ຈີນ ເລັ່ງຊຸກ​ຍູ້​ການ​ພັດ​ທະ​ນາ​ແບບຍືນຍົງ ແລະ ​ທັນ​ສະ​ໄໝ​ ເພື່ອເຮັດໃຫ້ຄົນ ແລະ ທໍາມະຊາດຢູ່​ຮ່ວມ​ກັນ​ຢ່າງ​ກົມ​ກຽວ​

ແລະປະຕິບັດແນວຄິດທີ່ວ່ານ້ຳໃສ ແລະ ພູເຂົາຂຽວອຸ່ມທຸ່ມ ກໍຄືພູເຂົາເງິນແລະພູເຂົາທອງ, ເອົາໃຈໃສ່ໃນການກໍ່ສ້າງປະເທດຈີນທີ່ສວຍງາມເປັນອັນດັບໜຶ່ງ, ຖືເອົາການຟື້ນຟູປະເທດຊາດເປັນຫຼັກ, ສົ່ງເສີມການປັບປຸງສະພາບແວດລ້ອມການດໍາລົງຊີວິດໃນຕົວເມືອງ ແລະ ຊົນນະບົດໃຫ້ດີຂຶ້ນຢ່າງແທ້ຈິງ, ສະໜັບສະໜູນການພັດທະນາຄຸນນະພາບຂອງສິ່ງແວດລ້ອມເພື່ອຊຸກຍູ້ການພັດທະນາໃຫ້ກ້າວໜ້າ ໂດຍກໍານົດການປະຕິບັດນະໂຍບາຍ ແລະ ຍຸດທະສາດທີ່ສຳຄັນດັ່ງນີ້:

ໜຶ່ງ, ສປ ຈີນ ຈະສືບຕໍ່ແກ້ໄຂບັນຫາມົນລະພິດ ໂດຍການຄວບຄຸມມົນລະພິດໃຫ້ຖືກຈຸດ ເປັນຕົ້ນແມ່ນການຄວບຄຸມມົນລະພິດທາງວິທະຍາສາດ, ການບັງຄັບໃຊ້ກົດໝາຍ, ຮັກສາສະຖຽນລະພາບ, ປະຕິບັດຢ່າງກວ້າງຂວາງ ແລະ ເລິກເຊິ່ງ, ສົ່ງເສີມການປ້ອງກັນແລະຄວບຄຸມມົນລະພິດໃນສິ່ງແວດລ້ອມຕື່ມອີກ, ສືບຕໍ່ປັບປຸງຄຸນນະພາບຂອງລະບົບນິເວດ;ການປົກປ້ອງທ້ອງຟ້າສີຄາມ ຖືເປັນບູລິມະສິດອັນດັບຕົ້ນ ໂດຍສຸມໃສ່ຂົງເຂດທີ່ສຳຄັນຄື: ປັກກິ່ງ-ທຽນສິນ-ເຮີເປ່ ແລະ ເຂດອ້ອມຂ້າງ, ເຂດສາມຫຼ່ຽມແມ່ນ້ຳຢາງຊີກຽງ, ເຂດທົ່ງພຽງເຟີນເວ, ເພີ່ມປະສິດທິພາບ ແລະປັບປຸງໂຄງປະກອບອຸດສາຫະກຳ, ໂຄງສ້າງດ້ານພະລັງງານ, ພື້ນຖານໂຄງລ່າງດ້ານການຄົມມະນາຄົມຂົນສົ່ງ, ຊຸກຍູ້ການປະສານງານຢ່າງຈິງຈັງ ລວມທັງຄວາມພະຍາຍາມໃນການຫຼຸດຜ່ອນການປ່ອຍທາດອາຍພິດເຮືອນແກ້ວ ເຊັ່ນ: ທາດກາກບອນໄດອ໋ອກໄຊ (CO₂); ທາດເມຕານ(CH₄), ໄນໂຕຣເຈນອອກໄຊ (N₂O). ນອກຈາກນັ້ນ, ສປ ຈີນ ຍັງຈະສືບຕໍ່ຫຼຸດຜ່ອນຄວາມເຂັ້ມຂຸ້ນຂອງຝຸ່ນ PM2.5 ໂດຍການຍົກລະດັບການຄວບຄຸມແຫຼ່ງທີ່ມາ.