະ ດຳເນີນການປ້ອງກັນໜອນນໍ້າ.
ຄໍາເຫັນ