 |
ທ່ານ ພັທ ຄອນສະຫວັນ ຈັນທະວົງ ຫົວໜ້າພະແນກຈັດກໍາລັງປ້ອງກັນ ແລະ ເປີດທາງ ກົມຕໍາຫຼວດຈະລາຈອນ ກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ ໄດ້ໃຫ້ສໍາພາດຕໍ່ນັກຂ່າວໜັງສືພິມປະຊາຊົນໃນວັນທີ 14 ກັນຍານີ້ວ່າ: ກໍາລັງຕໍາຫຼວດຈະລາຈອນ ໄດ້ບັນຈຸກໍາລັງເຂົ້າປະຈໍາການນັບແຕ່ວັນທີ 11 ກັນຍາເປັນຕົ້ນມາ ເພື່ອເຄື່ອນໄຫວຮັບໃຊ້ແຂກທີ່ເດີນທາງມາເຂົ້າຮ່ວມກອງປະຊຸມ CCM ທີ່ ສປປ ລາວ ຮັບກຽດເປັນເຈົ້າພາບ. ນັບແຕ່ມື້ປະຈໍາການເປັນຕົ້ນມາ ກໍາລັງຕໍາຫຼວດຈະລາຈອນໄດ້ເຄື່ອນໄຫວວຽກງານວິຊາສະເພາະດ້ວຍຄວາມຮັບຜິດຊອບສູງ. ໃນນັ້ນໄດ້ຂັບລົດເປີດທາງໃຫ້ແຂກທີ່ເຂົ້າມາຮ່ວມກອງປະຊຸມ ນັບຕັ້ງແຕ່ສະໜາມບິນສາກົນວັດໄຕ ຫາສະຖານທີ່ພັກເຊົາ, ແຕ່ສະຖານທີ່ພັກເຊົາ ຫາຫໍປະຊຸມແຫ່ງຊາດ.ພ້ອມທັງໄດ້ຈັດກໍາລັງລົງປະຈໍາການຢູ່ບັນດາຈຸດຕ່າງໆ ລະບາຍການສັນຈອນ ເພື່ອອໍານວຍຄວາມສະດວກໃຫ້ຜູ້ແທນ ກໍຄື ແຂກທີ່ເດີນທາງເຂົ້າຮ່ວມກອງປະຊຸມໃນຄັ້ງນີ້ໃຫ້ມີຄວາມສະດວກ ແລະ ເປັນລະບຽບຮຽບຮ້ອຍ ຮັກສາໄດ້ຄວາມສະຫງົບປອດໄພ.ຮຽກຮ້ອງມາຍັງທຸກພາກສ່ວນ ຕະຫຼອດຮອດປະຊາຊົນຈົ່ງອໍານວຍຄວາມສະດວກ, ປະຕິບັດກົດຈະລາຈອນ, ໃຫ້ການຮ່ວມມືກັບເຈົ້າໜ້າທີ່ພ້ອມກັນເປັນເຈົ້າພາບທີ່ດີຮ່ວມກັນເພື່ອເຮັດໃຫ້ກອງປະຊຸມຄັ້ງນີ້ດໍາເນີນໄປດ້ວຍຜົນສໍາເລັດອັນຈົບງາມ.
 |
ໂອກາດນີ້, ທ່ານ ຮອ ແສງທອງ ລາຊະບຸດ ຮອງຫົວໜ້າພະແນກຈັດລະບຽບປ້ອງກັນແລະເປີດທາງ ຍັງໃຫ້ຮູ້ຕື່ມອີກວ່າ: ກຳລັງຕຳຫຼວດຈະລາຈອນທີ່ໄດ້ຮັບມອບໝາຍຮັບໃຊ້ກອງປະຊຸມ CCM ໃນຄັ້ງນີ້ໄດ້ຕັ້ງໜ້າປະຕິບັດໜ້າທີ່ການເມືອງຂອງຕົນດ້ວຍຄວາມຮັບຜິດຊອບສູງ ນັບແຕ່ວັນທີ 11 ເປັນຕົ້ນມາ ໄດ້ນຳພາອ້າຍນ້ອງເປີດທາງໃຫ້ແຂກແຕ່ສະໜາມບິນສາກົນວັດໄຕເຖິງທີ່ພັກໂຮງແຮມ, ເຖິງແມ່ນວ່າຈະມີຄວາມຫຍຸ້ງຍາກ, ລົດອັ່ງອໍຕາມເສັ້ນທາງສາຍຕ່າງໆ ແຕ່ກໍສາມາດນຳພາແຂກໄປເຖິງກອງປະຊຸມທັນຕາມກຳນົດເວລາ.
 |
(ຂ່າວ: ແສງຈັນ)
ຄໍາເຫັນ