ພິເສດ, ສປ ຈີນກໍາລັງເພີ່ມທະວີຄວາມພະຍາຍາມໃນການແກ້ໄຂສິ່ງລົບກວນ, ຄວັນນ້ຳມັນ, ກິ່ນເໝັນ ແລະບັນຫາອື່ນໆ “ຢູ່ໜ້າປະຕູເຮືອນ” ຂອງປະຊາຊົນ,ແກ້ໄຂຄວາມກັງວົນຂອງປະຊາຊົນ,ຕ້ອງເພີ່ມທະວີການຮ່ວມມືໃນການປ້ອງກັນ ແລະຄວບຄຸມພາກພື້ນ, ມີມາດຕະການຮອບດ້ານ, ເລັ່ງລັດລຶບລ້າງມົນລະພິດຢ່າງແຂງແຮງ, ປົກປັກຮັກສາທ້ອງຟ້າໃຫ້ສວຍງາມ. ຄຽງຄູ່ກັນນັ້ນ, ສປ ຈີນ ກໍກໍາລັງເລັ່ງແກ້ໄຂຂໍ້ບົກຜ່ອງໃນການເກັບກັກ ແລະບຳບັດນ້ຳເປື້ອນໃນຕົວເມືອງ, ດຳເນີນການຄວບຄຸມມົນລະພິດພາຍນອກ ແລະການຟື້ນຟູລະບົບສິ່ງແວດລ້ອມຕາມເງື່ອນໄຂຂອງແຕ່ລະທ້ອງຖິ່ນໂດຍການກຳຈັດນ້ຳດຳ, ກິ່ນເໝັນໃນຕົວເມືອງ ແລະຊົນນະບົດເປັນກົນໄກໄລຍະຍາວ.

ສອງ, ສປ ຈີນ ກຳລັງເລັ່ງໃຫ້ເກີດການປ່ຽນແປງວິທີການພັດທະນາທີ່ເປັນມິດຕໍ່ສິ່ງແວດລ້ອມ ແລະ ປ່ອຍທາດອາຍພິດເຮືອນແກ້ວຂຶ້ນສູ່ຊັ້ນບັນຍາກາດໃນປະລິມານທີ່ຕໍ່າ ໂດຍການຈັດຕັ້ງປະຕິບັດຍຸດທະສາດໃນການພັດທະນາສີຂຽວເປັນພື້ນຖານໃນການແກ້ໄຂບັນຫາລະບົບນິເວດວິທະຍາ ແລະສິ່ງແວດລ້ອມ, ເລັ່ງລັດສ້າງວິທີການຜະລິດສີຂຽວ ແລະວິຖີຊີວິດ, ສ້າງໂຄງລ່າງພື້ນຖານສີຂຽວເພື່ອການພັດທະນາທີ່ມີຄຸນນະພາບສູງ;ຕ້ອງເພີ່ມປະສິດທິພາບຮູບແບບການພັດທະນາທີ່ດິນຂອງລັດ, ຮັກສາພື້ນຖານການພັດທະນາ ແລະການປົກປັກຮັກສາທີ່ດິນຂອງລັດ, ລວມທັງຕ້ອງໄດ້ມີການປະສານສົມທົບ ແລະປັບປຸງການຈັດສັນທີ່ດິນໃຫ້ຢູ່ໃນສະພາບແຂງແຮງ, ສ້າງການທ່ອງທ່ຽວສີຂຽວ, ປະຢັດນ້ຳ ແລະ ໄຟຟ້າ, “ການດໍາລົງຊີວິດແບບສະອາດ”, ການແຍກປະເພດຂີ້ເຫຍື້ອ ແລະອື່ນໆ ໃຫ້ກາຍເປັນນິດໄສຂອງພັກ ແລະລັດຖະບານທຸກຂັ້ນ, ໂດຍລັດວິສາຫະກິດແລະສະຖາບັນຕ່າງໆຕ້ອງເປັນຕົ້ນແບບໃນການປະຕິບັດ;ສືບຕໍ່ດຳເນີນການພັດທະນາ "ປະເທດຈີນທີ່ສວຍງາມຕ້ອງເລີ່ມຈາກຕົນເອງ" ເພື່ອລະດົມໃຫ້ສະຖານທີ່ສາທາລະນະ, ວິສາຫະກິດ, ຊຸມຊົນ, ໂຮງຮຽນ, ຄອບຄົວ ແລະບຸກຄົນຢ່າງຕັ້ງໜ້າ,ເພື່ອສ້າງໃຫ້ເປັນສັງຄົມທີ່ທຸກຄົນ, ທຸກເວລາ ແລະທຸກແຫ່ງຫົນ ມີລະບຽບວິໄນ ແລະ ຄຸນສົມບັດອັນດີງາມ.ສໍາລັບການຜະລິດກະສິກຳ, ຕ້ອງໄດ້ມີການປັບປຸງລະບົບນິເວດວິທະຍາຂອງທ້ອງຖິ່ນ ແລະຕົວເມືອງ, ປັບປຸງລະບົບເຂດເທດສະບານທີ່ສໍາຄັນ ໂດຍການປົກປັກຮັກສາເຂດນິເວດວິທະຍາ, ເພີ່ມທະວີການປະຕິບັດກົດໝາຍ, ຕິດຕາມກວດກາ, ປົກປັກຮັກສາ ແລະຟື້ນຟູ, ຮັບປະກັນວ່າຈະບໍ່ມີການຜ່ອນຜັນ ຫຼື ປ່ຽນແປງການປະຕິບັດໜ້າທີ່ ແລະຄຸນສົມບັດ. ນອກນັ້ນ, ກໍຕ້ອງຮັກສາເນື້ອທີ່ດິນປູກຝັງໄດ້ປະມານ 1,2 ລ້ານ ກິໂລຕາແມັດ ໄປຄຽງຄູ່ກັບການສົ່ງເສີມການດໍາລົງຊີວິດສີຂຽວ,ລຽບງ່າຍ, ສັງຄົມສີຂຽວ, ດໍາລົງຊີວິດບົນພື້ນຖານການປ່ອຍມູນລະພິດຕ່ຳ ແລະປະຊາຊົນມີສຸຂະພາບດີ.

ສາມ, ພະຍາຍາມປັບປຸງຄວາມຫຼາກຫຼາຍ, ສະຖຽນລະພາບ, ຄວາມໝັ້ນຄົງຂອງລະບົບນິເວດ. ສປ ຈີນ ຕ້ອງຍົກສູງມາດຕະຖານການປົກປັກຮັກສາຄວາມປອດໄພດ້ານສິ່ງແວດລ້ອມແຫ່ງຊາດ, ການພັດທະນາແບບຍືນຍົງຂອງປະເທດຈີນ, ມີຄວາມຮັບຜິດຊອບຕໍ່ອາລິຍະທຳຂອງມະນຸດ, ເສີມຂະຫຍາຍການປົກປັກຮັກສາແລະຟື້ນຟູລະບົບນິເວດ, ສ້າງເຂດສິ່ງແວດລ້ອມອັນສວຍງາມໄວ້ໃຫ້ຄົນລຸ້ນຫຼັງ.ສປ ຈີນ ກໍາລັງຂະຫຍາຍເສັ້ນທາງຂອງນໍ້າໄສ,ປ່າໄມ້ສີຂຽວໃຫ້ກາຍເປັນພູເງິນພູຄໍາທີ່ມີລະບົບນິເວດທີ່ດີ, ເຊິ່ງສະທ້ອນໃຫ້ເຫັນເຖິງຄຸນຄ່າດ້ານເສດຖະກິດທີ່ບໍ່ຢຸດຢັ້ງ,ສົ່ງເສີມອຸດສາຫະກໍາສິ່ງແວດລ້ອມ ແລະ ສິ່ງແວດລ້ອມອຸດສາຫະກໍາ, ປູກຝັງຜະລິດຕະພັນທໍາມະຊາດໃຫ້ໄດ້ຈໍານວນຫຼາຍເພື່ອສົ່ງອອກສູ່ຕະຫຼາດ.

