ທ່ານນາງ ວຽງພອນ ແກ້ວຄູນສີ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ນະຄອນຫຼວງວຽງຈັນ ໄດ້ຖະແຫຼງຂ່າວການຈັດງານບຸນດັ່ງກ່າວຕໍ່ສື່ມວນຊົນໃນວັນທີ 5 ພະຈິກ ນີ້ ທີ່ເດີ່ນພະທາດຫຼວງວຽງຈັນວ່າ: ງານບຸນນະມັດສະ ການພະທາດຫຼວງໃນປີນີ້ຈະຈັດໃຫ້ມີຫຼາກຫຼາຍກິດຈະກຳທີ່ໜ້າສົນໃຈຢູ່ເດີ່ນພະທາດຫຼວງ, ເດີ່ນສະໜາມຫຼວງ ແລະ ງານວາງສະແດງຂາຍສິນຄ້າຈະຈັດຂຶ້ນຢູ່ສູນການຄ້າລາວ-ໄອເຕັກ ນະຄອນຫຼວງວຽງຈັນ ຊຶ່ງພິທີເປີດງານບຸນຢ່າງເປັນທາງການຈະຈັດຂຶ້ນໃນວັນທີ 11 ພະຈິກ ແລະ ຈະດຳເນີນໄປຈົນຮອດວັນທີ 15 ພະຈິກ ໂດຍຈະມີການຄົບງັນຕາມປະເພນີອັນດີງາມຂອງຊາດລາວເຮົາ ເປັນຕົ້ນວັນທີ 13 ເວລາ 16:00 ໂມງ ຈະມີພິທີສູດປະລິດຕະມຸງຄຸນທີ່ພະທາດຫຼວງ, ວັນທີ 14 ເວລາ 13:30 ໂມງ ຈະມີພິທີແຫ່ພະສາດເຜິ້ງ, ວັນທີ 15 ເວລາ 07:00 ໂມງ ຈະມີພິທີໃສ່ບາດຖວາຍສັງຂະທານ, ເວລາ 13:00 ໂມງ ຈະມີພິທີແຫ່ລູກຄີ ແລະ ການແຂ່ງຂັນກິລາພື້ນບ້ານຕີຄີ ແລະ ເວລາ 19:00 ໂມງ ຈະມີພິທີວຽນທຽນ ແລະ ຈູດທູບທຽນ, ບັ້ງໄຟສັກກະລະບູຊາອົງພະທາດ. ທັງນີ້, ເພື່ອອະນຸລັກຮັກສາ ແລະ ສົ່ງເສີມວັດທະນະທຳຮີດຄອງປະເພນີອັນດີງາມ, ບຸນນະມັດສະການພະທາດຫວງຂອງຊາວລາວ ກໍຄື ຊາວນະຄອນຫຼວງວຽງຈັນ ທີ່ເຄີຍສືບທອດກັນມາແຕ່ບູຮານນະການໃຫ້ມີຄວາມໂດດເດັ່ນ ແລະ ເປັນທີ່ຮັບຮູ້ໃນເວທີສາກົນ, ທັງເປັນການສ້າງໂອກາດໃນການຈັດຕັ້ງປະຕິບັດ 2 ວາລະແຫ່ງຊາດ ກໍຄືຟື້ນຟູເສດຖະກິດດ້ວຍຮູບການຊຸກຍູ້ສົ່ງເສີມການທ່ອງທ່ຽວ, ສົ່ງເສີມການຄ້າ, ສິນຄ້າຄອບຄົວຕົວແບບທີ່ຈະກ້າວເປັນສິນຄ້າໂອດັອບທີ່ໄດ້ກາໝາຍແຫ່ງຊາດ ແລະ ສິນຄ້າຂອງບັນດາວິສາຫະກິດຂະໜາດນ້ອຍ ແລະ ກາງໄດ້ມາວາງສະແດງ, ຈຳໜ່າຍສິນຄ້າທັງພາຍໃນ ແລະ ຕ່າງປະເທດໃຫ້ປະຊາຊົນຊາວນະຄອນຫຼວງວຽງຈັນ ແລະ ແຂກຕ່າງປະເທດໄດ້ເຫັນ ແລະ ໄດ້ຊົມໃຊ້ສິນຄ້າ, ພ້ອມທັງເປັນການແລກປ່ຽນບົດຮຽນ ແລະ ປະສົບການຕ່າງໆຂອງບັນດາຫົວໜ່ວຍທຸລະກິດດ້ວຍກັນ.
