ສູນຄວບຄຸມ ແລະ ປ້ອງກັນພະຍາດ ຂອງ ສະຫະລັດ ອາເມຣິກາ (CDC) ລາຍງານວ່າ: ມີຜູ້ຕິດເຊື້ອໄຂ້ເລືອດອອກກໍລະນີໃໝ່ ໃນສະຫະລັດ ອາເມຣິກາ ປະມານ 3,700 ກໍລະນີ, ເພີ່ມຂຶ້ນຈາກປະມານ 2,050 ກໍລະນີ ໃນປີ 2023. ໃນຈຳນວນນີ້ມີ 105 ກໍລະນີແມ່ນຕິດເຊື້ອພາຍໃນລັດຄາລິຟໍເນຍ, ຟລໍຣິດາ ຫຼື ເທັກຊັດ, ບໍ່ແມ່ນມາຈາກການເດີນທາງໄປຕ່າງປະເທດ.
ລັດຄາລິຟໍເນຍ ມີຈຳນວນຜູ້ເຊື້ອເພີ່ມຂຶ້ນຢ່າງຫຼວງຫຼາຍ, ໂດຍໃນປີ 2024 ມີຜູ້ຕິດເຊື້ອໄຂ້ເລືອດອອກກໍລະນີໃໝ່ ຈຳນວນ 725 ກໍລະນີ, ລວມທັງການຕິດເຊື້ອພາຍໃນປະເທດ 18 ກໍລະນີ. ໂດຍເພີ່ມຂຶ້ນເກືອບສາມເທົ່າຈາກປະມານ 250 ກໍລະນີ ໃນປີ 2023 ແລະ ໃນຈໍານວນນີ້ມີພຽງແຕ່ສອງກໍລະນີທີ່ເກີດຂຶ້ນພາຍໃນປະເທດ.
ທັງນີ້, ໄຂ້ເລືອດອອກແຜ່ລະບາດໂດຍຍຸງລາຍເປັນພາຫະນຳເຊື້ອ, ໂດຍເມື່ອ 25 ປີກ່ອນ ຍັງບໍ່ພົບວ່າມີຍຸງລາຍບ້ານ (Aedes aegypti) ແລະ ຍຸງລາຍສວນ (Aedes albopictus) ໃນລັດຄາລິຟໍເນຍ. ແຕ່ປັດຈຸບັນພົບເຫັນໃນ 25 ຄາວຕີ້ ແລະ ຫຼາຍກວ່າ 400 ເມືອງ ແລະ ຊຸມຊົນ ຊຶ່ງສ່ວນໃຫຍ່ແມ່ນຢູ່ພາກໃຕ້ຂອງຄາລິຟໍເນຍ ແລະ Central Valley.
ທ່ານ ໄມເຄິລ ເບນ - ອາເດເຣດ ຮອງຜູ້ອໍານວຍການທາງການແພດດ້ານການລະບາດວິທະຍາ ຂອງໂຮງໝໍສູນການແພດ Cedars-Sinai Hospital ໃນລັດລອສແອນເຈລິສ ກ່າວວ່າ: ເຊື່ອວ່າພະຍາດໄຂ້ເລືອດອອກໄດ້ກາຍເປັນ "ປົກກະຕິຮູບແບບໃໝ່" ໃນສະຫະລັດ ອາເມຣິກາ, ໂດຍເນັ້ນໜັກວ່າປະຊາກອນຍຸງລາຍຈະສືບຕໍ່ແຜ່ຂະຫຍາຍຕໍ່ໄປ.
ທ່ານກ່າວຕື່ມວ່າ: ການປ່ຽນແປງຂອງດິນຟ້າອາກາດມີສ່ວນເຮັດໃຫ້ຈຳນວນປະຊາກອນຍຸງເພີ່ມຂຶ້ນ ເນື່ອງຈາກຍຸງຊະນິດນີ້ຢູ່ລອດໄດ້ດີທີ່ສຸດໃນສະພາບອາກາດທີ່ອົບອຸ່ນ ແລະ ມັກອອກຫາກິນໃນເວລາກາງເວັນ.
ທັງນີ້, CDC ໄດ້ອອກຄຳເຕືອນໄພດ້ານສຸຂະພາບນັບແຕ່ເດືອນມີນາ ເປັນຕົ້ນມາ. ໂດຍເຕືອນກ່ຽວກັບຄວາມສ່ຽງຈາກການຕິດເຊື້ອໄຂ້ເລືອດອອກ ທີ່ດຳເນີນຢູ່.
ຄໍາເຫັນ