ສີ່, ຊຸກຍູ້ປັບລະດັບຄ່າກາກບອນທີ່ສູງ ແລະ ຄ່າກາກບອນກາງໃຫ້ຢູ່ໃນເກນສະຖຽນລະພາບ,ປະຕິບັດຕາມແຜນທົ່ວປະເທດ, ຖືການປະຢັດເປັນຫຼັກ, ນໍາໃຊ້ຫຼັກການຂັບເຄື່ອນ 2 ລໍ້, ເລື່ອນໄຫຼທັງໃນ ແລະ ນອກ, ການປ້ອງກັນຄວາມສ່ຽງ, ນໍາໃຊ້ນະໂຍບາຍ“1+N”(ໝາຍເຖິງ1ນະໂຍບາຍ+Nຈັດຕັ້ງປະຕິບັດ) ຕໍ່ການຄຸ້ມຄອງຄ່າກາກບອນທີ່ສູງ ແລະ ຄ່າກາກບອນກາງ;ປັບປຸງໂຄງສ້າງລະບົບພະລັງງານ ໃຫ້ກ້າວໄປສູ່ລະບົບພະລັງງານທີ່ສະອາດ, ກາກບອນຕໍ່າທີ່ປອດໄພ ແລະ ມີປະສິດທິພາບ;ນໍາໃຊ້ຖ່ານຫີນທີ່ສະອາດ ແລະ ປະສິດທິພາບສູງ, ຮັບປະກັນວ່າຈະມີບົດບາດໃນການປົກປັກຮັກສາ ແລະ ສະໜັບສະໜູນການຈັດຕັ້ງປະຕິບັດລະບຽບການພັດທະນາພະລັງງານໃຫມ່ ໂດຍການພັດທະນາພະລັງງານທົດແທນ ເຊັ່ນ: ພະລັງງານລົມ ແລະ ແສງອາທິດ, ປະສານສົມທົບກັບການພັດທະນາໄຟຟ້ານ້ຳຕົກ ແລະປົກປັກຮັກສາລະບົບນິເວດ, ຕັ້ງໜ້າພັດທະນາໄຟຟ້ານິວເຄຼຍຢ່າງປອດໄພ ແລະມີຄວາມເປັນລະບຽບຮຽບຮ້ອຍ, ເລັ່ງລັດກໍ່ສ້າງລະບົບໄຟຟ້າແບບໃໝ່ ໂດຍສຸມໃສ່ຄວບຄຸມການຊົມໃຊ້ພະລັງງານນໍ້າມັນເຊື້ອໄຟ, ສ້າງຄວາມເຂັ້ມແຂງດ້ານການຜະລິດພະລັງງານ, ການສະໜອງ, ການເກັບຮັກສາ ແລະ ການຕະຫຼາດພະລັງງານ, ຮັບປະກັນຄວາມໝັ້ນຄົງດ້ານພະລັງງານ.

