ຈາກຄອບຄົວທຸກຍາກ ສູ່ຄອບຄົວມີລາຍຮັບ ແລະ ເພິ່ງພາຕົນເອງ ດ້ວຍການປູກເຂົ້າ

ປ້າ ຄິດ ພົມມະໄລສີ ເວົ້າໃຫ້ຟັງວ່າ: ຄອບຄົວ ມີລູກ 5 ຄົນ, ມີຜູ້ຍິງ 1 ຄົນ. ອາຊີບຫຼັກ ກໍແມ່ນການເຮັດນາ ແລະ ປູກພືດ, ສ່ວນການລ້ຽງສັດເປັນອາຊີບສຳຮອງ. ໃນໄລຍະຜ່ານມາ ຄອບຄົວ ມີຖານະຍາກຈົນ, ການຜະລິດອາໄສທຳມະຊາດເປັນຫຼັກ, ເຮັດນາໄດ້ພຽງລະດູດຽວ ມີເນື້ອທີ່ປະມານ 1 ເຮັກຕາ ແລະ ບໍ່ກຸ້ມກິນ; ເມື່ອເວົ້າເຖິງຈຸດປ່ຽນສຳຄັນຂອງຄອບຄົວແລ້ວ ກໍແມ່ນພາຍຫຼັງມີຊົນລະປະທານ ທີ່ທາງພັກ-ລັດ ເພິ່ນເລັງເຫັນຄວາມສໍາຄັນໃນການຜະລິດຂອງປະຊາຊົນ ໃຫ້ມີຢູ່ມີກິນ ແລະ ກ້າວໄປສູ່ການຜະລິດເປັນສິນຄ້າ, ຈຶ່ງສາມາດປູກເຂົ້າໄດ້ 2 ລະດູ. ຈາກນັ້ນມາ, ທາງຄອບຄົວ ກໍໄດ້ມີການສຸມທຶນຮອນເຂົ້າສູ່ການຜະລິດ ໃຫ້ທ່ວງທັນກັບລະດູການ ໂດຍໄດ້ກູ້ຢືມຈາກທະນາຄານສົ່ງເສີມກະສິກຳ ມາຊື້ລົດໄຖນາ ນຳໃຊ້ເຂົ້າໃນການບຸກເບີກ ແລະ ກະກຽມພື້ນທີ່ນາ; ດ້ວຍຄວາມມັກໃນດ້ານກະສິກຳ ຈຶ່ງໄດ້ຊອກຮູ້ ຫາບົດຮຽນຈາກຫຼາຍທາງ, ສ່ວນໜຶ່ງ ກໍໄດ້ຮັບການອົບຮົມນຳໃຊ້ເຕັກນິກທີ່ໄດ້ປະສິດທິຜົນດີໃນການຜະລິດ ຈາກວິຊາການຫ້ອງການກະສິກຳຂັ້ນແຂວງ ແລະ ຂັ້ນເມືອງ; ຈາກນັ້ນມາ ຜົນຜະລິດທີ່ໄດ້ຮັບຄ່ອຍໆສູງຂຶ້ນ ແລະ ມີລາຍຮັບຫຼັກ ຈາກການຂາຍເຂົ້າ ບວກກັບລາຍຮັບສ່ວນໜຶ່ງທີ່ໄດ້ຈາກການຂາຍພືດ-ຜັກອື່ນໆ, ຂາຍສັດລ້ຽງ; ມາຮອດປັດຈຸບັນນີ້, ໂດຍສະເລ່ຍລາຍຮັບຕໍ່ປີ ມີປະມານ 41.800.000 ກີບ; ໃນນັ້ນ, ໄດ້ຈາກການຂາຍຜັກ 15.000.000 ກີບ ແລະ ຂາຍສັດລ້ຽງ 10.300.000 ກີບ.

ຈາກຄວາມພະຍາຍາມມາຢ່າງຕໍ່ເນື່ອງ ແລະ ເຫັນໄດ້ເຖິງຜົນຕອບແທນຈາກຄວາມອົດທົນ ບວກກັບຄວາມດຸໝັ່ນ, ຄອບຄົວ ປ້າ ຄິດ ພົມມະໄລສີ ມີເຮືອນຢູ່ຖາວອນ 2 ຫຼັງ, ລົດໃຫຍ່ 2 ຄັນ, ລົດຈັກ 4 ຄັນ ແລະ ລົດໄຖນາ 2 ຄັນ, ມີທີ່ດິນປຸກສ້າງ 3 ຕອນ ແລະ ດິນກະສິກຳ 3 ຕອນ ແລະ ໄດ້ຮັບໃບຢັ້ງຢືນຄອບຄົວຕົວແບບ ໃນປີ 2010.

ປ້າ ຄິດ ພົມມະໄລສີ ເວົ້າດ້ວຍຄວາມພູມໃຈວ່າ: ຄອບຄົວ ສາມາດຫຼຸດພົ້ນຈາກຄວາມທຸກຍາກ ເພາະເຂົ້າ ກໍມີກຸ້ມກິນ ແລະ ເຫຼືອຂາຍມີລາຍຮັບໃຫ້ກັບຄອບຄົວ ຈົນສາມາດສົ່ງລູກ ທັງ 5 ຄົນ ຮຽນຈົບວິຊາຊີບທີ່ພວກເຂົາມັກ ແລະ ໄດ້ນໍາໃຊ້ຄວາມຮູ້ຄວາມສາມາດ ທີ່ເຂົາໄດ້ຮຽນມາ ປະກອບອາຊີບ ສ້າງລາຍຮັບໃຫ້ກັບຄອບຄົວ; ໃນສ່ວນບົດຮຽນ ແລະ ປະສົບການທາງດ້ານການຜະລິດນີ້ ແມ່ນຈະສືບຕໍ່ເຮັດໄປເລື້ອຍໆຈົນກວ່າຈະໝົດກຳລັງແຮງຂອງຕົນເອງ ແລະ ພ້ອມຖ່າຍທອດຄວາມຮູ້, ເຕັກນິກຕ່າງໆໃຫ້ລູກ-ຫຼານ ໄດ້ສານຕໍ່ອາຊີບນີ້ ໃຫ້ຍືນຍົງ. (ຂ່າວ: ພ. ສີຫາວົງ)