ບຸກທະລຸຄຸ້ມຄອງການເງິນເປັນທັນສະໄໝຍູ້ແຮງການພັດທະນາເສດຖະກິດ-ສັງຄົມແຫ່ງຊາດ

ສະຫາຍ ພູວົງ ກິດຕະວົງກໍາມະການປະຈໍາພັກກະຊວງຮອງລັດຖະມົນຕີກະຊວງການເງິນຂຶ້ນລາຍ ຕໍ່ກອງປະຊຸມໃຫຍ່ຜູ້ແທນອົງຄະນະພັກກະຊວງການເງິນ ຄັ້ງທີIV ວ່າ: ທິດທາງລວມແລະ ຄາດໝາຍສູ້ຊົນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ 11 ແລະ 12 ຂອງພັກ ແລະ ມະຕິກອງປະຊຸມໃຫຍ່ຄັ້ງທີ 3 ແລະ 4 ຂອງອົງຄະນະພັກກະຊວງການເງິນ,ແຜນພັດທະນາເສດຖະກິດ-ສັງຄົມແຫ່ງຊາດ5 ປີຄັ້ງທີ 10 ແລະ ແຜນງົບປະມານແຫ່ງລັດ 5 ປີ (2026-2030) ໃຫ້ເປັນແຜນວຽກ- ແຜນງານລະອຽດ;ເພີ່ມທະວີຄວາມເປັນເຈົ້າການໃນການສ້າງຄວາມເຂັ້ມແຂງການເງິນພາກລັດຕາມທິດ ສ້າງເສດຖະກິດ ເອກະລາດ ເປັນເຈົ້າຕົນເອງ,ແກ້ໄຂສະພາບຄວາມຫຍຸ້ງຍາກທາງດ້ານການເງິນ-ງົບປະມານເປັນບູລິມະສິດເພື່ອສ້າງພື້ນຖານເສດຖະກິດ ທີ່ໜັກແໜ້ນ ແລະ ຄ່ອງຕົວກ້າວໄປສູ່ການພັດທະນາສີຂຽວ ແລະຍືນຍົງ;ເສີມຂະຫຍາຍແລະ ແບ່ງຄວາມຮັບຜິດຊອບຂອງຂະແໜງການຢູ່ສູນກາງ ແລະ ທ້ອງຖິ່ນ ໃຫ້ຈະແຈ້ງ, ຊັດເຈນຕາມທິດ 3 ສ້າງ;ຮັບປະກັນການປະສານສົມທົບຢ່າງກົມກຽວກັບຂະແໜງການກ່ຽວຂ້ອງໃນການວາງນະໂຍບາຍ ແລະ ມາດຕະການ ທີ່ສອດຄ່ອງ;ທົບທວນ, ປະເມີນ, ສ້າງແລະ ປັບປຸງນະໂຍບາຍ ແລະ ນິຕິກໍາໃນຂົງເຂດການເງິນ ໃຫ້ມີຄວາມຮັດກຸມ ແລະ ສອດຄ່ອງກັບສະພາບຕົວຈິງຫຼາຍຂຶ້ນໃນໄລຍະໃໝ່; ເພີ່ມທະວີວຽກງານຕ້ານການຮົ່ວໄຫຼຂອງລາຍຮັບງົບປະມານແລະ ປະຕິບັດນະໂຍບາຍປະຢັດ ແລະ ຕ້ານການຟູມເຟືອຍ;ຂະຫຍາຍການນໍາໃຊ້ລະບົບບັນຊີຢ່າງກວ້າງຂວາງ ແລະ ທົ່ວເຖິງ;ເພີ່ມທະວີສ້າງຖານແລະ ປະເພດແຫຼ່ງລາຍຮັບໃໝ່ຕາມທ່າອ່ຽງການພັດທະນາ ແລະ ລະບຽບການ ຂອງພາກພື້ນ ແລະ ສາກົນ, ຕາມທ່າແຮງຂອງປະເທດເຮົາເພື່ອເພີ່ມລາຍຮັບງົບປະມານໃຫ້ມີຄວາມຍືນຍົງ; ປັບປຸງກົນໄກຄຸ້ມຄອງລາຍຈ່າຍງົບປະມານໃຫ້ມີປະສິດທິພາບ, ຫຼຸດຜ່ອນບັນດາຂອດຂັ້ນ ແລະ ສິ່ງອຸດຕັນຕ່າງໆ;ເພີ່ມປະສິດທິພາບແລະ ປະສິດທິຜົນ ໃນການເຄື່ອນໄຫວຂອງລັດວິສາຫະກິດເພື່ອເປັນທ່າແຮງດ້ານລາຍຮັບອີກທາງໜຶ່ງ ໃຫ້ແກ່ລະບົບງົບປະມານແຫ່ງລັດ;ດຳເນີນນະໂຍບາຍການເງິນສີຂຽວຊຸກຍູ້ວຽກງານພັດທະນາເສດຖະກິດ-ສັງຄົມ ທີ່ກົມກຽວ ຕາມທິດການເຕີບໂຕສີຂຽວ ແລະ ຍືນຍົງ;ສ້າງການຫັນປ່ຽນຢ່າງຕັ້ງໜ້າຕາມທິດຫັນເປັນທັນສະໄໝໃນການຄຸ້ມຄອງການເງິນແຫ່ງລັດດ້ວຍການພັດທະນາລະບົບໃຫ້ລວມສູນ,ທັນກັບສະພາບການ, ສາມາດເຊື່ອມຕໍ່ກັບທຸກຂະແໜງການທັງຢູ່ຂັ້ນສູນກາງ ແລະ ທ້ອງຖິ່ນ ເພື່ອກ້າວໄປສູ່ລະບົບດີຈີຕອນ;ຫັນເປັນທັນສະໄໝລະບົບການເກັບກໍາແລະ ລາຍງານຂໍ້ມູນສະຖິຕິດ້ານຕ່າງໆ ໃຫ້ຄົບຖ້ວນ ແລະ ມີຄຸນນະພາບ;ເພີ່ມທະວີການຮ່ວມມືໃນຂອບສອງຝ່າຍ, ຫຼາຍຝ່າຍ, ກັບພາກພື້ນ ແລະ ສາກົນ ເພື່ອລະດົມທຶນ, ຍາດແຍ່ງບົດຮຽນ ແລະ ເຕັກນິກວິຊາການທີ່ຈຳເປັນທີ່ຕິດພັນກັບການພັດທະນາການເງິນ-ງົບປະມານແຫ່ງລັດ;ປັບປຸງກົງຈັກການຈັດຕັ້ງແຕ່ລະຂັ້ນໃຫ້ກະທັດຮັດ, ໜັກແໜ້ນ, ເຂັ້ມແຂງ, ມີຄວາມຄ່ອງຕົວ ແລະ ສາມາດນໍາພາໄດ້ຢ່າງທົ່ວເຖິງ, ມີປະສິດທິພາບແລະ ປະສິດທິຜົນ;ຕ້ານປະກົດການຫຍໍ້ທໍ້ໃນຖັນແຖວພະນັກງານ.