ຫ້າ, ປະຕິບັດແນວທາງໃນການສ້າງປະເທດຈີນທີ່ສວຍງາມ ແລະ ປອດໄພ. ສປ ຈີນ ຕ້ອງປະຕິບັດແນວຄວາມຄິດດ້ານຄວາມປອດໄພແຫ່ງຊາດ, ຮັບມືກັບຄວາມສ່ຽງແລະສິ່ງທ້າທາຍຕ່າງໆຢ່າງມີປະສິດທິພາບ ແລະ ປະສິດທິຜົນ ລວມທັງຕ້ອງຮັບປະກັນວ່າສະພາບແວດລ້ອມ ແລະທໍາມະຊາດທີ່ພວກເຮົາເອື່ອຍອີງຈະບໍ່ຖືກຄຸກຄາມຫຼືທຳລາຍ.ພ້ອມດຽວກັນນັ້ນ, ກໍຕ້ອງໄດ້ບໍາລຸງຮັກສາຄວາມປອດໄພຂອງລະບົບນິເວດຢ່າງຈິງຈັງ;ປັບປຸງກົນໄກການປະສານງານວຽກງານຄວາມປອດໄພດ້ານສິ່ງແວດລ້ອມແຫ່ງຊາດ, ປັບປຸງລະບົບກົດໝາຍວ່າດ້ວຍຄວາມປອດໄພດ້ານສິ່ງແວດລ້ອມແຫ່ງຊາດ, ລະບົບຍຸດທະສາດ, ລະບົບນະໂຍບາຍ, ລະບົບການຄຸ້ມຄອງ, ເສີມຂະຫຍາຍການຄົ້ນຄວ້າແລະປະເມີນຄວາມສ່ຽງດ້ານຄວາມປອດໄພ, ດ້ານລະບົບນິເວດແຫ່ງຊາດ, ການຕິດຕາມແລະການແຈ້ງເຕືອນໄພລ່ວງໜ້າ, ການຮັບມືແລະການກໍາຈັດໄພພິບັດ.

ຫົກ, ປັບປຸງລະບົບການຮັບປະກັນການສ້າງປະເທດຈີນທີ່ສວຍງາມ. ຕ້ອງສົມທົບກັນສ້າງແຫຼ່ງກຳລັງໃນດ້ານຕ່າງໆ, ເຕົ້າໂຮມກຳລັງແຮງຈາກທຸກດ້ານ, ສ້າງ “ການປະສານສົມທົບກັນ” ໃນລະບຽບກົດໝາຍ, ຕະຫຼາດ, ວິທະຍາສາດເຕັກໂນໂລຊີ, ນະໂຍບາຍໜູນຊ່ວຍພື້ນຖານ ແລະ ການຮັບປະກັນໃຫ້ແກ່ການກໍ່ສ້າງປະເທດຈີນທີ່ສວຍງາມ.ສປ ຈີນ ກໍາລັງປັບປຸງນະໂຍບາຍເສດຖະກິດເພື່ອການພັດທະນາສີຂຽວ ແລະ ປ່ອຍທາດອາຍພິດເຮືອນແກ້ວໃນປະລິມານຕໍ່າ;ເພີ່ມທະວີການສະໜັບສະໜູນດ້ານການເງິນ, ເພີ່ມທະວີການຈັດສັນແຫຼ່ງທຶນເຂົ້າໃນຂົງເຂດກໍ່ສ້າງລະບົບສິ່ງແວດລ້ອມ, ຮັບປະກັນຂອບເຂດການລົງທຶນກົງກັບວຽກງານກໍ່ສ້າງ;ເພີ່ມທະວີການສະໜັບສະໜູນນະໂຍບາຍພາສີ, ປະຕິບັດກົດໝາຍວ່າດ້ວຍພາສີການປົກປັກຮັກສາສິ່ງແວດລ້ອມຢ່າງເຂັ້ມງວດ, ປັບປຸງລະບົບການເກັບພາສີ, ເລັ່ງລັດການບັນຈຸທາດປະສົມອິນຊີທີ່ລະເຫີຍຂຶ້ນໃນຂອບເຂດການເກັບກູ້; ຊຸກຍູ້ການໜູນວຽນດ້ານການເງິນ, ພັດທະນາການເງິນສີຂຽວ, ຊຸກຍູ້ບັນດາຮູບແບບການພັດທະນາທີ່ໃຫ້ຄວາມສຳຄັນແກ່ການປົກປັກຮັກສິ່ງແວດລ້ອມ, ການປະດິດສ້າງຮູບແບບການລົງທຶນ ແລະການເງິນ, ການຄົ້ນຄວ້າບັນດາຮູບແບບການໜູນຊ່ວຍດ້ານການເງິນໃຫ້ແກ່ບັນດາໂຄງການກໍ່ສ້າງການປົກປັກຮັກສາສິ່ງແວດລ້ອມໃນພາກພື້ນ, ຊີ້ນຳການລົງທຶນຂອງບັນດາສະຖາບັນການເງິນ ແລະທຶນທາງສັງຄົມ;ເພີ່ມທະວີການສະໜັບສະໜູນນະໂຍບາຍດ້ານລາຄາ, ພິຈາລະນາຢ່າງຄົບຖ້ວນກ່ຽວກັບການຊົມໃຊ້ພະລັງງານຂອງບໍລິສັດ ແລະລະດັບການປະຕິບັດງານດ້ານສິ່ງແວດລ້ອມ, ພ້ອມທັງປັບປຸງໂຄງສ້າງລາຄາໄຟຟ້າສຳລັບອຸດສາຫະກຳທີ່ໃຊ້ພະລັງງານສູງເປັນຂັ້ນໆ;ເພີ່ມທະວີການສະໜັບສະໜູນທາງວິທະຍາສາດ ແລະ ເຕັກໂນໂລຊີ,ສົ່ງເສີມການເພິ່ງພາຕົນເອງ, ກຸ້ມຕົນເອງທາງດ້ານວິທະຍາສາດເຕັກໂນໂລຊີສີຂຽວທີ່ເປັນມິດກັບສິ່ງແວດລ້ອມ, ຖືເອົາການປ່ຽນແປງດິນຟ້າອາກາດແລະການຄວບຄຸມມົນລະພິດໃໝ່ ໃຫ້ເປັນຂົງເຂດທີ່ສຳຄັນຂອງການຄົ້ນຄວ້າພື້ນຖານແຫ່ງຊາດ, ນະວັດຕະກຳວິທະຍາສາດແລະເຕັກໂນໂລຊີ, ພ້ອມທັງເອົາໃຈໃສ່ເຖິງບັນດາເຕັກໂນໂລຊີທີ່ສໍາຄັນ,ເລັ່ງລັດສ້າງລະບົບຕິດຕາມກວດກາສິ່ງແວດລ້ອມທີ່ທັນສະໄໝ ແລະປັບປຸງເຄືອຂ່າຍຕິດຕາມກວດກາເປັນລະບົບດຽວຄື: ທ້ອງຟ້າ, ພື້ນດິນ ແລະທະເລ ໂດຍການນຳໃຊ້ເຕັກໂນໂລຊີດີຈີຕອນ ເຊັ່ນ: ປັນຍາປະດິດ, ສ້າງລະບົບການປົກຄອງດ້ານດີຈີຕອນໃຫ້ປະເທດຈີນສວຍງາມ, ສ້າງອາລິຍະທຳດ້ານສິ່ງແວດລ້ອມດີຈີຕອນທີ່ມີສີຂຽວ ແລະ ອັດສະລິຍະ.

