ຈີນຍິງສົ່ງດາວທຽມ ຊ່ຽນຟ່ານຈີກຸຍ ກຸ່ມ 01 ຢ່າງສຳເລັດຜົນ

ຂ່າວຕ່າງປະເທດລາຍງານ ໃນວັນທີ 30 ມິຖຸນາ ຜ່ານມາວ່າ: ທະນາຄານ​​ເພື່ອການຊຳລະສາກົນ (Bank for International Settlements: BIS) ເປີດເຜີຍບົດລາຍງານ​ການ​ປະ​ເມີນ​ເສດຖະກິດ​ໂລກ​ຄັ້ງ​ຫຼ້າ​ສຸດ​ ໃນ​ວັນ​ທີ 29 ມິຖຸນາ ຜ່ານມາ​ວ່າ: ຄວາມ​ເຄັ່ງ​ຕຶງ​ດ້ານ​ການ​ຄ້າ ​ແລະ​ ທາງ​ດ້ານພູມສາດການ​ເມືອງ​ ມີຄວາມສ່ຽງທີ່ຈະເຮັດໃຫ້ລະບົບການເງິນທົ່ວໂລກປະເຊີນກັບຄວາມບໍ່ສອດຄ່ອງໃນລະດັບທີ່ເລິກເຊິ່ງຂຶ້ນ.

ຂ່າວຕ່າງປະເທດລາຍງານ ໃນວັນທີ 30 ມິຖຸນາ ຜ່ານມາວ່າ: ຄື້ນ​ຄວາມ​ຮ້ອນ​ຍັງ​ສືບ​ຕໍ່​ປົກຄຸມຫຼາຍປະເທດໃນເອີຣົບ ໂດຍ​ມີ​ຫຼາຍ​ປະ​ເທດ​ໄດ້ອອກ​ຄໍາ​ເຕືອນທ່າມກາງ​ອຸນ​ຫະ​ພູມ​ທີ່​ເພີ່ມສູງ​ຂຶ້ນ, ​ໃນ​ຂະ​ນະ​ທີ່​ແອັດສະປາຍ ທຳລາຍສະຖິຕິອຸນຫະພູມສູງທີ່ສຸດ.

ຂ່າວຕ່າງປະເທດລາຍງານ ໃນວັນທີ 30 ມິຖຸນາ ຜ່ານມາວ່າ: ບົດລາຍງານຂອງ ບໍລິສັດ Teikoku Databank ຊຶ່ງເປັນບໍລິສັດຄົ້ນຄວ້າຂອງຍີ່ປຸ່ນ ເປີດເຜີຍວ່າ: ສິນຄ້າອາຫານໃນຍີ່ປຸ່ນ ປະມານ 2,105 ລາຍການ ຈະປັບຂຶ້ນລາຄາໃນເດືອນກໍລະກົດ ນີ້ ຍ້ອນການເພີ່ມຂຶ້ນຂອງລາຄາວັດຖຸດິບ, ລວມເຖິງການເພີ່ມຂຶ້ນຂອງຄ່າແຮງງານ, ການຂົນສົ່ງ ແລະ ຄ່ານໍ້າ-ຄ່າໄຟ.

ຂ່າວສານຊີອາໄອລາຍງານວ່າ: ກົມ​ການ​ເມືອງ​ສູນ​ກາງ​ພັກ​ກອມ​ມູ​ນິດ​ຈີນ​ໄດ້​ຈັດ​ກອງ​ປະ​ຊຸມ​ໃນ​ວັນ​ທີ 30 ມິ​ຖຸ​ນາ​ ຜ່ານມາ ໂດຍ​ໄດ້​ທົ​ທວນ​ຄືນ “ກົດ​ລະ​ບຽບ​​ໃນ​ການປະ​ຕິ​ບັດ​ງານ​ຂອງ​ອົງ​ການ​​ຕັດ​ສິນ​ນະ​ໂຍ​ບາຍ, ປຶກ​ສາ​ຫາ​ລື​ ແລະ ​ປະ​ສານງານ​ຂອງ​ສູນ​ກາງ​ພັກ”, ທ່ານ​ ສີ​ຈິ້ນ​ຜິງ ເລ​ຂາ​ທິ​ການ​ໃຫຍ່​ຄະ​ນະ​ກຳ​ມະ​ການ​ສູນ​ກາງ​ພັກ​ກອມ​ມູ​ນິດ​ຈີນ​ເປັນ​ປະ​ທານກອງ​ປະ​ຊຸມ.

ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 30 ມິຖຸນາ ຜ່ານມາ, ທົ່ວປະເທດ ຫວຽດນາມ ໄດ້ຈັດພິທີປະກາດມະຕິ, ຂໍ້ຕົກລົງສະບັບຕ່າງໆຂອງສູນກາງ ແລະ ທ້ອງຖິ່ນ ກ່ຽວກັບການໂຮມຫົວໜ່ວຍບໍລິຫານຂັ້ນແຂວງ, ຕາແສງ, ສ້າງຕັ້ງອົງການຈັດຕັ້ງພັກ, ສະພາປະຊາຊົນ, ຄະນະກຳມະການປະຊາຊົນ, ແນວໂຮມປະເທດຊາດແຂວງ, ນະຄອນ, ຕາແສງ ແລະ ເຂດພິເສດ.

