ທ່ານ ລີ ຢ້ຽນຮົວະ ປະທານບໍລິສັດ ຈຸງຢາ ອີຊີ ຊີມັງລາວຈຳກັດຜູ້ດຽວ ໄດ້ໃຫ້ສຳພາດຕໍ່ສືມວນຊົນໃນວັນທີ 18 ທັນວານີ້ວ່າ: ບໍລິສັດ ຈຸງຢາ ອີຊີ ຊີມັງລາວ ຈໍາກັດຜູ້ດຽວ ເປັນໂຮງງານຜະລິດຊີມັງກາຊ້າງລາວ, ເປັນບໍລິສັດໜຶ່ງທີ່ມາລົງທຶນຢູ່ ສປປປ ລາວເວົ້າລວມ, ເວົ້າສະເພາະກໍຄືແຂວງສາລະວັນ, ເມື່ອແຂວງສາລະວັນໄດ້ຮັບເປັນເຈົ້າງານມະຫະກຳກິລານັກຮຽນມັດທະຍົມທົ່ວປະເທດຄັ້ງທີ VII ດັ່ງນັ້ນ ບໍລິສັດຈຶ່ງໄດ້ປະກອບສ່ວນສະໜັບສະໜູນເປັນເງິນຈໍານວນ 1ຕື້ກີບ ເພື່ອໃຫ້ແຂວງນໍາໃຊ້ເຂົ້າໃນງານມະຫະກຳກິລາໃຫ້ສໍາເລັດຕາມເປົ້າໝາຍ.
ການດໍາເນີນທຸລະກິດຂອງບໍລິສັດມາຮອດປັດຈຸບັນເຫັນໄດ້ວ່າມີການເຕີບໂຕເພີ່ມຂຶ້ນຈາກເມື່ອກ່ອນຫຼາຍພໍສົມຄວນໄດ້ມີກຳລັງການຜະລິດ 1,500 ໂຕນ ຕໍ່ມື້ ແລະ ມີການຂະຫຍາຍສາຍການຜະລິດ
ໃໝ່ມີກຳລັງການຜະລິດ 1ລ້ານໂຕນຕໍ່ປີ ແລະ ມີພະແນກຜະລິດໄຟຟ້າເພື່ອນໍາໃຊ້ເອງ ພ້ອມນັ້ນບໍລິສັດຍັງມີແຜນທີ່ຈະຂະຫຍາຍ 1 ພະແນກຕື່ມ, ເພື່ອຮັບປະກັນເຮັດໃຫ້ບັນລຸເປົ້າໝາຍການຜະລິດ ແລະ ການຈໍາໜ່າຍທີ່ຄາດໄວ້ ແລະ ເພື່ອສືບຕໍ່ໃນການພັດທະນາບໍລິສັດມີແຜ່ນຂະຫຍາຍສາຍການຜະລິດໃໝ່ທີ່ມີກຳລັງການຜະລິດຈາກ 5 ແສນໂຕນ/ປີໂຕເກົ່າ ມາເປັນ 1ລ້ານ 2ແສນ ຫາ 1ລ້ານ 5ແສນໂຕນ/ປີ ເພື່ອຕອບສະໜອງ ກຳລັງການຊົມໃຊ້ຂອງປະຊາຊົນ ກໍຄືຕໍ່ກັບໂຄງການ ແລະ ເຂື່ອນໄຟຟ້າຕ່າງໆ ຢູ່ໃນພາກໃຕ້ຂອງພວກເຮົາໃຫ້ພຽງພໍ ແລະ ເພື່ອສ້າງຄວາມເຊື່ອໝັ້ນຕໍ່ສິນຄ້າຂອງບໍລິສັດໄດ້ຮັບການຢັ້ງຢືນມາດຕະຖານສາກົນ ISO9001 ເພື່ອຢັ້ງຢືນມາດຕະຖານສິນຄ້າທີ່ອອກສູ່ທ້ອງຕະຫຼາດ.
