ບໍລິຄໍາໄຊ ປະຕິບັດວາລະແຫ່ງຊາດ ມີຜົນສໍາເລັດຫຼາຍວຽກງານ

ໃນໄລຍະແຕ່ປີ 2021-2023 ຜ່ານມາແຂວງບໍລິຄໍາໄຊໄດ້ຕັ້ງໜ້າຜັນຂະຫຍາຍມະຕິວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນຂອງລັັດຖະບານ ໂດຍຜັນຂະຫຍາຍ ເປັນ 5ຄາດໝາຍໃຫຍ່ຄື ຄາດໝາຍອັດຕາການຂະຫຍາຍຕົວຂອງເສດຖະກິດ, ການຄຸ້ມຄອງມະຫາພາກ, ຄ່ອງຕົວ ແລະ ຫຼຸດຜ່ອນຄວາມບອບບາງຕ່າງໆດ້ານເສດຖະກິດ ປະຕິບັດບັນລຸຄາດໝາຍ  ຮອດປີ 2023ສາມາດແກ້ໄຂບັນຫາຄວາມຫຍຸ້ງຍາກດ້ານງົບປະມານລັດໄດ້ໂດຍພື້ນຖານ ແລະ ເລີ່ມເຂົ້າສູ່ການສ້າງຄວາມເຂັ້ມແຂງ ປະຕິບັດບັນລຸຄາດໝາຍ  ສູ້ຊົນຫຼຸດຜ່ອນແກ້ໄຂພັນທະໜີ້ສິນພາຍໃນ ທີ່ຕິດພັນກັບງົບປະມານໃຫ້ຫຼຸດລົງເທື່ອລະກ້າວ ມີຄວາມຄືບໜ້າ ແຕ່ບໍ່ບັນລຸຕາມແຜນ  ສ້າງຄວາມເຂັ້ມແຂງໃຫ້ລະບົບສະຖາບັນການເງິນ ແລະ ສົ່ງເສີມການເຂົ້າເຖິງການບໍລິການດ້ານການເງິນໃຫ້ມີປະສິດທິຜົນສູງຂຶ້ນ ມີຄວາມຄືບໜ້າ ແຕ່ບໍ່ບັນລຸຕາມແຜນ ແລະ ຄາດໝາຍ  ຍົກສູງປະສິດຕິພາບໃນການຄຸ້ມຄອງລັດ ແລະ ເສດຖະກິດ-ສັງຄົມ ປະຕິບັດບັນລຸຄາດໝາຍ; ໄປພ້ອມກັນນີ້ກໍໄດ້ຮັບການຈັດຕັ້ປະຕິບັດ 4ວຽກງານຈຸດສຸມ:ຈຸດສຸມທີ 1: ສົ່ງເສີມການຜະລິດເພື່ອທົດແທນການນໍາເຂົ້າ ແລະ ເປັນສິນຄ້າສົ່ງອອກ ເພື່ອສ້າງຖານລາຍຮັບ ທີ່ເຂັ້ມແຂງ-ຍືນຍົງ.ຈຸດສຸມທີ 2: ສ້າງຄວາມເຂັ້ມແຂງດ້ານການເກັບລາຍຮັບງົບປະມານ.ຈຸດສຸມທີ 3: ສົ່ງເສີມການປະຢັດ, ຕ້ານການຟຸມເຟືອຍ, ຍົກສູງປະສິດທິຜົນການລົງທຶນ-ລາຍຈ່າຍງົບປະມານພາຍໃນ-ຕ່າງປະເທດ ແລະ ການແກ້ໄຂໜີ້ສິນ.ຈຸດສຸມທີ 4: ຍົກສູງປະສິດທິພາບການຄຸ້ມຄອງລັດດ້ວຍກົດໝາຍ.
ທ່ານ ກອງແກ້ວ ໄຊສົງຄາມ ເຈົ້າແຂວງ ບໍລິຄໍາໄຊ ລາຍງານຕໍ່ກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງ ຊຸດທີ II ໃນ ທ້າຍເດືອນທັນວາ 2023 ຜ່ານມານີ້ວ່າ: ຜ່ານການຈັດຕັ້ງປະຕິບັດວາລະແຫ່ງຊາດ ມາຮອດປັດຈຸບັນເຫັນໄດ້ວ່າ ມີຫຼາຍວຽກງານປະສົບຜົນສໍາເລັດຢ່າງໜ້າພາກພູມໃຈເຊັນ: ວຽກງານກະສິກໍາ ແລະ ປ່າໄມ້ການຜະລິດເຂົ້າ ປະຕິບັດໄດ້ 40.485 ຮຕ, ເທົ່າກັບ 99,74% ຂອງແຜນປີ (ແຜນປີ 40.590 ຮຕ). ໃນນີ້: ນາແຊງ 1.632 ຮຕ ເທົ່າກັບ 86,30% ຂອງແຜນປີ (ແຜນປີ 1.891 ຮຕ), ຜົນຜະລິດ 6.597,44 ໂຕ້ນ; ນາປີ 37.198 ຮຕ ເທົ່າກັບ 99,88% ຂອງແຜນປີ (ແຜນປີ 37.239 ຮຕ), ຜົນຜະລິດ 145.542 ໂຕ້ນ; ເຂົ້າໄຮ່ 1.655 ຮຕ ລື່ນແຜນປີ 113,35% (ແຜນປີ 1.460 ຮຕ), ຜົນຜະລິດ 2.815,25 ໂຕນ, ສະເລ່ຍເຂົ້າກິນໄດ້ 418 ກິໂລ/ຄົນ/ປີ; ການຜະລິດພືດເປັນສິນຄ້າ ໄດ້ 37.667 ຮຕ ລື່ນແຜນ 68,19% (ແຜນປີ 22.395 ຮຕ), ຜົນຜະລິດ 544.331 ໂຕນ, ມູນຄ່າ 1.410 ຕື້ກີບ; ການຜະລິດຊີ້ນ-ປາ-ໄຂ່ ເພື່ອບໍລິໂພກໄດ້ 58,53 ກິໂລ/ຄົນ/ປີ (ແຜນປີ 61 ກິໂລ/ຄົນ/ປີ).
    ສໍາລັບວຽກງານອຸດສາຫະກໍາ ແລະ ການຄ້າ: ຕົວເລກຈໍລະຈອນຂາຍຍົກ 2.444,10 ຕື້ກີບ ເພີ່ມຂຶ້ນ 30% (ຍ້ອນອັດຕາເງິນເຟີ້ສູງ, ການຜະລິດພາຍໃນບໍ່ພຽງພໍ...),ຈໍລະຈອນຂາຍຍ່ອຍ 1.898,55 ຕື້ກີບ ເພີ່ມຂຶ້ນ 33% (ຍ້ອນຕົ້ນທຶນລາຄາສິນຄ້າສູງຂຶ້ນ ສາເຫດຈາກອັດຕາເງິນເຟີ້),ມູນຄ່າເກັບຊື້ຜະລິດຕະພັນພາຍໃນ 1.377,69 ຕື້ກີບ ເພີ່ມຂຶ້ນ 53% ທຽບໃສ່ໄລຍະດຽວຂອງປີຜ່ານມາ;ສໍາເລັດການເຊັນບົດບັນທຶກຮ່ວມມືກັບ ກະຊວງອຸດສາຫະກໍາ ແລະ ການຄ້າ ເພື່ອຮ່ວມກັນຂົນຂວາຍຊອກຫາແຫຼ່ງທຶນ ທັງພາຍໃນ ແລະ ຕ່າງປະເທດ ເຂົ້າໃນການສະໜັບ-ສະໜູນ ເປັນຕົ້ນ: ໂຄງການສົ່ງເສີມການຜະລິດເປັນສິນຄ້າ,ໂຄງການສ້າງສູນສົ່ງເສີມການຂາຍສິນຄ້າໜຶ່ງເມືອງໜຶ່ງຜະລິດຕະພັນ, ໂຄງການສ້າງສູນກວດສອບມາດຕະຖານ-ຢັ້ງຢືນຄຸນນະພາບຜະລິດຕະພັນ-ສິນຄ້າ ແລະ ໂຄງການສ້າງຄວາມເຂັ້ມແຂງທາງດ້ານວິຊາສະເພາະ. ສຳເລັດການສັງລວມລາຍຊື່ເປົ້າໝາຍວິສາຫະກິດຢູ່ພາຍໃນແຂວງບໍລິຄຳໄຊ ໃນການຂໍຢືມເງິນນະໂຍບາຍສິນເຊື່ອເພື່ອກະຕຸ້ນເສດຖະກິດ ແລະ ນະໂຍບາຍສິນເຊື່ອເພື່ອກະຈາຍແຫຼ່ງທຶນສູ່ທ້ອງຖິ່ນ ໄດ້ທັງໝົດ 83 ຫົວໜ່ວຍ, ມູນຄ່າ 135 ຕື້ ກີບ. 
    ສ່ວນວຽກງານໂຍທາທິການ ແລະ ຂົນສົ່ງ ແຂວງ ກໍສາມາດແກ້ໄຂການສັນຈອນຢູ່ທາງເລກ 8A ເຂດພູໄຮ ລວງຍາວ 11 ກມ ທີ່ຖືກຜົນກະທົບທາງໄພທໍາມະຊາດ ປັດຈຸບັນສາມາດເປີດການສັນຈອນໄດ້ເປັນປົກກະຕິ, ໂຄງການປັບປຸງ-ຂະຫຍາຍທາງ 13 ໃຕ້ ສັນຍາ 1 ສໍາເລັດ 100%, ສັນຍາ 2 ໄດ້ 53,52%, ສັນຍາ 3 ໄດ້ 57,08% ທຽບໃສ່ມູນຄ່າສັນຍາ; ໂຄງການກໍ່ສ້າງຂົວຂ້າມນໍ້າຂອງແຫ່ງທີ 5 ປາກຊັນ-ບຶງການ ສັນຍາ 1 ໄດ້ 96,23%, ສັນຍາ 2 ໄດ້ 81,82%; ໂຄງການພັດທະນາຕົວເມືອງລຸ່ມແມ່ນໍ້າຂອງ GMS4 ປະຕິບັດໄດ້: ໂຄງການກໍ່ສ້າງວຽກສະໝາມຂີ້ເຫຍື້ອ ປະຕິບັດໄດ້ 100%,  ວຽກຮ່ອງລະບາຍນໍ້າຝົນ ປະຕິບັດໄດ້ 100%,  ວຽກລະບົບບໍາບັດນໍ້າເປື້ອນ ປະຕິບັດໄດ້ 3,2% ແລະ  ວຽກກໍ່ສ້າງຕ້ານເຈື່ອນແຄມນໍ້າຊັນ ປະຕິບັດໄດ້ 6,42%.