ສະຫາຍ ພູວົງ ກິດຕະວົງໃຫ້ຮູ້ຕື່ມວ່າ: ຄາດໝາຍສູ້ຊົນດ້ານມະຫາພາກຊຸກຍູ້ໃຫ້ການຂະຫຍາຍຕົວເສດຖະກິດບັນລຸສະເລ່ຍ 5.5%,ຫັນໂຄງປະກອບເສດຖະກິດໄປຕາມທິດຄຸນນະພາບ, ອັດຕາເງິນເຟີ້ ຢູ່ໃນລະດັບໜຶ່ງຕົວເລກ;ຮັບປະກັນສະຖຽນລະພາບທາງດ້ານການເງິນແຫ່ງລັດໃຫ້ໝັ້ນທ່ຽງ,ປັບປຸງຖານະການເງິນຂອງປະເທດໃຫ້ໜັກແໜ້ນ ແລະ ເຂັ້ມແຂງ ແນໃສ່ສ້າງເສດຖະກິດ ເອກະລາດ ເປັນເຈົ້າຕົນເອງ;ສູ້ຊົນປະຕິບັດລາຍຮັບງົບປະມານທັງໝົດ ສະເລ່ຍ 5 ປີ ໃຫ້ໄດ້21% ຂອງGDP ຂຶ້ນໄປ; ສູ້ຊົນໃຫ້ການດຸນດ່ຽງງົບປະມານເກີນດຸນສະເລ່ຍໃນລະດັບ 1% ຂອງGDP;ບໍລິຫານ-ຄຸ້ມຄອງໜີ້ສິນສາທາລະນະໃຫ້ຫຼຸດລົງເທື່ອລະກ້າວໃຫ້ຢູ່ໃນລະດັບ ບໍ່ເກີນ70% ຂອງGDP ແລະ ວຽກນິຕິກໍາ:ທົບທວນ, ປັບປຸງແລະ ສ້າງໃໝ່ບັນດາກົດໝາຍ ແລະນິຕິກໍາຂອງຂະແໜງການເງິນຕິດພັນກັບວາລະແຫ່ງຊາດ ແລະ ຕາມທິດ ເສດຖະກິດ ເອກະລາດ ເປັນເຈົ້າຕົນເອງ (ສອຈ) ໃຫ້ຄົບຊຸດ, ມີປະສິດທິພາບ ແລະ ປະສິດທິຜົນ ໃນການຄຸ້ມຄອງການເງິນ-ງົບປະມານ ໂດຍສະເພາະປັບປຸງກົດໝາຍວ່າດ້ວຍງົບປະມານແຫ່ງລັດ, ກົດໝາຍວ່າດ້ວຍການລົງທຶນຂອງລັດ, ກົດໝາຍວ່າດ້ວຍພາສີ,ກົດໝາຍວ່າດ້ວຍຄຸ້ມຄອງສ່ວຍສາອາກອນ, ກົດໝາຍວ່າດ້ວຍການຄຸ້ມຄອງໜີ້ສິນສາທາລະນະ,ກົດໝາຍວ່າດ້ວຍສະຖິຕິ ແລະ ອື່ນໆ;ຄົ້ນຄວ້າສ້າງໃໝ່ ກົດໝາຍວ່າດ້ວຍອາກອນສິ່ງແວດລ້ອມ,ກົດໝາຍວ່າດ້ວຍອາກອນສິ່ງປຸກສ້າງ ແລະ ກົດໝາຍວ່າດ້ວຍຄັງເງິນແຫ່ງລັດ,ສ້າງກົນໄກໃນການຕິດຕາມແລະປະເມີນຜົນການຈັດຕັ້ງຢ່າງເປັນລະບົບ, ລວມທັງເຂັ້ມງວດໃນການຈັດຕັ້ງຜັນຂະຫຍາຍ,ເຜີຍແຜ່ ແລະ ເຊື່ອມຊຶມໃຫ້ທົ່ວເຖິງ.