ການດຳເນີນກິດຈະການຂອງບໍລິສັດເປັນລັກສະນະລະບົບສາຍພານນັບແຕ່ການຂຸດຄົ້ນວັດຖຸດິບ, ການຄັດແຍກວັດຖຸດິບ, ການລ້າງ, ການຜະລິດ ຈົນເຖິງການຈຳໜ່າຍທາງບໍລິສັດເປັນຜູ້ດຳເນີນການທັງໝົດ. ບໍ່ວ່າຈະເປັນຖ່ານຫີນເວລາຂຸດຄົ້ນມາອັນໃດທີ່ໄດ້ມາດຕະຖານກໍເຜົ່າຜະລິດເປັນຊີມັງ, ສ່ວນອັນໃດທີ່ເກດຕໍ່າກໍໃຊ້ຜະລິດໄຟຟ້າ, ຫຼັງຈາກເສດທີ່ໄດ້ຈາກການຜະລິດໄຟຟ້າບໍ່ວ່າຈະເປັນຂີ້ເຖົ້າ ຫຼື ຂີ້ເຖົ້າລອຍກໍເອົາກັບມາຜະລິດເປັນຊີມັງຄືນຄືເກົ່າ.
ທ່ານ ລີ ຢ້ຽນຮົວະ ໄດ້ກ່າວໃຫ້ຮູ້ຕື່ມວ່າ: ອີງໃສ່ກຳລັງການຜະລິດປັດຈຸບັນແມ່ນຍັງບໍ່ພຽງພໍກັບຄວາມຕ້ອງການຂອງຜູ້ຊົມໃຊ້, ແຕ່ຖ້າຂະຫຍາຍສາຍການຜະລິດໃໝ່ສຳເລັດຈະສາມາດຕອບສະໜອງຊີມັງໃຫ້ຜູ້ຊົມໃຊ້ໄດ້ຢ່າງພຽງພໍ.ໃນໄລຍະຜ່ານມາທາງບໍລິສັດກໍໄດ້ມີການຈໍາໜ່າຍສົ່ງໄປປະເທດກຳປູເຈຍ, ແຕ່ເນື່ອງຈາກວ່າມີການແຜ່ລະບາດຂອງພະຍາດ ຈຶ່ງໄດ້ຢຸດເຊົາ. ແຕ່ຖ້າຖານການຜະລິດເຄື່ອງຈັກໃໝ່ສຳເລັດກໍຈະນຳສົ່ງອອກໄປປະເທດ ກໍາປູເຈຍ ຕື່ມອີກ.
ຫຼັງຈາກສ້າງຕັ້ງໂຮງງານແຫ່ງນີ້ ປະຊາຊົນລາວບັນດາເຜົ່າເວົ້າລວມ, ເວົ້າສະເພາະກໍຄືຊາວແຂວງສາລະວັນໄດ້ມີວຽກເຮັດງານທຳຈຳນວນ 400 ກວ່າຄົນ, ນອກຈາກຈະສ້າງວຽກເຮັດງານທຳໃຫ້ກັບປະຊາຊົນແລ້ວທາງບໍລິສັດຍັງໄດ້ຊ່ວຍເຫຼືອສັງຄົມຂອງແຂວງສາລະວັນ, ໂດຍສະເພາະວັດຖຸ ປັດໃຈ, ຊ່ວຍເຫຼືອຊີມັງໃຫ້ບ້ານ, ໃຫ້ວັດ, ໂຮງໝໍ, ໂຮງຮຽນ, ລວມທັງກິດຈະກຳຕ່າງໆຂອງພາກລັດ, ໂດຍສະເພາະສ້າງຕະຫຼາດ, ພື້ນຖານໂຄງລ່າງ ແລະ ອື່ນໆອີກ.
ຂ່າວ-ພາບ: ບຸນອູ້ມ
ຄໍາເຫັນ