ເຈົ້າແຂວງສະຫວັນນະເຂດ ເນັ້ນໃຫ້ຄະນະນໍາເມືອງອາດສະພອນເປັນເອກະພາບຈັດຕັ້ງປະຕິບັດມະຕິກອງປະຊຸມໃຫຍ່

ທ່ານ ບຸນລັດ ລໍບານເຢັນ ໄດ້ລາຍງານກ່ຽວກັບສະພາບການນໍາພາ-ຊີ້ນໍາວຽກງານທີ່ພົ້ນເດັ່ນໂດຍສັງເຂບວ່າ: ພາຍຫຼັງສໍາເລັດກອງປະຊຸມໃຫຍ່ຄັ້ງທີ VII ຂອງອົງຄະນະພັກເມືອງ ຄະນະບໍລິຫານງານພັກເມືອງ, ໄດ້ສຸມໃສ່ການນໍາພາຈັດຕັ້ງຜັນຂະຫຍາຍມະຕິ ແລະ ແຜນພັດທະນາເສດຖະກິດ-ສັງຄົມ ຢ່າງມີຜົນສໍາເລັດຫຼາຍດ້ານ. ໃນນີ້, ສໍາເລັດການຈັດກອງປະຊຸມຄົບຄະນະບໍລິຫານພັກເມືອງຄັ້ງທີ I ສະໄໝທີ VII, ເຊື່ອມຊຶມມະຕິ, ບົດລາຍງານການເມືອງ ແລະ ແຜນພັດທະນາເສດຖະກິດ-ສັງຄົມ 5 ປີ (2025-2029) ໃຫ້ບັນດາສະຫາຍຄະນະພັກ, ຫົວໜ້າຫ້ອງການອ້ອມຂ້າງເມືອງ ແລະໄດ້ມອບໝາຍໃຫ້ແຕ່ລະຫ້ອງການນໍາໄປສ້າງເປັນແຜນວຽກ, ກໍານົດກິດຈະກໍາ, ໂຄງການລະອຽດຕ່າງໆ.

ສໍາລັບການພັດທະນາພື້ນຖານໂຄງລ່າງໃນໄລຍະຜ່ານມາເປັນຕົ້ນ: ໂຄງການຟື້ນຟູ ແລະສ້ອມແປງເສັ້ນທາງດິນແດງສໍາເລັດ 100% ມີ 4 ໂຄງການລວມມູນຄ່າທັງໝົດ 8,720 ຕື້ກີບ, ສ້າງທາງປູຢາງ 2 ຊັ້ນໃນເທສະບານຄວາມຍາວ 1,300 ແມັດ ມູນຄ່າ 4,800 ຕື້ກີບ, ໄດ້ຮັບທຶນສ້າງຂົວເປຕົງອັດແໜ້ນເຊຈໍາພອນຍາວ 100 ແມັດ, ກວ້າງ 5.5 ແມັດມູນຄ່າ 19,994 ຕື້ກີບ. ນອກນັ້ນ, ຍັງໄດ້ລະດົມທຶນທຸກທ່າແຮງບົ່ມຊ້ອນໃນການພັດທະນາພື້ນຖານໂຄງລ່າງ ດ້ວຍການປະກອບສ່ວນຂອງປະຊາຊົນ, ນັກທຸລະກິດ-ຜູ້ປະກອບການໃນການປົວແປງເສັ້ນທາງ-ຂົວ,ໂຮງຮຽນ, ສຸກສາລາ.

ໂອກາດນີ້, ທ່ານ ບຸນໂຈມ ອຸບົນປະເສີດ ໄດ້ເນັ້ນໜັກໃຫ້ຄະນະນໍາເມືອງອາດສະພອນ ຕ້ອງກໍາໃຫ້ໄດ້ຜົນສໍາເລັດ, ຂໍ້ຄົງຄ້າງ, ເພື່ອວາງແຜນການແກ້ໄຂ, ພ້ອມຮັບຮູ້ເປັນເອກະພາບ, ເປັນອັນໜຶ່ງ ອັນດຽວດ້ວຍຄວາມເຄົາລົບເຖິງການຈັດຕັ້ງປະຕິບັດບັນດາ ບັນຫາທີ່ເປັນຈຸດອ່ອນພື້ນຖານທີ່ຈະຕ້ອງໄດ້ແກ້ໄຂ. ສ່ວນວຽກງານຕາແສງແມ່ນໃຫ້ເຂົ້າໃຈນຳກັນກ່ຽວກັບລະບົບຮາກຖານການເມືອງ. ການສ້າງຕັ້ງຕາແສງ ແມ່ນການປັບປຸງບູລະນະລະບອບປະຊາທິປະໄຕປະຊາຊົນ ແມ່ນເນື້ອໃນຈິດໃຈຂອງພັກຄື: ຫັນວຽກ, ຫັນບໍລິການຂອງລັດ, ຫັນນະໂຍບາຍ, ຫັນງົບປະມານ ເພື່ອໃຫ້ມີຄວາມສະດວກສະບາຍແກ່ປະຊາຊົນ, ໃຫ້ບໍລິການປະຊາຊົນທີ່ໃກ້ທີ່ສຸດ, ໂດຍການສ້າງພະນັກງານລັດລົງນຳພາເພື່ອໃຫ້ປະຊາຊົນຮູ້ການຜະລິດ, ສ້າງເສດຖະກິດປ່ຽນແປງໃໝ່, ນໍາພາການຜະລິດຂອງປະຊາຊົນໃຫ້ມີຄຸນນະພາບ, ພະນັກງານທີ່ຈະເຮັດວຽກຕາແສງບໍ່ແມ່ນການລົງຮາກຖານ ແຕ່ແມ່ນການຮັບໜ້າທີ່ໃໝ່ ຊຶ່ງຜູ້ທີ່ຈະປະກອບເປັນອົງຄະນະພັກຕາແສງ, ຕ້ອງເປັນເຈົ້າພັດທະນາທ້ອງຖິ່ນ ເຮັດໃຫ້ປະຊາຊົນມີສ່ວນຮ່ວມໃນການພັດທະນາເສດຖະກິດ-ສັງຄັມ, ໃຫ້ປະຊາຊົນຮັບຮູ້ທຸກແນວທາງການປ່ຽນແປງໃໝ່ຂອງພັກ ແລະ ລັດເພື່ອໃຫ້ປະຊາຊົນໄດ້ຊົມໃຊ້ໝາາກຜົນທີ່ພວກເຂົາມີສ່ວນຮ່ວມ ແລະ ກໍາແໜ້ນເຖິງເນື້ອໃນຈິດໃຈຂອງມະຕິ 04/ກມສພ ວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່.

ໃນໄລຍະດຽວກັນນີ້, ທ່ານເຈົ້າແຂວງ, ພ້ອມຄະນະ ໄດ້ລົງຕິດຕາມເບິ່ງສະພາບຕົວຈິງໃນການພັດທະນາພື້ນຖານໂຄງລ່າງຂອງເມືອງໂດຍສະເພາະແມ່ນຖະໜົນຫົນທາງການສ້າງວົງວຽນກະບອງໃນເຂດເທສະບານເມືອງ, ສະພາບຂົວຫ້ວຍພຸງ ລະຫວ່າງ ບ້ານທາດດອກແກ້ວ ຫາ ບ້ານດົງນາງາມທີ່ເປ້ເພ, ເພື່ອຂຶ້ນແຜນໃນການບຸລະນະຄືນໃໝ່, ລົງຕິດຕາມຄວາມຄືບໜ້າໃນການກໍ່ສ້າງໂຮງຮຽນອະນຸບານເມືອງ, ຕິດຕາມການກໍ່ສ້າງໂຮງໝໍເມືອງ, ຈາກນັ້ນ, ກໍໄດ້ລົງຢຽມຢາມຄອບຄົວ ທ່ານ ຄຳໝູນ ແມ້ວ ເໝືອນ ປະຊາຊົນບ້ານທາດດອກແກ້ວ, ຊຶ່ງຈັດຢູ່ໃນຄອບຄົວຕົວແບບໃໝ່ໃນການປູກຝັງໂດຍສະເພາະແມ່ນການປູກເຂົ້າ.

(ແຫຼ່ງຂ່າວ: ແຂວງສະຫວັນນະເຂດ)