ຂ່າວສານຊີອາໄອລາຍງານຫວ່າງມໍ່ໆມານີ້; ກອງ​ປະ​ຊຸມ​ການ​ຄ້າ​ ແລະ​ ການ​ພັດ​ທະ​ນາ​ອົງ​ການ​ສະ​ຫະ​ປະ​ຊາ​ຊາດ ​ປະ​ກາດ​ບົດ​ລາຍ​ງານ​ວ່າ: ໜີ້​ສິນ​ສາ​ທາ​ລະ​ນະ​ທົ່ວ​ໂລກ​ໃນ​ປີ 2023 ແມ່ນ 97,000 ຕື້​ໂດ​ລາ, ປີ 2024 ໄດ້​ເພີ່ມ​ຂຶ້ນ​ຮອດ 102,000 ຕື້ໂດ​ລາ, ສ້າງ​ສະ​ຖິ​ຕິ​ສູງ​ສຸດ​ໃນ​ປະ​ຫວັດ​ສາດ, ​ໃນ​ນັ້ນ, ປະ​ເທດ​ທີ່​ພວມ​ພັດ​ທະ​ນາຖືກ​ກະ​ທົບ​ໜັກ​ໜ່ວງກວ່າ​ໝູ່.

ຂ່າວຕ່າງປະເທດລາຍງານ ໃນທ້າຍອາທິດ ຜ່ານມາວ່າ: ກຸ່ມໂອເປັກພລັສ (OPEC+) ຊຶ່ງເປັນພັນທະມິດດ້ານ​ນ້ຳມັນ​ໃຫຍ່​ທີ່​ສຸດ​ຂອງ​ໂລກ, ກຽມເພີ່ມປະລິມານການຜະລິດນໍ້າມັນ 411,000 ບາ​ເຣນ/ວັນ​ໃນ​ເດືອນ​ສິງຫາ ຈະມາເຖິງນີ້, ໂດຍມີເປົ້າໝາຍ​ເພື່ອຟື້ນຟູ​ສ່ວນ​ແບ່ງ​ຕະຫຼາດ​ທີ່​ສູນ​ເສຍ​ໄປໃຫ້ກັບ​ຄືນ​ມາ.

ຂ່າວຕ່າງປະເທດລາຍງານ ຫວ່າງມໍ່ໆມານີ້ວ່າ: ຄະນະ​ກຳມະການ​ຫໍສະໝຸດ​ແຫ່ງ​ຊາດ​ສິງກະ​ໂປ ​ໄດ້​ເປີດ​ເຜີຍ​ຜົນ​ການ​ສຶກສາ​ພຶດຕິ​ກຳ​ການ​ອ່ານ​ແຫ່ງ​ຊາດ​ປີ ​​2024​ ພົບ​ເຫັນ​ວ່າຜູ້ໃຫຍ່​ເກືອບ 9 ​ໃນ 10 ຄົນ ​ແລະ ​ໄວ​ໜຸ່ມ 8 ໃນ 10 ຄົນ​ ຂອງ​ສິງກະ​ໂປ​ອ່ານ​ຂ່າວ, ປຶ້ມ ​ແລະ ​ບົດ​ຄວາມ​ທາງ​ອອນ​ລາຍ​ຫຼາຍ​ກວ່າ​ໜຶ່ງ​ຄັ້ງ​ຕໍ່​ອາທິດ​ໃນ​ປີ 2024.

ຂ່າວຕ່າງປະເທດລາຍງານ ໃນທ້າຍອາທິດຜ່ານມາວ່າ: ກຳ​ປູ​ເຈຍ​ ແນະນຳ​ຢາ CAB-PrEP, ຢາປ້ອງກັນການຕິດໄວຣັດ HIV ແບບ​ສັກທີ່ມີປະສິດທິພາບຊະນິດໃໝ່ ສຳລັບກຸ່ມ​ທີ່​ມີ​ຄວາມ​ສ່ຽງ​ສູງຕໍ່ການຕິດເຊື້ອໄວຣັດທີ່ເຮັດໃຫ້ເກີດໂຣກເອດສ (AIDS).

ວິທະຍຸກະຈາຍສຽງຫວຽດນາມລາຍງານ ຫວ່າງມໍ່ໆມານີ້ວ່າ: ຕາມການຄາດຄະເນຂອງກະຊວງອຸດສາຫະກຳ ແລະ ການຄ້າ ຫວຽດນາມ, ການສົ່ງອອກໃນໄລຍະ 6 ເດືອນຕົ້ນປິ 2025 ບັນລຸລະດັບເຕີບໂຕປະມານ 14% ເມື່ອທຽບໃສ່ໄລຍະດຽວກັນຂອງປີ 2024. ວົງເງິນສົ່ງອອກ - ນໍາເຂົ້າໃນ 6 ເດືອນຕົ້ນປີຄາດວ່າບັນລຸປະມານ 426 – 430 ຕື້ໂດລາ, ເພີ່ມຂຶ້ນປະມານ 15.5 – 15.8% ເມື່ອທຽບໃສ່ໄລຍະດຽວກັນຂອງປີ 2024. ໃນນັ້ນ, ວົງເງິນສົ່ງອອກຄາດວ່າບັນລຸປະມານ 215 – 217 ຕື້ໂດລາ, ເພີ່ມຂຶ້ນປະມານ 13.8 – 14%, ການນຳເຂົ້າຄາດວ່າບັນລຸປະມານ 211 – 213 ຕື້ໂດລາ, ເພີ່ມຂຶ້ນປະມານ 17 – 17.2%. ການສົ່ງອອກເກີນດຸນຄາດວ່າບັນລຸ 3.4 – 4 ຕື້ໂດລາ.