ສັງລວມແລ້ວ, ນອກຈາກເລັ່ງປະຕິບັດບັນດານະໂຍບາຍ, ກົດໝາຍ, ຍຸດທະສາດ ແລະ ມາດຕະການຕ່າງໆທີ່ກ່ຽວຂ້ອງກັບສິ່ງແວດລ້ອມ ກໍຄື ການຄວບຄຸມມົນລະພິດຢ່າງຕັ້ງໜ້າ ເພື່ອສົ່ງເສີມການພັດທະນາແບບຍືນຍົງ ແລະ ທັນສະໄໝຂອງ ສປ ຈີນ ແນໃສ່ສ້າງປະເທດຈີນໃຫ້ສວຍງາມຮັ່ງມີແລ້ວ,ສປ ຈີນ ໃນຖານະທີ່ເປັນປະເທດທີ່ມີເສດຖະກິດຂະຫຍາດໃຫຍ່ທີ່ມີປະລິມານປ່ອຍທາດອາຍພິດເຮືອນແກ້ວຂຶ້ນສູ່ຊັ້ນບັນຍາກາດຂອງໂລກຫຼາຍເປັນອັນດັບຕົ້ນຂອງໂລກ ຍັງຖືວ່າເປັນການປະກອບສ່ວນອັນສຳຄັນເຂົ້າໃນຄວາມພະຍາຍາມຢ່າງຕໍ່ເນື່ອງຂອງປະຊາຄົມໂລກໃນການແກ້ໄຂບັນຫາການປ່ຽນແປງດິນຟ້າອາກາດທີ່ເປັນໜຶ່ງໃນສິ່ງທ້າທາຍຂອງໂລກ.ສປ ຈີນ ກໍເປັນໜຶ່ງໃນບັນດາປະເທດທີ່ໄດ້ໃຫ້ສັດຕະຍາບັນໃນສົນທິສັນຍາສາກົນທີ່ຕິດພັນກັບການປ່ຽນແປງດິນຟ້າອາກາດ ໂດຍສະເພາະແມ່ນ ສັນຍາປາຣີ ຊຶ່ງ ສປ ຈີນ ໄດ້ຕັ້ງເປົ້າໝາຍໃນການຫຼຸດຜ່ອນປະລິມານການປ່ອຍທາຍອາຍພິດເຮືອນແກ້ວແຫ່ງຊາດຂອງຕົນໃຫ້ກາຍເປັນ 0 (Net Zero Emissions ) ພາຍໃນປີ 2060ໂດຍການເລັ່ງລັດຈັດຕັ້ງປະຕິບັດນະໂຍບາຍ, ກົດໝາຍ, ຍຸດທະສາດ ແລະ ມາດຕະການຕ່າງໆທີ່ກ່າວມາກ່ອນໜ້ານີ້.ນອກນີ້, ຈີນຍັງໄດ້ຊຸກຍູ້ການຮ່ວມມືສາກົນຢ່າງຕັ້ງໜ້າ, ສະໜັບສະໜູນປະເທດກໍາລັງພັດທະນາອື່ນໆ ເພື່ອຮັບມືກັບບັນຫາການປ່ຽນແປງຂອງດິນຟ້າອາກາດ ໂດຍໄດ້ໃຫ້ການຊ່ວຍເຫຼືອຢ່າງຫຼວງຫຼາຍທາງດ້ານງົບປະມານ, ເຕັກນິກ ແລະ ການສ້າງຂີດຄວາມສາມາດໃນຫຼຸດຜ່ອນຜົນກະທົບທີ່ເກີດຈາກປ່ຽນແປງດິນຟ້າອາກາດ ກໍຄື ວຽກງານການປັບຕົວ. ພິເສດ, ສປ ຈີນ ໃນຖານະທີ່ເປັນປະເທດມີຂະໜາດເສດຖະກິດໃຫຍ່ເປັນອັນດັບທີ 2 ຂອງໂລກ ໄດ້ປະກອບສ່ວນຈັດສັນງົບປະມານຈໍານວນ 20 ຕື້ຢວນ ເພື່ອສະໜັບສະໜູນການຮ່ວມມືໃຕ້-ໃຕ້ ເພື່ອຮັບມືກັບການປ່ຽນແປງຂອງດິນຟ້າອາກາດ.ການເຄື່ອນໄຫວຂອງຈີນໄດ້ເປັນແບບຢ່າງທີ່ດີໃຫ້ແກ່ການຄຸ້ມຄອງດິນຟ້າອາກາດໃນທົ່ວໂລກ ແລະ ໄດ້ຮັບການຍ້ອງຍໍສັນລະເສີນຢ່າງກວ້າງຂວາງຈາກປະຊາຄົມໂລກ.