 |
ທ່ານ ຈັນທະລາ ສຸກສາຄອນ ກ່າວວ່າ: ການຈັດກິດຈະກໍາຮັບບໍລິຈາກເລືອດ ເພື່ອເປັນການສ້າງຂະບວນການຂໍ່ານັບຊົມເຊີຍຕ້ອນຮັບວັນສໍາຄັນຕ່າງໆຂອງພັກ-ຂອງຊາດເປັນຕົ້ນວັນສ້າງຕັ້ງແນວລາວສ້າງຊາດ ຄົບຮອບ 76 ປີ ແລະ ເພື່ອເປັນການສືບຕໍ່ເສີມຂະຫຍາຍມູນເຊື້ອສາມັກຄີເປັນປຶກແຜ່ນຂອງແນວລາວອິດສະຫຼະ ແລະ ແນວລາວຮັກຊາດໃນເມື່ອກ່ອນ ໃນການຕໍ່ສູ້ກູ້ຊາດ ກໍຄືແນວລາວສ້າງຊາດໃນປັດຈຸບັນ. ໃນການເຕົ້າໂຮມຄວາມສາມັກຄີ ເພື່ອພ້ອມກັນປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຈະເລີນສີວິໄລເທື່ອລະກ້າວ; ກິດຈະກໍາຮັບບໍລິຈາກເລືອດ ແມ່ນກິດຈະກໍາໜຶ່ງທີ່ສໍາຄັັນໃນການປະກອບສ່ວນຊ່ວຍເຫຼືອຄົນເຈັບທີ່ນອນປິ່ນປົວຢູ່ຕາມໂຮງໝໍທົ່ວປະເທດຢ່າງຕໍ່ເນື່ອງນັບແຕ່ສູນກາງຮອດທ້ອງຖິ່ນ, ກິດຈະກໍາບໍລິຈາກເລືຶອດດັ່ງກ່າວເປັນການສະແດງເຖິງຄວາມເອົາໃຈໃສ່ຂອງຄະນະນໍາ ສນຊໃນແຕ່ລະຂັ້ນທີ່ເຫັນໄດ້ຄວາມສໍາຄັນໃນການໃຫ້ເລືອດໃຫ້ຊີວິດໄດ້ກາຍເປັນຕົວແບບໃຫ້ໜ່ວຍງານອື່ນໆໃນສັງຄົມໃນການປະກອບສ່ວນປຸກລະດົມຮັບບໍລິຈາກເລືອດເພື່ອຮັບປະກັນຕອບສະໜອງເລືອດໃຫ້ຄົນເຈັບທີ່ນອນປິ່ນປົວຢູ່ຕາມໂຮງໝໍທົ່ວປະເທດ.
 |
ໂອກາດນີ້, ທ່ານຮອງປະທານ ສນຊ ໄດ້ກ່າວສະແດງຄວາມຊົມເຊີຍຕໍ່ຄະນະຮັບຜິດຊອບທີ່ໄດ້ສ້າງກິດຈະກຳທີ່ມີຄວາມໝາຍສຳຄັນນີ້ຂຶ້ນ ຊຶ່ງເປັນການເຊີດຊູຄຸນງາມຄວາມດີຂອງອະດີດການນຳແນວລາວສ້າງຊາດ ທີ່ໄດ້ເປັນແບບຢ່າງໃຫ້ພວກເຮົາ ໃນການເສຍສະຫຼະເພື່ອຜົນປະໂຫຍດສ່ວນລວມ ແລະ ສັງຄົມ; ຂອບໃຈອົງການກາແດງລາວ, ເຈົ້າໜ້າທີ່ສູນບໍລິຈາກເລືອດ ແລະ ຄະນະແພດໝໍທີ່ໄດ້ອຳນວຍຄວາມສະດວກ ແລະ ໃຫ້ການຮ່ວມມືຢ່າງເອົາໃຈໃສ່ ແລະ ຂອບໃຈເປັນພິເສດດ້ວຍຄວາມຈິງໃຈຕໍ່ບັນດາອາສາສະໝັກ ແລະ ຜູ້ບໍລິຈາກເລືອດທຸກທ່ານ ທີ່ໄດ້ເສຍສະຫຼະເລືອດເນື້ອຂອງຕົນເອງດ້ວຍຄວາມເຕັມໃຈເພື່ອສ່ວນລວມ ເຮັດໃຫ້ຂະບວນການຮັບບໍລິຈາກເລືອດຊ່ວຍຊີວິດໃນຄັ້ງນີ້ໄດ້ຈັດຕັ້ງປະຕິບັດ, ການບໍລິຈາກເລືອດຄັ້ງນີ້ໄດ້ເລືອດຈຳນວນ30 ຖົງ; ພ້ອມດຽວກັນນີ້, ຍັງໄດ້ມອບໃບຍ້ອງຍໍໃຫ້ຜູ້ທີ່ອາສາສະໝັກ ແລະ ຜູ້ບໍລິຈາກເລືຶອດທີ່ໄດ້ປະກອບສ່ວນເຂົ້າໃນກິດຈະກໍາຄັ້ງນີ້ຕື່ມອີກ.
ຂ່າວ-ພາບ: ໄຊວ່າງ
ຄໍາເຫັນ