ຈຳປາສັກ ຈະຈັດຫຼາຍກິດຈະກໍາ ສະຫຼອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ

ທ່ານ ນາງ ພູໄພທອງ ພິມມະວົງສາ ປະທານສະຫະພັນແມ່ຍິງແຂວງຈຳປາສັກ ໃຫ້ສໍາພາດໃນວັນທີ 30 ມິຖຸນາ 2026 ຜ່ານມານີ້ວ່າ: ໃນໂອກາດວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 71 ປີ ໃນປີນີ້, ສະຫະພັນແມ່ຍິງແຂວງຈຳປາສັກ ໄດ້ກະກຽມຈັດຫຼາຍກິດຈະກໍາ ເປັນຕົ້ນ ວຽກງານໂຄສະນາ ແລະ ສື່ສານ ໂດຍເນັ້ນໃສ່ການເຜີຍແຜ່ ກົດໝາຍວ່າດ້ວຍການພັດທະນາ ແລະ ປົກປ້ອງແມ່ຍິງ, ກົດໝາຍ ວ່າດ້ວຍຕ້ານຄວາມຮຸນແຮງຕໍ່ແມ່ຍິງ-ເດັກນ້ອຍ ຜ່ານລາຍການ ແມ່ຍິງກັບການພັດທະນາ ທາງວິທະຍຸ ແລະ ເຟສບຸກ ຂ່າວແມ່ຍິງແຂວງຈໍາປາສັກ, ພ້ອມທັງຜະລິດວິດີໂອສັ້ນຜ່ານຈໍ LED; ຈັດຕັ້ງຂະບວນການອອກແຮງງານລວມ ຊຶ່ງຈະຈັດຂຶ້ນເປັນ 2 ໄລຍະ ໂດຍປຸກລະດົມໃຫ້ເອື້ອຍນ້ອງແມ່ຍິງພະແນກການ, ກົມກອງອ້ອມຂ້າງແຂວງ ເອົາໃຈໃສ່ການອະນາໄມຢູ່ຕາມບໍລິເວນສໍານັກງານຫ້ອງການຂອງຕົນ ແລະ ອອກແຮງງານອະນາໄມບໍລິເວນສະໂມສອນຫລັກ 4 ໃຫ້ມີຄວາມສະອາດສວຍງາມ. ພ້ອມນີ້, ຍັງມີກິດຈະກໍາການເຜີຍແຜ່ປະຫວັດມູນເຊື້ອ ໂດຍຈະເຄື່ອນໄຫວປາຖະກະຖາປະຫວັດຄວາມເປັນມາ, ການເຕີບໃຫຍ່ຂະຫຍາຍຕົວຂອງວັນສ້າງຕັ້ງແມ່ຍິງລາວ ໃນວັນທີ 20 ກໍລະກົດ ພ້ອມທັງສະຫຼຸບຜົນງານໃນຮອບ 1 ປີ ຕິດພັນກັບການສ້າງຂະບວນການກິລາ ແລະ ຟ້ອນລຳວົງລາວປະຍຸກ ຢູ່ 1 ນະຄອນ ແລະ 4 ເມືອງ. ນອກນີ້, ຍັງຈະມີການເຄື່ອນໄຫວຢ້ຽມຢາມຖາມຂ່າວ ແລະ ອວຍພອນແມ່ປ້າບຳນານ ທັງສາຍຕັ້ງ ແລະ ສາຍຂວາງ ຢູ່ຂັ້ນນະຄອນ, ເມືອງ ແລະ ພະແນກການຕ່າງໆ; ກິດຈະກຳສົ່ງເສີມສຸຂະພາບ ຈະຈັດຂະບວນການເຕັ້ນແອໂລບິກ ເພື່ອສຸຂະພາບ ແລະ ລໍາວົງລາວປະຍຸກຂະໜາດໃຫຍ່ ຢູ່ທີ່ສະໜາມກິລາຂອງແຂວງ. ກິດຈະກໍາສໍາຄັນ ກໍແມ່ນຈັດພິທີໂຮມຊຸມນຸມປາຖະກະຖາ ສະເຫຼີມສະຫຼອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 71 ປີ ຕິດພັນກັບການສະແດງສິລະປະ-ວັນນະຄະດີຈາກກອງບັນຊາການທະຫານແຂວງ ແລະ ງານວາງສະແດງຜະລິດຕະພັນ ຊຶ່ງຈະຈັດຂຶ້ນໃນຕອນເຊົ້າວັນທີ 17 ກໍລະກົດ 2026 ທີ່ສະໂມສອນແຂວງ ຫລັກ 4 ແລະ ພາຍໃນງານຍັງຈະມີການວາງສະແດງຜະລິດຕະພັນສີມື ຂອງເອື້ອຍນ້ອງແມ່ຍິງທົ່ວແຂວງ ໂດຍເຊື້ອເຊີນຄະນະນຳແຂວງ, ແມ່ປ້າບຳນານ, ນັກທຸລະກິດຍິງ ແລະ ພາກສ່ວນຕ່າງໆເຂົ້າຮ່ວມ ພ້ອມທັງກໍານົດໃຫ້ຜູ້ເຂົ້າຮ່ວມງານທັງໝົດນຸ່ງຊຸດສຸພາບ, ເກົ້າຜົມ, ບ່ຽງແພ ແລະ ໃສ່ປັກປິ່ນເກົ້າ ເພື່ອຮ່ວມກັນອະນຸລັກວັດທະນະທໍາລາວ.

ໂອກາດນີ້, ທ່ານ ນາງ ພູໄພທອງ ພິມມະວົງສາ ຍັງໄດ້ຕາງໜ້າໃຫ້ຄະນະບໍລິຫານງານສະຫະພັນແມ່ຍິງແຕ່ລະຂັ້ນ ສະແດງຄວາມຂອບໃຈ ແລະ ຮູ້ບຸນຄຸນຢ່າງສູງຕໍ່ການນໍາພັກ-ລັດ ທີ່ຍາມໃດກໍສ້າງທຸກເງື່ອນໄຂໃຫ້ແມ່ຍິງ ໄດ້ຮັບການພັດທະນາ ແລະ ເຂົ້າຮ່ວມຈັດຕັ້ງປະຕິບັດ 2 ໜ້າທີ່ຍຸດທະສາດ ປົກປັກຮັກສາ ແລະ ສ້າງສາປະເທດຊາດ ໃຫ້ຮຸ່ງເຮືອງສີວິໄລຕະຫລອດມາ.ຂ່າວ-ພາບ: ທູນທອງໃຈ