ທ່ານນາງ ວຽງພອນ ແກ້ວຄູນສີ ກ່າວຕື່ມວ່າ: ເພື່ອຊຸກຍູ້ສົ່ງເສີມປີທ່ອງທ່ຽວລາວ 2024 ກໍຄື ເຮັດໃຫ້ງານບຸນນະມັດ ສະການພະທາດຫຼວງ ໃນປີນີ້ດຳເນີນໄປດ້ວຍຜົນສຳເລັດ ຮັກສາໄດ້ວັດທະນະທຳອັນດີງາມ ຊຶ່ງຄະນະຮັບຜິດຊອບ ກໍຄືນະຄອນຫຼວງວຽງຈັນ ໄດ້ຈັດໃຫ້ມີຫຼາກຫຼາຍກິດຈະກຳທີ່ໜ້າສົນໃຈ ນັບແຕ່ຮ້ານຄ້າທາງເຂົ້າຈາກໄຟແດງບ້ານໜອງບອນຈະຕົບແຕ່ງເປັນເອກະລັກຂອງລາວ, ສິນຄ້າລາວ ເປັນສ່ວນຫຼາຍ, ປະຕູໂຂງທາງເຂົ້າງານ ຕົບແຕ່ງປະດັບປະດາດ້ວຍແຄນ ແລະ ກອງຫາງທີ່ເປັນເອກະລັກວັດທະນະທຳລາວທີ່ໂດດເດັ່ນ, ທາງເຂົ້າຮ້ານວາງສະແດງສິນຄ້າໂອດັອບ ຕົບແຕ່ງປະດັບປະດາດ້ວຍວັດຖຸພັນຈາກພາຍໃນ ແລະ ຈະເຫັນຕິບເຂົ້າໃຫຍ່ສອງດ້ານຂ້າງ, ຮ້ານຄ້າໂອດັອບທັງພາຍໃນ ແລະ ຕ່າງປະເທດ ທີ່ມີສິນຄ້າຫຼວງຫຼາຍ, ພິເສດຮ້ານພາມີລຽນຈະຕົບແຕ່ງປະດັບປະດາ ຜາສາດເຜິ້ງ, ພາຂວັນໃຫຍ່, ວາງສະແດງປະ ຫວັດພະທາດຫຼວງວຽງຈັນ, ປະຫວັດລູກຄີ ແລະ ເຄື່ອງປະດັບປະດາຕ່າງໆທີ່ໜ້າສົນໃຈ. ສຳລັບທາງເຂົ້າໜ້າສະພາແຫ່ງຊາດຈະຕົບແຕ່ງເປັນບ່ອນຍ່າງຫຼິ້ນ ປະດັບປະດາດອກໄຟ, ໂຄມໄຟ ແລະ ມີຈຸດຖ່າຍຮູບທີ່ຈົບງາມ. ນອກນັ້ນ, ຈຸດສູນລວມ ຈະມີເວທີກາງເພື່ອໄວ້ໃນການສະແດງກິດຈະກຳ, ສິລະປະຕ່າງໆ ອາດຈະມີສິລະປິນຈາກຕ່າງປະເທດມາສະແດງຮ່ວມບາງລາຍການໃນທຸກໆຄືນ ນັບແຕ່ມື້ເປີດງານບຸນຈົນຮອດມື້ປິດງານ.
ທ່ານນາງ ວຽງພອນ ແກ້ວຄູນສີ ຍັງໄດ້ຮຽກ ຮ້ອງໃຫ້ປວງຊົນທັງພາຍໃນ ແລະ ຕ່າງປະເທດທີ່ຈະມາຮ່ວມໃນງານບຸນຕ້ອງໄດ້ປະຕິບັດຕາມກົດລະບຽບຂອງງານບຸນຢ່າງເຂັ້ມງວດ ເປັນຕົ້ນ, ການມາກາບໄຫວ້ສັກກາລະບູຊາ, ມາແຮ່ຜາສາດເຜິ້ງ, ຕີຄີ, ໃສ່ບາດ ແລະ ວຽນທຽນຕ້ອງປະຕິບັດຕາມວັດທະນະທຳຂະນົບທຳນຽມຂອງ ສປປ ລາວ ເປັນຕົ້ນການນຸ່ງຖືຜູ້ຍິງຕ້ອງນຸ່ງສິ້ນທີ່ມີຕີນຈົບງາມ ແລະ ຜູ້ຊາຍກໍຕ້ອງນຸ່ງໂສ້ງທີ່ສຸພາບຮຽບຮ້ອຍ ຫຼື ນຸ່ງຜ້າສະໂລ້ງທີ່ເປັນເອກະລັກຂອງຄົນລາວ. ນອກນັ້ນ, ຂໍໃຫ້ປະຕິບັດຕາມແຈ້ງການ, ລະບຽບການຂໍ້ຫ້າມຕ່າງໆທີ່ອະນຸກຳມະການໄດ້ກຳນົດໄວ້.
ຂ່າວ-ພາບ: ວັນເພັງ+ພູວັນ
ຄໍາເຫັນ