 |
ງານມະຫະກຳການຄ້າການບໍລິການສາກົນຈີນຄັ້ງນີ້ ໄດ້ດຶງດູດ 85 ປະເທດ ແລະ ອົງການຈັດຕັ້ງສາກົນເຂົ້າຮ່ວມ, ມີວິສາຫະກິດທີ່ນອນຢູ່ໃນ 500 ອັນດັບສຸດຍອດວິສາຫະກິດລະດັບໂລກ ແລະ ວິສາຫະກິດນຳໜ້າຂະແໜງການ ເກືອບ 500 ແຫ່ງເຂົ້າຮ່ວມ, ໄດ້ຮັບໝາກຜົນຫຼາຍກວ່າ 900 ປະການ. ເພື່ອນມິດທີ່ນັບມື້ເພີ່ມຂຶ້ນໄດ້ເປັນການຢືນຢັນເຖິງຄຳເຫັນຂອງທ່ານສີຈິ້ນຜິງ ປະທານປະເທດຈີນທີ່ກ່າວໃນສານຊົມເຊີຍເຖິງງານມະຫະກຳຄັ້ງນີ້ທີ່ວ່າ: “ຈີນຈະເປີດກວ້າງການເປີດປະຕູຕໍ່ພາຍນອກໃນລະດັບສູງຢ່າງເດັດດ່ຽວໜຽວແໜ້ນ”.
ໂຕເລກສະແດງໃຫ້ເຫັນວ່າ: ປີຜ່ານມາ, ຍອດມູນຄ່າການຄ້າການບໍລິການຂອງຈີນໄດ້ບັນລຸຫຼາຍກວ່າ 1,000 ຕື້ໂດລາເປັນຄັ້ງທຳອິດ ຊຶ່ງເປັນການສ້າງສະຖິຕິສູງສຸດໃນປະຫວັດສາດ ແລະ ເປັນອັນດັບທີ 2 ຂອງໂລກ. ໃນນັ້ນ, ມູນຄ່າການຄ້າການບໍລິການແບບເນັ້ນຄວາມຮູ້ທີ່ມີຈຸດພິເສດຕ່າງໆ ຄື: ດີຈີຕອນ, ອັດສະລິຍະ ແລະ ການພັດທະນາສີຂຽວ ໄດ້ເພີ່ມຂຶ້ນ 38% ເມື່ອທຽບໃສ່ປີ 2020, ເຮັດໃຫ້ການປະດິດສ້າງທາງດ້ານ “ດີຈີຕອນ ແລະ ອັດສະລິຍະ” ໄດ້ກາຍເປັນຄຳສຳຄັນໃນງານມະຫະກຳການບໍລິການສາກົນຈີນຄັ້ງນີ້.
ໃນງານມະຫະກຳການບໍລິການສາກົນປີນີ້, ຈີນໄດ້ປະກາດໃຊ້ມາດຕະການ ຕ່າງໆ ຊື່ງລວມທັງ “ເລັ່ງລັດດຳເນີນການທົດລອງໄປກ່ອນໃນເຂດທົດລອງການຄ້າການບໍລິການ, ເຂດສາທິດການປະດິດສ້າງການພັດທະນາການຄ້າການບໍລິການແຫ່ງຊາດ ແລະເວທີອື່ນໆ”, “ຊຸກຍູ້ການເປີດປະຕູຕະຫຼາດການບໍລິການຢ່າງເປັນລະບົບ, ຊຸກຍູ້ໃຫ້ການຄ້າການບໍລິການໄດ້ຮັບການພັດທະນາຢ່າງມີຄຸນນະພາບສູງ” ແລະອື່ນໆ. ນີ້ໄດ້ເຮັດໃຫ້ວິສາຫະກິດຕ່າງປະເທດມີຄວາມໝັ້ນໃຈຫຼາຍກວ່າເກົ່າຕໍ່ການພັດທະນາ. ທ່ານຈ້າວຈຸ່ນ ຮອງປະທານຄະນະບໍລິຫານງານບໍລິສັດຈອນສັນແອນຈອນສັນ ທີ່ຮັບຜິດຊອບນະໂຍບາຍ ແລະ ວຽກງານກ່ຽວກັບລັດຖະບານຈີນກ່າວວ່າ: ນັບຕັ້ງແຕ່ບໍລິສັດຕົນດຳເນີນທຸລະກິດຢູ່ຈີນຕະຫຼອດໄລຍະ 40 ປີມານີ້, ໄດ້ເປັນພິຍານໃຫ້ແກ່ຈີນທີ່ໄດ້ປັບປຸງສະພາບແວດລ້ອມການດຳເນີນທຸລະກິດນັບມື້ດີຂຶ້ນ ຊຶ່ງນີ້ກໍເປັນໜຶ່ງໃນເຫດຜົນສຳຄັນທີ່ບໍລິສັດຕົນຍິນດີດຳເນີນທຸລະກິດຢູ່ຈີນມາໂດຍຕະຫຼອດ.
ຈາກກອງປະຊຸມພົບປະຫາລືເພື່ອການລົງທຶນຮອດງານມະຫະກຳການຄ້າການບໍລິການ ແລະ ຕະຫຼອດຮອດງານມະຫະກຳການນຳເຂົ້າສາກົນຈີນທີ່ຈະຈັດຂຶ້ນໃນເດືອນ ພະຈິກປີນີ້, ການຈັດງານເຫຼົ່ານີ້ຈະເຮັດໃຫ້ໂລກບໍ່ພຽງແຕ່ໄດ້ເຫັນແນວ “ໃໝ່” ຫຼາຍກວ່າເກົ່າໃນເສດຖະກິດຈີນເທົ່ານັ້ນ, ແຕ່ຍັງຈະມີຄວາມຮູ້ສຶກເຖິງການຕັດສິນໃຈຂອງຈີນທີ່ສະແຫວງຫາການພັດທະນາຮ່ວມກັນກັບໂລກ ແລະ ການສ້າງເສດຖະກິດໂລກແບບເປີດກວ້າງອີກດ້ວຍ. ຄືດັ່ງຄຳເວົ້າຂອງທ່ານພອລ ບາເຕເມນ ປະທານເຈພີ ມໍເກນ ແອດເຊັດ ແມນີຈີເມນ ໂກລໂບທີ່ວ່າ: “ຢູ່ຈີນແມ່ນເຕັມໄປດ້ວຍໂອກາດ, ການລົງທຶນຢູ່ຈີນແມ່ນການລົງທຶນເພື່ອອະນາຄົດ”.
ໂດຍ: ຊີອາໄອ
ຄໍາເຫັນ