    ວຽກງານຊັບພະຍາກອນທຳມະຊາດ ແລະ ສິ່ງແວດລ້ອມ ກໍສາມາດລົງເຄື່ອນໄຫວຂຶ້ນສໍາມະໂນທີ່ດິນໄດ້ 4.012 ຕອນ ລື່ນແຜນປີ 34,77% (ແຜນປີ 2.977 ຕອນ); ອອກໃບຕາດິນໄດ້ 9.450 ຕອນ, ທຽບໃສ່ແຜນປີຂອງກະຊວງ (33.000 ຕອນ) ໄດ້ 28,64% ແລະ ທຽບໃສ່ແຜນປີຂອງແຂວງ (21.000 ຕອນ) ໄດ້ 45%.
    ໄປພ້ອມກັບຜົນສໍາເລັດວຽກອື່ນໆແລ້ວ ແຂວງຍັງເພີ່ມຄວາມເອົາໃຈໃສ່ຕໍ່ວຽກງານພະລັງານ ແລະ ບໍ່ແຮ່ ຄືໄດ້ຕິດຕາມຊຸກຍູ້ໂຄງການກໍ່ສ້າງເຂື່ອນໄຟຟ້າເຂື່ອນຂັ້ນສູນກາງຄຸ້ມຄອງສໍາເລັດການກໍ່ສ້າງແລ້ວ ແລະ ດໍາເນີນການຜະລິດແລ້ວ 4 ໂຄງການຄື: ໂຄງການເຂື່ອນເທີນ-ຫີນບູນພາກຂະຫຍາຍ, ນ້ຳມັງ 1, ນໍ້າງຽບ 1 ແລະ ນໍ້າເທີນ 1;  ຂັ້ນຕອນເຊັນສັນຍາສໍາປະທານໂຄງການ (CA) ມີ 1 ໂຄງການຄື: ເຂື່ອນໄຟຟ້ານໍ້າຮົງ ແລະສຶກສາຄວາມເປັນໄປໄດ້ເຂື່ອນໄຟຟ້ານໍ້າຕົກ 9 ໂຄງການ ຂັ້ນແຂວງຄຸ້ມຄອງທີ່ມີກໍາລັງຕິດຕັ້ງນ້ອຍກວ່າ 5 ເມກາວັດ ລົງມາ: ສໍາເລັດການກໍ່ສ້າງ ແລະ ດໍາເນີນການຜະລິດແລ້ວມີ 2 ໂຄງການຄື: ໂຄງການເຂື່ອນໄຟຟ້ານໍ້າຊໍ້ ແລະ ເຂື່ອນນໍ້າພ້າວ; ເຊັນສັນຍາດໍາເນີນງານເພື່ອກະກຽມການກໍ່ສ້າງແລ້ວ 6 ໂຄງການ; ຮັບຮອງບົດສຶກສາຄວາມເປັນໄປໄດ້ແລ້ວ 4 ໂຄງການ ແລະ ກໍາລັງສຶກສາຄວາມເປັນໄປໄດ້ 18 ໂຄງການ;ແຈ້ງການລົບລ້າງໂຄງການສຳປະທານລົງທຶນດ້ານບໍ່ແຮ່ທີ່ບໍ່ມີຄວາມຄືບໜ້າ 11 ໂຄງການ.
    ວຽກພົ້ນເດັ່ນອີກອັນໜຶ່ງ ແຂວງສໍາເລັດພິທີປະກາດຮັບຮອງບ້ານທົ່ງນາມີ ເມືອງປາກກະດິງ ແລະ ບ້ານຈອມທອງ ເມືອງວຽງທອງ ເປັນບ້ານໃຫຍ່ຕົວເມືອງນ້ອຍໃນຊົນນະບົດ; ສໍາເລັດການແກ້ໄຂເຂດເຊື່ອມຕໍ່ ລະຫວ່າງ ເມືອງໄຊຈໍາພອນ ກັບ ເມືອງວຽງທອງ, ເມືຶອງປາກຊັນ ກັບ ເມືອງປາກກະດິງ; ເຊັນບົດບັນທຶກເຂດເຊື່ອມຕໍ່ເມືອງປາກຊັນ ກັບ ເມືອງທ່າພະບາດ, ເມືອງວຽງທອງ ກັບ ເມືອງໄຊຈໍາພອນ. (ໂດຍ: ຕະວິນຍານ)